無啦啦有三條女同左我一齊住: 51

「嘩！係雪呀！！！」

去到第二日，已經係12月24號

checkout左之後既我地，搭電車去到仙台


比起白石，仙台既繁華程度都叫係貼近返東京

周圍都叫有高樓大廈，車站又人來人往






阿純一到車站就已經話要食樣叫「凍天」既野

好彩，我地幾個好快就搵到間鋪頭


呢個「凍天」雖然外面好脆口，但裏面都幾鬆軟

果然食野跟阿純既話實無死






我睇一睇阿純果個page，基本上黎到日本之後日日都出幾個post

followers仲加左幾百個，勁



「chantal，今日既行程係點呀？」larry問







chantal似乎都睇到熟哂

「我地今日都仲會響仙台市中心玩，會去政宗像、青葉城同埋青葉商店街」



可能因為今日係平安夜，仙台既街道都開始裝哂啲燈飾

唔知，chantal鐘唔鐘意呢？


去到睇政宗像果陣，larry似乎無乜太大興趣，所以都係周圍hea下算





而我就都有玩下戰國basara同戰國無雙，所以都叫識伊達政宗（當然佢都唔係真係識講英文）



而椰奶又好似真係對歷史幾有興趣，周圍去睇啲字寫乜


「丫你個椰奶，又識日文架咩？」


「下唔識架.但有興趣囉」

椰奶道：「細個都玩過戰國basara架啦」







「呢啲game你都有玩？你女仔黎架喎..」


「發瘟，女仔唔打得機咩，你racist呀？」

椰奶氣道


「我都有玩喎」

chantal都加把口：「細個去表哥屋企有玩架，所以先識伊達政宗之嘛！」


「...我都有玩」阿純又搭嘴





「嗱chantal同阿純都有玩架！」

真係估唔到chantal都有玩呢啲打打殺殺既game




下晝果陣我地五個去返仙台站果邊食牛舌


「唔該加飯..」

呢間餐廳都係加飯唔駛錢，阿純已經食緊第三碗飯






「想問你好耐架啦阿純，點解你咁『拆』得既？」larry問



發覺larry講野真係會自動冷場

「...由細到大都係咁架，小學已經食碗半飯...」



食完飯我地幾個響青葉通一番街度行下

「掛住去旅行，原來今日都已經係平安夜啦」chantal有啲感嘆咁講


「仲好啦，響日本過聖誕咪仲有feel！」larry答



椰奶將我拉埋一邊

「今日平安夜，自己醒水啦」


「吓醒咩水..」


「嘩救命，你識唔識架...」

椰奶反哂白眼咁

「呢啲日子，緊係表白啦！」


「下咁急...！」



「你睇下，larry都開始對chantal瘋狂進攻啦」

椰奶響我耳邊講：「你依家唔出手，即係話比chantal聽你對佢冇興」

「尋日larry特登提起你同阿梅愛雯村單野，就係想chantal以為你對佢冇興囉，明唔明呀」



講咁多，又唔講點做咪即係哂氣

「咁我應該點做先...」



「今晚表白」

椰奶個樣胸有成竹咁：「放心啦，我會幫你製造機會」


「你...?」



「總之你依家多d聊chantal，唔好比larry霸住」

「比d勇氣，厚d面皮啦」


「哦...」


聽住椰奶講，我即刻衝上前

「chantal，你今晚想食咩呀？」



呢一舉成功將chantal既注意力拉過黎

「嗯等我諗下先...不如食壽司丫，我黎左幾日都冇食過呀」



「嗯...我知仙台有間叫仙令鮨既都出名架...」

阿純好似所有關野食事既野都記哂入腦咁


「嗱有機啦」

椰奶再偷偷提我：「今晚平安夜，食完壽司又點會咁早返去，到時我拉走阿純」



「但larry我真係無計，你落藥又好打暈佢又好...」

椰奶軍師上身咁：「總之，我都幾肯定larry今晚都會表白」



「屌咩...咁你即係攬返個波比我姐...」