只有做愛的時候我才聽得見聲音: （66）

呢一晚，Alex輾轉反側，完全訓唔著。

佢嘅心情嘅沉重又好緊張，一直諗緊同晴晴見面時，到時應該講啲咩好。

佢喺度諗，係咪要準備定一啲安慰嘅說話比較好？

但平時自己好少安慰人，要安慰好似唔識講咩啲好。

於是佢打開電話google一下，記低幾句安慰嘅句子，準備到時講。



例如係「希望在明天，你一定無事嘅，會捱得過去嘅」、「你要堅強，捱過呢一關，上帝一定會幫你…」等類似呢類鼓勵開解嘅說話。

佢知道晴晴依家內心一定好哀傷、好絕望，佢希望藉呢啲說話能消除對方內心嘅不安感。

趁天仲未光，佢拿拿臨再記多幾句。

到左第二日下晝，何管家就車佢到醫院。

佢已經記熟嗰啲安慰嘅說話，心入面亦都模擬左一次行入病房嘅情景。



就係佢會拎住果籃，行入病房，好自然咁放低果籃，然後同對方講一句hello。

點知佢一行入病房嗰下，見到晴晴訓喺病床，個心即刻跳得好快，而同一時候，望見對方憔悴不堪嘅樣，個心又好痛。

咁啱仲撞見晴晴喺度搣手上張支票，呢幾樣嘢加埋令佢思緒一下子變得混亂。

本來想講hello，結果就衝口而出講左：「有錢都唔要，唔似你喎。」

講完嗰下佢已經即刻想收返，見面第一句講啲咁嘅嘢，感覺好奇怪。



晴晴見到佢出現，成個人當堂呆左，塊面仲紅到好似蘋果咁。

Alex拎住果籃，慢慢行到病床前：「Hello…」

晴晴第一時間用張被冚住自己，佢唔想俾Alex見到自己一副咁殘嘅樣：「點解…點解你喺度嘅？」

「我特登嚟探你。」Alex放低果籃話。

「但係你，你點知我喺度架？」隔左張被，加上隔離部喇叭仲播緊Pink Floyd，晴晴嘅聲音就顯得有啲細聲。

「係佳瑩話聽我聽。」

「咁你嚟呢度做咩呀？」

「講左啦，都話嚟探你呀嘛，咁你做咩拎張被遮住自己，係咪唔想見到我…？」



晴晴即刻放返少少張被落嚟，遮住半邊面答：「唔係…只不過我無諗到你突然會嚟探我。」

Alex坐到床邊，輕輕拉低返另外半邊被，想認真望清楚眼前呢個女人。

昔日臉上總帶著活力嘅晴晴，如今變得虛弱蒼白，塊面瘦到兩邊「𨋢」曬入去。

Alex越望就感到覺得心痛。

晴晴見對方咁樣近距離注視自己，個心跳得好快，快到好似就嚟想跳出嚟咁滯。

二人對望大約幾秒後，晴晴臉帶羞澀咁擰返轉面，順手熄一熄部喇叭。

Alex見晴晴啱先聽緊Pink Floyd，於是問：「你依家都開始聽Pink Floyd呀？」



「係呀，間唔中聽下都覺得幾好聽。」

「哈，好聽就聽多啲啦。」

「係啦，你做咩無端端咁得閒過嚟，乜唔洗陪Priscilla咩？」晴晴問。

Alex搖一搖頭：「唔洗呀，佢走左啦，唔會再返嚟。」

「哦~~~咁豆豆佢點呀，你有無好好對佢呀？」

「有呀，依家肥肥白白，好活潑呀。」

Alex答完，然後望住晴晴問：「咁你呢？你點呀？」。
 
「我…我OK呀…無事呀…」晴晴眼簾低垂，臉上流露哀傷之色。



「唔洗扮無嘢，佳瑩乜都講曬俾我聽。放心啦，你一定無事嘅，正所謂希望在明天，只要樂觀啲面對，你實會捱得過呢關。」

Alex將準備好嘅安慰句子對晴晴講出，而晴晴聽見，莫名地「嘻」一聲笑出嚟。

「嗯？」Alex搲搲頭，心諗自己係咪講錯咩嘢，搞到對方喺度笑。

「哈，點解你講啲嘢咁似細個我喺學校圖書館，借嘅嗰啲《開解別人一百說話》、《如何安慰人》嘅書入面講嘅嘢，令我諗返起以前成日，摘書入面啲老土句子出嚟安慰我阿媽，估唔到今日竟然從你把口聽返，發覺原來都真係幾老土，哈哈！」晴晴展露笑顏。

「呢啲安慰人嘅說話邊有分老土唔老土架？」

「哈，老唔老土都好啦，好多謝你安慰我，其實我都唔知自己點架，都係睇上天點安排，可能好快好得返未定，又有可能聽日就瓜左又未定。」晴晴笑容變得苦澀。

「無事嘅，我對耳仔咁樣都好得返，我相信你都一定好得返，同埋嗰啲醫藥費你唔洗擔心，我會幫你俾，你可以安心喺度醫病。」



「你幫我俾？你咁大筆錢借我，我驚到時我還唔到，而且我地『冇啦冇掕』，你無必要借咁多錢幫我。」

「錢可以慢慢還，我唔介意你欠我一世，最緊要係你無事。」Alex伸手放喺晴晴一隻手上，眼神中帶著憐惜與愛意。

晴晴見對方咁樣掂自己隻手，塊面變得比頭先更加紅，心跳又再加速。

佢喺對方身上感受到之前從未有過嘅感覺。

係一種心意相通嘅感覺。