【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 我們的珊瑚咖啡室
放學之後我哋如常星期五練波，本來都係佢同個師妹打，而我就同隊友打，突然之間佢拖埋個師妹走過嚟撩我哋打混雙，話release返一個場出嚟畀其他人，個師妹當然不知就裡聽晒師姐話，而我隊友對於可以同妹妹仔一齊打波就顯得興奮異常，唔知會唔會因為咁做就到一場姻緣呢。
當然，對於我哋呢對情侶嚟講，一齊打混雙是多麼自然不過嘅一回事，應該係，除非唔係。
波就打到五點幾，我哋嘅拍拖日當然無咁快完。
敏：「我哋跟住要點？」
我：「點都好，我都要返去沖涼換衫先。」
敏：「哈哈，講到我唔使咁。」
我：「其實妳真係唔使都得㗎。」
講真打完波嘅佢係我見過最正嘅佢，平時要䚎到條裙都穿埋窿先見到嘅大髀，而家就賣大包咁任人觀賞，貼身嘅PE褲只要加少少想像力，其實同底褲都係並無二致，半濕咗嘅PE衫透晒成個Bra汞出嚟，突顯出佢玲瓏浮凸嘅身材，加埋女仔做完運動嘅天然體香…好彩佢唔係打排球或者籃球，如果唔係下面球場一定塞滿晒啲男仔俾人睇蝕晒。
敏：「死變態，我先唔益你呀，一係我除條PE褲出嚟借畀你打飛機嘞。」
我：「我心意已決，追到妳之前都唔會犯錯。」
敏：「就睇下點，一陣喺邊等呀？」
我：「不如我哋去自修室溫書咯。」
敏：「你都真係夠晒追求日常喎。」
我：「係呀，如果日日都係咁就完美。」
敏：「信你呀，你想拖住條女去自修室曬命咋嘛，唔好以為我唔知。」
我：「哈哈，妳咁引人注目，唔到我收埋唔曬㗎喎。」
敏：「講明先呀，如果有熟人我就唔陪你癲㗎。」
我：「放心啦，好似平時咁就得。」
送完佢上樓之後我就沖涼換衫，然後再以九秒九嘅速度洗返乾淨晏晝用過嘅砂煲罌罉，再仆返落去搵佢去自修室。
到我見到佢雙眼就為之一亮。
我：「嘩，我女朋友好靚女呀！」
佢放開咗啲黑長直嘅頭髮，上身係一件忌廉色針織紋嘅入膊背心，出面係一件純白色嘅簿羊毛外套，重睇到膊頭上面嘅透明Bra帶，下身係一條奶茶色嘅過膝裙，但係就有少少開叉見到佢若隱若現嘅大髀。
就係一副好有文化氣息，充滿書卷風情嘅打扮，遠處望到佢已經飄嚟仙氣，抵擋不住嘅文青格調，如果唔係我喺隔籬佢咁嘅款入自修室絕對係兇多吉少，因為搞到全場男仔唔可以專心溫書，實在係太害人不淺。
敏：「信你呀，肯定你係鍾意我hea爆背心短褲踢拖look落嚟多啲。」
我：「點會呢？妳著乜都咁靚㗎！」
敏：「口花花，無鬼用，行啦。」
拖住佢入自修室真係全場人都望住，男嘅固然要開住個自修室雷達隨時昅女，就連女仔都忍唔住要望過嚟，係咪想鬧我襯唔起女神？定係自怨自艾姿色不如人？總之我哋嘅嚟到為自修室增添咗唔少仇恨值，有啲擺到明係一pair嘅條仔都要望過嚟，唔知係嫌命長想早啲投胎定係想激到條女嗌分手好另覓新歡喇。
好在我哋都見唔到熟人，尤其係我最擔心嘅一鳴同阿Wing，話雖我哋兩pair人其實好自然，但我同詩敏只係一日限定地下情侶，實在唔想佢哋有乜誤會。
當然，書都重係要溫，自修室啲枱係間開到一格格，我哋兩個就拍埋兩張凳，拖住手貼住塊隔板咁溫，時不時伸個頭去對方嗰格，我諗…其他人見到我哋咁樣一定扯晒火。
敏：『喂，一陣食乜呀？』佢寫紙仔畀我。
我：『嘻，今次重唔輪到我話事。』
