【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 砍掉重來的感情
半個鐘之後曉彤媽咪打嚟話佢都過緊嚟，叫我同醫生講佢醒返先；係嘅…暈咗咁耐其實個身體會亂七八糟，所以都係快啲叫醫生盡快檢查清楚先比較妥當，而醫生嚟到之後就趕返我哋兩個出去。
我：「妳同曉彤佢謦咗啲乜呀？」
敏：「佢真係唔記得晒啲嘢，唔係扮出嚟。」
我：「妳同佢講我哋考緊會考…咁佢咪…」
敏：「佢真係以為自己昏迷咗五個幾月。」
我：「吓…妳唔係真係咁同佢講呀？」
敏：「咪傻啦，你呃到自己都呃唔到人啦，入院有晒時間紀錄，打開份報紙都知今日幾號啦，唔通你等佢以為而家真係上年十一月咩？」
我：「我唔係咁嘅意思，但咁樣…佢咪知自己少咗幾個月囉。」
敏：「係呀，我咪同佢講佢失咗憶。」
我：「吓？咁樣…佢會唔會記得返晒啲唔好嘅嘢？」
敏：「要記得返都無辦法，你好驚咩？」
我：「咁又唔係，我唔想佢唔開心啫…佢有無問妳呢幾個月發生咗乜事呀？」
敏：「有呀，我咪話其實無乜點變，我哋成日一齊溫書準備考試，可能佢壓力大得滯所以暈咗囉。」
我：「嗯…俾妳呃真係一件好幸福嘅事嚟。」
敏：「你咁講乜嘢意思呀？係咪好唔滿意先？」
我：「好滿意…我都俾妳呃咗好耐。」
為咗唔俾我知道佢係初音，佢用盡辦法去制造不在場證明，同我拍完拖又可以扮到若無其事，兵咗我咁耐原來心底入面係深愛住我，睇住我同曉彤一齊都可以面不改容不聞不問，斷估…佢喺昏迷嘅曉彤前面開口話深愛住我唔係大話嚟掛…
敏：「唔知你呀…懶得理你。」
我：「唔緊要，女神係大晒。」
敏：「對唔住…一日都係我…如果唔係…」
然後我哋兩個都沉默咗，無言，真係唔知可以講乜…不過都慣，曉彤昏迷期間，我哋兩個喺度溫書都可以對住成個鐘一句嘢都無講過。
過咗一陣之後曉彤嘅父母都嚟咗，佢哋首先要去見醫生，結果我同詩敏兩個人喺醫院無無聊聊坐咗兩個幾鐘，對於過兩日就要考數學科嘅我哋，可以話係非常奢侈。
然之後曉彤媽咪一個人嚟搵我。
彤媽：「曉彤都同我哋講咗呢幾個月發生嘅嘢唔記得晒，反而啲醫生就好似見慣不怪，淨係同佢謦咗下欬，做咗啲邏輯測試同精神測試，話身體機能無問題唔影響生活就得…不過佢身體重係好虛弱，最快都要住多三四日先出院，所以數學科都係考唔到㗎喇，佢好擔心自己學業。」
我：「其實…中文考唔到已經無分別…」
又唔係絕對嘅，喺某啲特別情況下主科攞唔到合格成績係有試升呢枝歌仔唱，係要中六retake返個合格成績返嚟，但佢而家咁嘅身體狀況又無溫書去會考可以話，唔使諗。
彤媽：「係呀，我同學校溝通好畀佢下年repeat㗎喇，佢都接受咗，我哋叫佢呢段時間放鬆好好抖下，做自己開心嘅嘢，同啲朋友仔玩多啲…咁同埋，我同老公都謦好咗啲唔好嘅事以後都唔會再喺佢前面提起，佢而家無嘢就好。」
我：「嗯，可能咁樣對佢嚟講係最好。」
彤媽：「咁志華你又有乜打算？」
呢個，可能係我有生以嚟面對過最艱澀尖銳嘅問題，會考我可以交白卷，但呢件事我必須要面對。
我：「伯母，我唔敢話可以補償到曉彤啲乜，又或者可以帶畀佢幸福；但呢件事嘅原因，好大部份都係我一手一腳做成，我唔知曉彤佢心入面重有無我喺度，不過至少我想喺呢段時間好好陪喺佢身邊，帶畀佢歡樂，等佢對未來充滿希望，身體可以變返以前咁健康…如果伯母妳唔介意嘅話。」
