【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 失憶

我：「曉彤！妳醒喇！」
彤：「嘩！志華，你喺度做乜？」
睇到佢醒咗，兩隻眼仔碌碌咁望住我，我一時把持不住，摙到張作文卷皺晒，我望住佢…自自然然就兩行眼淚流晒出嚟，曉彤佢無事我唔使再驚自己會變成殺人兇手；但一時之間我又唔知講乜好，唔識點樣面對佢…
我：「曉彤…我對妳唔住…」
我不停思考緊，到底佢而家嘅心情會係點，明明係想離開人世，但結果可以醒返，係咪會有好似復活咁嘅感覺？但一起身見返我呢個混蛋，睇怕都唔會好受…
我：「曉彤…妳唔好再諗唔開喇，求下妳，我知錯，我以後都唔會…」
彤：「喂！你黐乜鬼線呀！做乜用個咁恐怖嘅樣對住我！唔好哄咁埋呀！」
我：「妳係咪重嬲緊我？」
彤：「無啦啦我做乜要嬲你？」
吓…無啦啦？佢係原諒咗我？定係點？佢唔記得咗我話同佢分手？唔記得咗自己食安眠藥自殺？定係佢重係病緊搞到溫溫燉燉？於是我舉起隻手摸下佢個頭睇下有無發燒。


彤：「喂！做乜摸我個頭呀！你係咪做兵做到short咗呀？女神唔俾你掂都唔好走嚟搞我吖！話時話…呢度係…醫院？」
我俾佢嘅發言搞到完全唔知點好，本身諗住一醒佢係會好唔開心，或者好嬲，或者會發脾氣，或者會唔出聲收埋自己，但而家睇落…有啲正常？
我：「係呀…呢度係醫院嚟。」
就算唔知道自己點解入院，正常人一望都知嘅。
彤：「點解，我會喺醫院嘅？」
我：「曉彤，我係邊個？」我決定唔答佢問題。
彤：「你咪坐我隔籬個死人志華囉…吖…好頭痛，周身散晒咁…搞乜鬼…」
坐我隔籬？我哋無一齊坐好耐喇喎…
我：「妳…重記唔記得初音妹妹？」
彤：「乜鬼呀？你同我講埋呢啲宅男嘢嚟做乜？」


我：「無呀…想讚妳靚女咋嘛…」
彤：「一起身見到你就唔開胃，點解你會喺度嘅？我做乜會入咗醫院？」
我：「上上下堂妳暈咗…我喺妳隔籬咪陪埋妳過嚟囉。」我決定試一試佢。
彤：「吓…係咪…我溫書溫到攰得滯…喂！唔係喎！你係咪黐線㗎！你咁樣係咪想我俾詩敏嬲死？」
睇嚟…佢真係失憶…返到去未同詩敏反面嗰陣。
我：「唔係呀…佢都有嚟陪妳㗎，妳唔使擔心…」
彤：「咁佢喺邊呀？我掛住佢呀…」
我：「妳掛住佢？咁做乜呢排成日唔同佢食晏？」
彤：「成日食大排檔悶吖嘛，而且又阻住你兩個…吖，我為你好妳重質疑返我轉頭？」
我記得詩敏講過曉彤係聖誕前威脅佢，而曉彤佢第一次變成初音嚟女廁陪我玩就係聖誕聯歡嗰日…如果係咁嘅話…


我：「曉彤，今年想收啲乜聖誕禮物呀？」
彤：「哈，係咪你都知你條嘢上年織得樣衰，想換返條靚仔嘅畀我喇，我唔會客氣㗎喎。」
我：「都好喎…但唔知我織唔織得切呢。」
彤：「唔係下個月先聖誕節咩？」
我：「哈哈…唔知呢…我盡量趕工啦。」
彤：「但係…你唔好再喺班上面咁樣送畀我喇，我驚詩敏佢會唔開心…雖然佢只係當你兵…」
點算，呢下我真係唔知點好，如果照佢所講，佢嘅記憶係返到去上年十一月，即係佢間唔時都有同我哋食飯，重有我同詩敏打完學界，加埋去完班會燒嘢食活動…咁佢所有唔好嘅嘢會唔記得晒，威脅好朋友，變成初音強姦我，同我一齊拍拖…鬧架…到分手，都係無存在過。
我：「曉彤，我叫詩敏嚟探妳，好唔好？」
彤：「咁你重唔快啲！唔想對住你呀！」
我：「咁我出返去走廊打，病房入面唔打得電話，妳喺度抖下先啦…」
其實係我唔可以俾佢聽到我講乜。
我：「喂，詩敏？」
敏：「嗯？打嚟做乜呀，中文考成點？」
我：「唔重要…曉彤，佢啱啱醒返。」
敏：「真係！太好喇！但…佢點呀？嬲完你未？」


