只有做愛的時候我才聽得見聲音: （61）

朝早十一點幾，Priscilla終於訓醒覺。

佢刷完牙行落客廳，見到Alex撩緊豆豆玩：「Alex BB，做咩喺度偷懶唔練歌呀？」

「我有練呀，見練到攰先出嚟陪貓仔玩一陣。」

「咁我叫你改嘅嗰段結他solo，你改左未？」

「改左啦，陣間排練彈俾你聽。」Alex回答。



正如上面所講，Priscilla同Alex一樣，唔憂柴唔憂米，得閒先返下工。平日啲時間大部分都係去shopping、high tea、做facial諸如此類，另外當然唔少得就係夾band唱歌。

除左平時會去酒吧出show之外，佢不時都會幫隊band報一啲音樂比賽。

早排佢就幫隊band就join左一個樂隊原創歌曲比賽。

本身Priscilla個前度男友係樂隊嘅結他手，但家下佢地散左，咁就由現任男友Alex補上。

Alex對呢啲比賽一直都唔係好感興趣，佢認為音樂唔係體育競技，好難分到高低，玩呢啲比賽都係志在參與。



因此只係佢抱住玩玩下嘅心態參加，相反Priscilla就十分好勝，一心要贏冠軍。

二人為此而產生左一啲分歧。

「停一停，停一停。」

排練到一半，Priscilla嗌停，其他樂手隨即停止彈奏。

「我覺得啱先個位我應該要再高音少少，Alex你陣間試下再升高一個Key。」



「再高一個Key？成首歌個key已經好高，再高就唔好聽。」Alex答話。

「點會唔好聽，高音啲先show得到唱功勁架嘛，同埋我覺得編曲可以再複雜一啲，不如試下喺拍子上再做啲變化？仲有係，Alex你個結他solo都係太簡單啦，最好再彈得花巧啲。」

「但係首歌中間已經四拍轉七拍，再任意亂咁轉拍子，感覺好似有啲怪，同埋我地結他、鼓同bass都加左好多techniques嘢，再加就會多左，首歌會變得好難聽。」

Alex唔鐘意呢首歌，佢覺得成個歌淨係得show off，一啲都唔好聽。

「梗係玩得難啲，show off位多啲，咁先顯示到我地勁過其他band架嘛。」Priscilla反駁話。

「比賽呢啲都係志在參與，最緊要係享受過程啫，如果為左show off，令到首歌變得唔好聽，咁我作為結他手，都好難彈落去。」

「錯啦，參加得比賽就梗係要贏，要證明係叻過其他人，咁先威到俾人睇。」Priscilla話。

「但玩音樂本身都就唔應該同人比較，最緊要係玩到自己鐘意嘅嘢，就算係比賽，只要上到台玩得開心，彈得過癮就得架啦，勝負其實唔重要架。」Alex回應話。



「平時出show就無所謂，但比賽就一定要贏，同埋你彈得犀利過人，唱得好過人，嗰種優越感都會令你開心架！」Priscilla繼續反駁。

Alex唔認同對方呢種講法，玩音樂嘅快樂係嚟自音樂本身，並唔係由同人比較而獲得。

只不過，雖然佢係唔認同，但都無反駁落去，怕拗拗下會演變成鬧交。

佢費事同對方嘈，免得傷感情，加上其他樂隊成員都無意見，唯有就聽對方提議嘅，將一首四分鐘嘅歌改到有咁複雜得咁複雜。

彈嗰過程中，佢一啲都唔享受，因為首歌真係唔好聽，高音為唱而唱，technique位為加而加，毫無意思。
 
到左夜晚，Priscilla排練左大半日話好攰，想早啲訓養聲，連晚餐都未食就上房訓教。

佢一時夜訓一時早訓嘅習慣，令Alex難以捉摸。



Priscilla臨訓前，再三叮囑Alex食完飯後要加緊練習，要練到最好為止。

夜晚九點幾。

Alex食飽飯就到書房練習，但係佢無練隊band嘅參賽歌，而係拎起結他彈自己想彈嘅歌。

手指輕撥弦線，嘴巴低聲哼出旋律同歌詞，彈奏《Wish you were here》。

「我覺得好聽呀，彈得好好~」

彈到最後一粒音，耳邊突然聽到晴晴把聲，佢抬頭一望，發覺身邊卻空無一人。

原來只係幻覺…

此刻嘅佢腦中不禁浮現，昔日晴晴每日坐喺側邊陪住佢練習，幫佢計時嘅情景，諗返起嗰陣時無論自己彈成點，對方都會讚好，仲有回想起當佢感到挫敗時，對方鼓勵佢嘅說話。



想起嗰啲往日時光，佢嘴覺不自覺上揚，由心而發露出笑容。

當回過神來，望住如今空空如也嘅位置，臉上笑容消失，心裡又浮現若有所失嘅感覺。

失落之中又帶點寂寞，令佢個心有戚戚然。

而呢種感覺之後一直揮之不去，縈繞喺佢心頭。