【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 第一次拍拖
鳴：「喂，Miss Lam同你講乜呀？」
我：「佢叫我陪下你咋嘛。」
鳴：「係鬼，肯定係叫你昅住我等我無得早走。」
我：「唔係吖，Miss Lam佢都幾好人呀。」
一個會叫學生努力溝女嘅Miss，呢刻嘅我已經俾佢迷到暈下暈下。
鳴：「唔信，佢係賤女人！全部女人都係賤女人！」佢走火入魔，但我都唔敢糾正佢住。
我哋都唔急住走，所以抄到六點二校工過嚟閂門先走人。
我：「唔好咁灰啦，都抄咗一半，星期六日再抄啲咪有貨交囉，小學都抄慣㗎啦。」
我一路安慰佢，諗住同佢一齊行返屋企，呢個時候雨天操場有個女仔行緊過嚟，雙眼通紅，望到一鳴實一實。
我：「啊，我漏咗書喺locker，唔阻你哋。」
我跑咗上一樓挨住欄桿，望住一對痴男怨女慢步離開學校，個女仔用右手撓住男仔左手實一實，左手就一路行一路揼佢手臂同心口，真係猖狂到吖，喺學校門口做埋啲咁嘅動作簡直係影響校譽，有傷風化，美化市容。
我諗，Miss Lam要做嘅嘢總有佢道理。
返到屋企，我開始要諗自己嘅嘢，同詩敏拍拖去邊好呢？廸士尼先開咗無幾耐，又貴又細又少嘢玩俾人鬧到飛起；海洋公園？正常香港人都去到厭，我都去過十次以上，同一鳴兩條友都去咗兩次…不過，以詩敏咁慳應該唔會去厭掛？
上網睇下而家幾錢，有乜玩先…十月，咦？係喎，廣告都有賣，係哈佬喂啊！我都未去過，睇下點玩法嘅先。
睇完一大輪真係頭暈咁滯，唔同日子唔同門票都分五六種，不過一分錢一分貨係真嘅，想玩足全日就要揀全日祭，而想玩晒所有鬼屋就要買premium飛，原來都幾貴，要成四百蚊重要學生無折，廿餐飯價錢咁滯如果係佢一定唔捨得。
再睇下日期，全日祭通常係星期五六日…如果月尾撞正萬聖節正日一定勁多人。
我驚打電話會騷擾到佢，所以都係message。
我：『詩敏，妳後日得閒嗎？』
敏：『咁快諗好嗱？可以呀。但係你唔好諗住得一日就要我晨咁早起身陪你呀！』
我：『放心，我點會咁對女朋友噃，中午出門口就得㗎喇。』
敏：『好啦，咁後日十二點半等你嚟接我啦，男朋友仔。』
男朋友仔…男朋友仔…男朋友仔?男朋友仔！
我開心到跳咗上床攬住張被轆下轆下，雖然要到後日先係拍拖日，但佢竟然提早叫我男朋友，真係開心死！我好期待呀！
唔係，冷靜啲先，我重有好多嘢要準備，首先要諗個藉口問阿媽借信用卡買定飛，如果唔係到時額滿就大鑊，跟住要諗食啲乜，平時餐餐都係我跟佢食，今次終於可以請返佢一次，重有嗰日著乜好呢？我諗好似平時咁就得，至少我唔會學一鳴咁gel個死人MK仔頭。
睇完OR發覺海洋公園入面啲餐廳又貴又唔好味重要食唔飽人，所以又要慢慢諗過，好緊張呀，點算好，結果有個傻仔一整日喺自己間房入面轉來轉去。
食真係一樣好麻煩嘅事，如果係我同一鳴去嘅話，可能問我哋爸媽就會有Conrad或者Mariott嘅buffet voucher，唔知點解佢哋成日會有呢啲嘢…錢都係次要，感覺同女仔食buffet唔多自在，佢哋又食得唔多嘢，一陣去到食碗四寶河就算數就真係嘥料；左睇右睇其實金鐘唔係好多嘢食，無理由去到咁遠食我鍾意嘅大家樂㗎…如果去啲貴啲嘅餐廳又唔知佢會諗埋啲乜，雖然佢講過話嗰日任我使錢喺佢身上，呀！好煩呀！
經過無數咁多個小時嘅煎熬，終於到咗嗰日嘅中午，緊張嘅我帶住不安嘅心情十二點就喺佢樓下等佢…
敏：「等咗好耐喇？男朋友。」
我：「唔係呀，女朋友。」
點解…呢種感覺好奇怪，明明我哋日日由朝對到晚，但當去到真係要拍拖嘅時候，係會有一種陌生感唔知點咁。
今日詩敏嘅衣著係一件白色T，窄身嘅，好顯身材，有啲短，同褲之間會露出啲咁多肉，尤其係舉高手整頭髮嘅時候，下身係貼pat嘅牛仔熱褲，啱啱遮得晒個屁股，唔會太過份去到條底褲攝返出嚟嗰種，加對白色波鞋，頭髮就好似平時咁紥條清爽嘅馬尾，個嘴有少少反光，我諗係lip gloss嚟掛；就如我所料佢嘅衣著係好普通，但正正係咁先突出到佢嘅青春同個人魅力。
敏：「小妹第一次拍拖，多多指教。」
原來，佢真係未拍過拖，今日終於親口確認。
我：「多多指教，我都係…」
敏：「點呀？我哋今日去邊呀？」
我：「一陣妳咪知…拍拖，係咪要拖手㗎？」
敏：「唔準咁急呀…先第一日…」
我：「咁好啦，跟我行啦。」
我心諗前日幫妳拉筋都掂過妳隻手啦，都唔急於一時，都好…唔使諗點拖先比較適合。
敏：「咁快就拖住我，我驚你今晚就將我中出即飛呀。」
我都係小心啲好，就算係女朋友，女神身份不變。
雖然佢唔俾我拖，但就用手捉住我手臂行，行咗一陣就到巴士站，由於要過海，我驚佢八達通唔夠錢，我甚至帶定多一張八達通…
上到巴士，我好自然咁送咗佢去上層較後嘅一個位置坐，佢坐右窗口我坐通道，就同上堂時嘅情況差唔多，不過我哋而家貼得更加埋。
其實我同佢唔係第一次搭巴士坐隔籬，以前去打比賽前後都試過，但而家嘅心情係唔同啲；因為唔使再特別縮開隻手怕掂到佢啲肉，同埋一大對白滑嫩大髀放喺我眼前…好難唔望…其實佢打完波嗰陣都係！
敏：「肯話畀我聽去邊未啫？」
佢用膊頭撞咗我一下問我。
我：「賣妳去舊金山做妹仔好唔好？」
敏：「都話你係衰人嚟㗎啦，好彩得一日。」
之後佢嘅手臂就貼到我實一實無分開過…
平時，我可以乜都同佢講一餐，呢一刻，我竟然語塞唔知點樣同佢打開話題。
敏：「不如我哋聽下歌吖。」
佢打開咗部電話，插咗條耳筒線入去，再塞咗其中一邊耳塞入我隻右耳度；佢個playlist乜歌都有，有新有舊，其中有一首令我有印像嘅係一位女仔唱嘅歌。
「愛情常向窗邊低訴 恨他不知道
但願今夕在情人夢裡 寫下癡心記號
窗外天空每朵白雲 滿寫醉人曲譜
夜空星星向月兒說 甜蜜是這戀愛預告」
坐到金鐘落車，最後我都係決定帶佢去太古廣場一間標準企理嘅西餐廳食晏，都唔算太貴嘅，點為之唔太貴？Under二百一個set lunch囉…