敏：『唓，咁我知你要食乜喇。』
到咗七點幾，我哋放低啲嘢喺自修室，而我…終於可以攞到詩敏嘅第一次喇，就係要佢同我食大家樂，補償返我由開學以嚟嘅忍辱負重。
而我哋都一致同意食西冷牛扒餐，然之後我就去買飛，捧餐，再小心翼翼放個餐喺對面位淋汁，因為好驚啲油彈到我女朋友。
敏：「食餐大家樂啫，你個樣使唔使咁感動。」
我：「妳唔明㗎喇，同妳食大家樂係我心願之一。」呢件事明明係佢搞出嚟…
敏：「知喇，成個細路仔咁，你食開好嘢大家樂對你嚟講好普通啫。」
我：「唔係呀，呢度真係平靚正，淨係個酥皮湯，好多高級餐廳都無得飲。」
敏：「嘻嘻，咁使唔使以後拍拖都餐餐大家樂。」
詩敏真係講笑咁講，以後餐餐大家樂，就算部計數機再聽話一年畀我抽中三日食足一日三餐都係九餐啫，但佢咁樣講出嚟我個心又真係好鬼甜…正當佢鋸開一條扒想喂我食嘅時候突然縮返埋隻手再塞落自己個口度；呀，呢個女朋友真係夠晒百厭…
敏：「喂！喂喂…」
我feel到有啲唔妥，於是擰去後面一望，oh…係我嘅大家樂常年飯腳。
鳴：「我無眼花呀？你兩個喺度拍緊拖？」
敏：「你話乜咪乜囉，等個傻仔開心下都好。」
鳴：「唔係喎，妳平時都唔食大家樂㗎，無端端突然轉死性，應該有啲嘢喎。」
敏：「夜晚周度都差唔多價錢，是但啦。」
我：「喂呀…難得女神同我食一餐大家樂，拜託你唔好搞事啦。」
鳴：「嗯，反正唔關我事，買嘢食先。」
敏：「喂，佢成日嚟呢度㗎？」
我：「係㗎，咪同我差唔多咁囉，如果屋企人去旅行公幹嘅話，可以晚晚都嚟㗎…」
敏：「咁危險你重要嚟呢度食？」
我：「近吖嘛，都係一陣啫，佢唔會做啲乜嘅。」
敏：「阻住我同男朋友拍拖吖嘛！」
原來詩敏佢係咁珍惜同我一齊嘅時間。
我：「嘩，搞乜鬼呀？生炒骨客飯，唔似你喎…」
鳴：「睇到你兩個喺度鋸扒，我都唔好意思一齊啦…」
我：「你自己一個人？」
鳴：「係咪廢話呀？本身想打畀你問你落唔落嚟陪下我，而家可以慳返。」
我：「我哋兩個見橫掂一齊打完波，順便去溫書咋。」
鳴：「唔知你哋呀，你哋開心就好啦。」
我：「做乜呀？你唔開心咩？」
鳴：「普通啦，啱啱俾人鬧完。」
敏：「女人又發脾氣呀？」
鳴：「我都唔知乜先叫發脾氣，總之佢嬲我唔接佢補習放學囉。」
我：「咁你做乜唔接佢呀？」
詩敏聽到我咁問噗哧笑咗出嚟。
鳴：「本身接㗎，我問佢係咪一齊食飯，佢又話佢屋企留咗飯，咁我咪話下次再接囉…一來一回我唔見個幾鐘，分分鐘飯都趕唔切食。」
我：「咁佢鬧你你咪即刻仆返過去囉。」
鳴：「唔係㗎，鬧完我佢就叫我唔好嚟，唔好嘥時間，話唔想見到我。」
我：「咁點算好呀？」
鳴：「咪一個人落嚟食飯，睇你兩個放閃囉。」
敏：「人哋都唔係想同你食飯，可能想同你打茄輪咋嘛。」嘩，乜女神啲發言咁爆炸呀。
鳴：「都可能係嘅…但而家已經…」
敏：「如果我住屯門，你住將軍澳，接我放學有得打茄輪，你嚟唔嚟接呀？」
我：「當然即刻嚟啦！」
敏：「咁如果要你日日都係咁呢？」
我：「呢個，好難諗喎…我可能會無晒啲時間溫書，如果隔日得唔得呀？」
鳴：「點同喎，你係兵嚟㗎，自願㗎。」
敏：「你做人男朋友好唔自願咩？」
鳴：「咁又唔係…」
敏：「兵又好，男朋友又好，女仔都係想俾人惜啫。」
鳴：「係嘅，但鬧緊架我都無嘢做到。」
我：「成日鬧架你哋唔厭㗎咩？」
