只有做愛的時候我才聽得見聲音: （71）

Alex唔想晴晴用新藥，覺得博唔過，晴晴就想賭一鋪，雙方就各持己見，結果討論左好耐，最後先達成共識。

「醫生啱先話會對現時你嘅治療方法作調整，可能調整完你嘅病會有改善，其實唔係一定要試新藥架？」

「化療同電療我已經做左幾個月，而情況都無好過，仲一直惡化，依家難得有個新希望，我好想試下。」

「呢個我明，但我驚…驚…」

「Alex，我知你擔心隻新藥唔穩陣，但條命係我自己嘅，我希望你放手俾我為自己揀一次，我想你尊重同支持我嘅決定。」晴晴望住Alex講。



Alex深深歎一口氣，無作反駁，心諗晴晴講得有道理，自己條命應該由自己話事。

「我地應該往好嘅方面諗，你諗下啲科學家研發一隻藥，肯定經過好多計算同好多研究，出嚟嘅成品點會咁容易整得死人？所以唔好自己嚇自己，隻藥一定醫得返好我嘅。」晴晴對隻藥有信心。

Alex沉默左一陣，反復思量後話：「好啦，既然你想試隻新藥，咁我尊重你嘅選擇。」

「哈哈，多謝你支持我嘅決定，同埋都唔好苦埋口面啦，你快笑下啦，依家我有機會好快就好得返，我地應該開心先係。」晴晴笑笑口話。

Alex擠出笑容，心裡希望隻新藥能夠治愈晴晴個病。



兩日後，晴晴簽署接受新藥試驗計劃嘅同意書，表示自己得知亦願意承擔一切風險。

然後晴晴被送到手術室。

呢隻新藥唔係就咁食落口，而係注射到體內，而且每支針都要分時段注射。

醫生、護士會要計住每支針幾時打，假如注射時間錯左，或者打針次序亂左，都會令病人有生命危險。

佢地亦要一路留意住晴晴注射完每支針嘅情況，假設出現異樣就會即刻停止注射。



至於Alex依家就咩都做唔到，只能喺病房出面等。

焦慮不安嘅佢，盡量往好嘅方面諗，祈求隻藥真係幫得到晴晴。

時間過左一個半鐘，醫生都仲未出嚟。

Alex坐喺長凳上，等等下唔覺意訓著左。

之後又左一個半鐘。

「Alex，醒下啦~」

Alex聽到有把女人聲喺度叫佢，隨即就從睡夢中醒來。然而睜開眼一刻，見到嘅唔係晴晴，而係醫生同護士。

「醫生，晴晴佢點呀？」佢問。



「病人佢……」
 
※ ※ ※

烏雲密佈，天色陰陰沉沉。

天空飄落著雨水，潤澤路邊樹木同野草。

春天嘅天氣多雨又潮濕，Alex討厭呢種天氣。

佢一隻手擔緊遮，另一隻手拎住白花，正前往上山拜祭。