無啦啦有三條女同左我一齊住: 11

呢一堂係physics堂，week1其實都係聽佢講下黎緊有幾多份assignment、mid term test佔幾多分、同埋review返以前中學啲野，十一點半就輕鬆落堂

估唔到，大學既堂比起我想像中仲要輕鬆



「唉終於落堂...」

肥成道：「喂依家都11點幾，食埋飯先啦」






「嗯，好呀...」

我諗椰奶應該都會同啲女仔一齊食掛...


我地三個出左lecture room之後

「喂hello肥成！」





「咦乜咁早呀阿琨！」


肥成同阿琨佢地兩個已經係咁撞到熟人

當中有男有女


「你..你地識佢地架？」我問






「hallmate黎既....搬左入hall之後就識到架啦」

睇住肥成個得戚樣，就想打柒佢：「點呀新地，係咪好酸呢！」



「酸你老母....咦？」



響賽馬會綜藝館出面，有個好熟悉既身影企響度...

靚到令人目定口呆，加上一頭啡色短髮






「係...chantal？」



「嘩條女正喎..」肥成已經流哂口水


睇chantal既姿勢，我估佢係等緊人

我應唔應該去say個hi好呢？








「喂chantal！唔好意思呀要你等tim！」


吓？



我望一望過去


「唔係呀，我都係啱啱到之嘛」


佢...約左椰奶！？





佢地兩個...已經去到咁熟架啦？


我一路都只係以為佢地響中o果個group度有交流咋喎....


不過女仔既野好難講既....


我繼續跟住肥成同阿琨行之際，突然比人拉住

「喂！新地！企響度！」


我回頭一望，的確係椰奶同埋佢隔黎既chantal





「下？咩...咩事呀....」


「hel...hello呀..新地」

chantal...原來記得我！



「呃，hello呀chantal...」

我再問椰奶：「咩..咩事呀？做乜拉住我既？」



「你果次差我一餐飯喎，襯今日chantal響度，就今日請啦！」





仆街，原來只係為左叫我請客

「嘩你咁都得既？」


「咩唔得呀，無我你食左屎啦！」




chantal有點難為情，拉住椰奶

「椰奶，咁樣好似唔係幾好喎...」


「邊會喎！」

椰奶又拉住我：「難得今日新地請，今日食豪啲！」



仆街，無啦啦屈我請食飯都有既



不過，椰奶同chantal既出現，令我可以銼一銼肥成同阿琨既銳氣

我特登回頭，對住兩人冷笑


睇住佢地驚訝又羨慕既眼神，我真係心都涼哂



但我無諗到，之後輪到我個荷包涼哂！



叉一城某一意大利餐廳

「唔該，要一個辣肉腸薄餅、一個肉醬意粉、一個卡邦尼意粉、龍蝦意大粉雲吞一set」


聽到椰奶好似開turbo咁點菜，我忍唔住叫

「喂喂喂喂，駛唔駛咁多呀！」


「我實食得哂既！反正都係你比錢之嘛！」


「餐湯想飲咩？」


「三客龍蝦湯丫！飲品同甜品一陣再叫丫唔該哂！」

「多謝」


聽到椰奶點左咁多野，唔單及我個荷包

連我個心都好撚痛呀...



「椰奶呀...點解你要逼新地請食飯架...」

幸好，chantal似乎都仲對我感到同情


「果陣佢同我一樣無hall住，我咪推介佢去我家姐做野果間暗hall度住囉」



「暗hall？」


「係一間平價既青年旅舍黎既」

椰奶為chantal解釋：「一個月都係1600蚊」


「嘩咁平？！」的確，呢個價我第一次聽到都嚇親



「話就話平，其實環境果啲就真係麻麻...」


「唔好住丫笨！日日屯門蝴蝶同紅磡來回囉！」椰奶反駁