鳴：「你當兵當咁耐你唔厭㗎咩？」
我：「還好吧，好過無兵當嗰陣。」
敏：「情侶又好，朋友又好，如果會厭嘅話，咁應該好好諗下其實係咪大家真係適合。」
鳴：「唔適合嘅話又可以點喎…」
敏：「呢個問題太長遠，你哋自己諗。」
鳴：「諗過啦，但真係唔捨得吖嘛。」
敏：「佢而家放學未呀？」
鳴：「差唔多喇，重有幾分鐘。」
敏：「我係你就扒埋啖飯飛的去佢樓下截佢喇，你哋啲有錢仔，該使嘅時候就走嚟慳。」
鳴：「截完佢…又點呀？」
敏：「打個茄輪然後走人囉，唔係可以點？」
鳴：「值得咩？」
敏：「值唔值得你問阿Wing，唔好問我。」
鳴：「佢係咪真係受㗎？」
敏：「如果唔受嘅話都可以分手㗎喇…唔受就我請你食餐大家樂賠罪啦。」
鳴：「真係？咁睇嚟我應該聽妳話。」
敏：「信我啦，女神唔呃人嘅。」
鳴：「多謝妳指點迷津！」
敏：「又或者你去到佢樓下會見到有個靚仔拖住Wing隻手送佢返屋企呢。」
鳴：「唔係掛…搞到我即刻想過去喇。」
敏：「其實你做乜唔同佢一齊補習啫？」
鳴：「日頭已經返學，放咗學重要返學，好痛苦啫，呢條友都無去補啦。」
我：「如果女神去補我咪補囉。」
敏：「咁你可以慳返，我真係無呢啲多餘錢。」
我：「嗯，讀書最後都係靠自己嘅啫。」
鳴：「喂，咁我行先喇，唔阻你兩個，志華幫我食埋嗰兩舊生炒骨啦。」
牛扒配生炒骨，多麼奇妙嘅組合。
敏：「哈，原來你真係會食㗎？」
我：「嗯，如果無人食隻豬仔就死得太慘。」
敏：「估唔到你咁有衣食㗎喎。」
我：「係呀，屋企人教得我最多嘅嘢就係唔好食剩嘢同埋點樣揸筷子。」
敏：「你屋企都真係幾得意。」
我：「係呢，一鳴佢真係可以氹得返阿Wing？」
敏：「係，實得，除非Wing佢真係拖住第二個。」
我：「咁就好，其實妳睇唔睇好佢哋㗎？」
敏：「唔喎，佢哋都唔夾嘅。」
我：「咁我同妳夾唔夾呀？」
敏：「先拍咗兩日拖，點知喎。」
我：「不如妳都教下我點追女仔啦。」
唔會好過份掛？叫一日限定女朋友教我點追平時唔係女朋友嘅女神，個邏輯有啲怪但應該都行得通，無論佢係乜身份，我都相信佢係真心對我。
敏：「我唔識教你喎。」
我：「妳係認真？」
敏：「鬼叫你咁麻煩係都要追女神。」
我：「但係…我想日日都好似今日咁開心吖嘛。」
敏：「咁我都想，但係…可能我都唔知自己想點。」
睇嚟佢唔係隨口噏敷衍我，而係認真咁同我講嘅，見到佢一面凝重望住塊牛扒嚟切，應該係思考過都係唔知道自己想點；係嘅，由中三last day開始到而家咁長時間，佢又點會無諗過我哋嘅關係應該點，今次係佢第一次同我講佢嘅諗法，可惜呢個並唔係答案。
敏：「難得使走咗條麻煩友，我可以喂你食嘢喇。」話風一轉佢就拮咗塊扒過嚟。
我：「呀喑…原來…呢個係妳嘅詭計…」
敏：「食你就食啦，你重要幫我食埋啲意粉呀，我食唔到咁多㗎。」
然後就用叉捲咗一大揸意粉塞落我個口度…
食完飯之後我哋返去自修室溫書，夜晚越嚟越少人，我哋兩個索性迫埋喺同一格溫書，旁若無人咁身貼住身，兩隻手互撓再十指緊扣…信我，我哋兩個真係乖學生有專心溫書。
一直到十點鐘閂門我哋先離開自修室，佢無即刻返屋企，而係同我喺條街度漫無目的咁遊離浪蕩；當然最後都係蕩返去佢樓下，但死都唔肯上去住坐咗喺佢樓下花園嘅凳度，相信我同佢都好唔捨得呢一日嘅完結。