彤媽：「點會介意呢，你又唔使咁沉重嘅，後生拍拖有邊個無做錯事吖，而且…我知道阿女都有佢麻煩嘅地方，知道佢男朋友係好似你咁嘅一個男仔，我都算安樂㗎喇；但係，我希望你今次真係好好諗清楚先，唔好令自己後悔，如果唔係你同埋曉彤盞再受多次傷㗎咋。」
我：「喺呢段陪佢嘅日子，我已經諗得好清楚，如果伯母妳肯嘅話，我想同返曉彤一齊。」
我諗從來都唔會有人諗過，竟然有一個中學生，係見完人哋嘅家長之後，先嚟追阿女。
彤媽：「傻嘅，邊到我肯唔肯吖，如果阿女個心係想黐埋去你度嘅，我哋都阻唔到㗎嘛，所以呢樣嘢你問曉彤意見得㗎喇，只要你唔好呃佢…我睇過佢間房㗎喇，同以前都無乜特別，啲安眠藥我已經掉晒，但我諗比較麻煩嘅…係呢一樣嘢。」
佢隻手入面係曉彤部手提電話。
彤媽：「你放心，我唔知佢密碼，就算知都唔會開嚟睇，但如果阿女佢睇返入面啲嘢…」
入面有乜？如無意外會有個初音發聲App，有我同詩敏喺女廁嘅激情片段，有我同曉彤嘅床上照，有我同佢鬧架鬧到天昏地暗嘅message…
我：「我知道密碼，或者我可以改咗佢…」
彤媽：「好呀，咁麻煩你，唔好俾佢撞到。」
估唔到咁順攤。
我：「伯母，我想送部新電話畀曉彤做出院禮物，可唔可以呀？」
彤媽：「當然可以啦，但你要負擔到先好喎，唔好勉強自己；而家都好夜喇，你同阿敏不如走先啦，曉彤佢無事㗎喇，你哋聽朝重要考中文listening，反去溫多陣書啦。」
我：「嗯，唔該伯母，咁我過兩日再嚟探佢啦。」
按道理，曉彤媽咪雖然話無睇過佢封遺書，但曉彤佢寫得咁白一睇就見到詩敏個名啦，唔通自己個女寫嘅都唔望下咩…唔知佢點諗呢…
再諗都無用，唔好話溫書，我而家就連個腦想正常運作都有啲困難；我同詩敏離開咗醫院，搭巴士返屋企，今次我哋兩個坐返上層靠後右手邊嘅坐位。
我：「詩敏…我決定咗，曉彤出院之後…我會…追返佢。」再難講嘅說話，都係要講出嚟。
敏：「重使講嘅，你梗係要追返女朋友返嚟啦。」
我：「嗯…欵…係嘅…」
敏：「你之前跪喺佢面前話如果佢醒返要繼續同佢一齊㗎，講得出就要做得到，如果你無口齒嘅話又點配得上做我睇得上眼嘅男人呢？」
我：「詩敏…」
聽到佢咁講我兩隻眼啲液體又崩堤式脫框而出，詩敏…我同妳明明相愛，經歷過咁多事情，偏偏想愛而不能愛，就算我已經唔再係妳隻兵，而妳又喺我身邊，我都係連掂妳一下嘅勇氣都無…呢種難受，個心絞住絞住咁痛，其實同聽到曉彤為咗自己自殺嘅消息時差唔多痛，點解個天要咁對我，要我令到兩個女人咁難過？
敏：「唔好成日喊啦，傻瓜，邊有男仔好似你成個大喊包咁？」其實佢自己都喺度喊緊。
我：「對唔住…詩敏…」
敏：「唔關你事，只係我自作自受！志華，只要我可以睇到你照顧好你身邊嘅女人，唔再係一個圍住女神轉來轉去嘅傻瓜，我就已經心滿意足。」
我：「放心…我一定會，無論將來變成點，妳永遠都會喺我心入面有一個重要嘅位置…」
詩敏佢撓住咗我隻手，就好似我哋第一日拍拖去海洋公園嗰時咁；我哋嘅眼淚慢慢咁收返乾止住，無論我同佢係乜關係，只要佢喺我身邊就會令我平靜，個心得到安樂。
敏：「曉彤出院你就追佢，即係你而家單身啦。」
我：「妳都…可以咁講嘅…」
敏：「話時話，我好似重爭你一日。」