我：「詩敏妳聽我講，佢好似唔記得晒近排嘅嘢，返到去上年十一月時咁樣…」
敏：「你講真？」
我：「應該係，佢重話驚妳呷醋…我都唔知點算好，不如妳而家過嚟睇下佢吖。」
敏：「好，我即刻過嚟。」
係喎，佢醒返我應該要同醫生講，不過…同醫生講完就要驗身搞好多虢礫緙嘞嘢，不如我都係等詩敏嚟埋睇下乜情況先，希望佢唔會見到就好似即刻記返起仇人咁啦。
同埋，我都要通知佢媽咪。
我：「伯母，曉彤佢醒返喇。」
彤媽：「係？太…太好喇…唔該晒你陪住佢呀，我而家見緊客，夜少少過嚟搵佢吖。」
我：「但佢失咗憶，呢幾個月嘅事唔記得晒。」
彤媽：「淨係…呢幾個月？」
我：「應該係，以前啲嘢佢都講得出。」
彤媽：「連自己自殺都唔記得？」
我：「係…我同佢講佢上堂無端端暈咗，佢無乜反應然後就信咗我。」
彤媽：「咁係咪一件好事？但你…打算點？」
我：「我暫時…未知，一時之間我都要適應下。」


彤媽：「唔緊要，我夜啲再嚟同你謦吖。」
然後等咗十分鐘到詩敏佢嚟咗，真係快到吖，睇怕佢係自己搭的士嚟，一個永遠唔會搭的士嘅人為咗朋友飛的，呢啲女仔去邊度搵吖。
我：「詩敏，我想…將時間褪返去十一月嗰陣，可唔可以呀？」
敏：「放心啦，我識點做㗎喇，我哋入去先啦。」
入到去，佢哋兩個變返姐妹。
彤：「詩敏！」
敏：「曉彤！妳醒返太好喇！」
一見面詩敏就坐埋上張病床上面攬住曉彤，呢大半年嚟睇住佢兩姐妹由朋友變成冷漠，再變成敵人，但原來…只要曉彤一變返以前咁，詩敏就可以即時配合，我真係不得不佩服佢嘅柔韌；諗落都係嘅，詩敏呢頭做初音妹妹send完message畀我，轉過頭就笑我傻瓜；琴日先同我拍完拖，第二日就叫我唔好咁變態…佢就係一個咁獨特嘅女仔，睇住佢攬住曉彤喊到成面濕晒，我就變到好似呢間病房嘅電燈膽咁。
睇住呢個畫面就好似返到中四，嗰陣真係好開心，兩姐妹好好朋友，我又可以日日抽，無憂無慮咁做個傻兵，間唔中期待一下初音妹妹同自己玩，睇住一鳴同Wing兩個傻更更打打鬧鬧…
彤：「妳呀，自己唔嚟睇我，派隻兵過嚟就算，乜意思呀？」
敏：「咁…啲兵係攞嚟用㗎嘛…」
彤：「呀…妳使唔使喊成咁呀？傻豬。」
我諗佢喊唔止係因為曉彤醒返，而且重係因為可以同佢做返好朋友。
敏：「妳知唔知妳昏迷咗幾耐呀？」
彤：「吓！幾耐呀？」


敏：「我哋考緊會考喇！」
吓！做乜咁樣爆大鑊呀？佢啱啱先唔記得晒啲嘢，女神妳係咪想佢即刻諗返起？
彤：「咁…我點算呀？唔制呀…嗚嗚嗚嗚…」
無錯，病咗對佢嚟講一啲都唔重要，對一個會考生嚟講，去唔到考試係一件好大鑊嘅事嚟。
而我，當然成碌木企喺度望住詩敏，因為實在唔知道佢有乜打算。
彤：「嗚鳴鳴…我好口乾…肚餓…」
敏：「你重企喺度做乜呀？」
詩敏用淩厲嘅眼神望住我，大概係想同我講呢度交畀佢，咁我唯有相信佢啦，而我就出去醫院嘅便利店買葡萄適；讀過Bio嘅都知，身體長期閒置完之後係會非常虛弱，消化能力奇差，係絕對唔可以咁快食嘢，如果俾醫生知道我偷偷買嘢畀佢落肚實鬧死，不過葡萄適啫，其實同吊鹽水分別不大。
其實…曉彤佢係瘦咗好多，無意識下只能靠吊鹽水，用管輕微補水，排泄都要用管幫助…總之睇住佢咁樣係好心痛，無論如何，只要佢醒返就一天光晒，其他嘢實在微不足道。
攞完葡萄適畀佢之後我就出返去，唔阻住佢哋姐妹情深，反正喺呢個時候我只係一隻兵。