只有做愛的時候我才聽得見聲音: （59）
※ ※ ※
「嘀噠嘀噠—」
傍晚時分，外面落住雨。
Alex坐喺客廳陪緊豆豆玩，又不時check住部電話。
個幾禮拜前，晴晴嚟探豆豆嗰陣，Alex見到對方臉色有啲差，當時佢未嚟得切開口問係咩事，對方就走左，之後佢send返message問晴晴係咪唔舒服，但一直都無得到回覆。
後尾佢都send多幾條短訊問，連電話都打埋，然而對方都係無覆佢，亦無接聽過電話。
「Alex BB，行得啦。」Priscilla喺樓上換完衫，化好個妝行落樓。
嗰次同Priscilla上完床後，Alex好快就同對方確認左關係，仲同居住埋左一齊。
今日就係佢地拍拖一個禮拜紀念日，佢地準備出去食飯慶祝。
因為佢地係二人世界撐檯腳，所以何管家無跟埋一齊去。
上車後，Priscilla就坐喺司機位，Alex就坐喺側邊位。
同平時一樣，一上車Alex就戴返個頭盔。
「Alex BB，你記唔記得你應承過我啲咩架？你答應過我話要克服恐懼，上車盡量唔戴頭盔架嘛。」Priscilla攬上安全帶。
Alex同Priscilla講左自己因為嗰一次車禍佢心入面蒙上左陰影，搭親車都有恐懼感，每次都一定要戴住頭盔坐車，個心先會定一定落嚟。
Priscilla得知後，反而提議佢唔好再戴頭盔，叫佢誠實地面對恐懼，從而先可以克服恐懼。
問題係，心理陰影唔係粉筆字，唔係話想抹走就隨時可以抹走。
「下？真係唔戴？」
「係呀，唔通你想咁樣戴住個頭盔一世咩，你要試下除低，嘗試克服你以前嘅心理陰影同恐懼。」Priscilla伸手除低Alex個頭盔，然後一手拋去後面座位。
呢個黑色頭盔就係之前晴晴送俾Alex嘅生日禮物，係嗰個人手內置無線喇叭頭嘅盔。
Alex無左個頭盔，頓時無左安全感，正想轉身探手拎返過嚟，Priscilla就踩油門開車。
「停停停—」Alex驚慌失措，緊捉住Priscilla揸住軚盤嘅手叫停。
Priscilla被Alex捉住隻手，難以控制軚盤，只能急剎停。
Alex隨即伸手拎返個頭盔，Priscilla就話：「喂呀，你啱先咁樣捉住我隻手，係好危險架！」
「我都唔想，但我真係唔可以無左個頭盔。」Alex戴返頭盔話。
「唉，咁算啦， 我都唔逼你啦。」講完，Priscilla繼續開車。
佢地從清水灣嚟到旺角。
「…轉右轉右，差唔多到啦。」Alex為Priscilla指示方向。
Priscilla一臉疑惑，扭軚慢慢轉入右邊路口，嚟到一間大排檔門前。
「到啦，係呢度啦。」Alex
「呢間就係講嘅好正嘅餐廳？」Priscilla望見眼前嘅大排檔，眉頭一皺。
「係呀，入面啲嘢好好食架。」Alex除低頭盔，解開安全帶。
「我地真係要食呢間？」Priscilla露出失望嘅表情，佢以為Alex會帶佢到高級餐廳慶祝。
「嗯？你唔鐘意呀？」
「唔係唔鐘意，不過話曬今日係我地拍拖一個禮拜紀念日，照計應該食好啲好好慶祝一下，我知道呢頭有一間法國菜都唔差架，不如我地去嗰度食呀？」
「好呀，無所謂呀，既然今日你唔想食呢間，咁我地下次先嚟，今日就去食你嗰間法國菜啦。」
Alex見平時佢地兩個唔係食法國菜就係意大利菜，再唔係就係日本嘢，今日見係拍拖紀念日，想過得同平時唔一樣，所以先特登帶Priscilla嚟試下呢間大排檔。
之前晴晴帶過佢嚟食，佢覺得味道唔錯，不過既然Priscilla話想食返法國菜，咁就食返法國菜。
其實食咩佢都無乜所謂，最緊要都係女朋友開心啫。
之後佢地就嚟到一間高級法國餐廳用膳。
檯面擺返一道道精美嘅菜色，Priscilla攞出電話，影相打卡。
「唔好影啦，再影啲嘢食就凍曬架啦。」Alex溫柔提醒。
「知啦，我再影多幾張。」
「滋滋—」Alex放喺檯面嘅電話突然震動。
佢拿拿臨拎上手睇下係咪有短訊。
係就係有短訊，但只係垃圾廣告短訊。
「邊個send message俾你咁緊張呀？」Priscilla問。
「無，係一啲垃圾短訊嚟啫。」Alex展示短訊內容。
Priscilla望左一眼，話：「仲以為你背住我同第二個女人text添。」
「哈哈，點會呢，我有你一個就夠架啦。」Alex笑住講。
「哈，算你啦。」
「唔好講啦，快啲食嘢啦，攤凍左就唔好食架啦…」
享用完豐盛美味嘅晚餐，Alex提議直落去睇場午夜場，睇完去唱k，跟住上山睇日出。
Priscilla卻唔太願意：「唔好啦，通宵對皮膚唔好架，如果你想睇戲，返去我陪你睇netflix呀？」
「咁呀，咁好啦，女朋友話點就點啦。」
隨即Priscilla從手袋中出一盒禮物：「拿，紀念日禮物。」
「係咩嚟架？」
「你拆開咪知囉。」
Alex慢慢拆開個盒，裡面原來係一隻手錶。
「鐘唔鐘意呀，我揀左好耐先揀到呢隻，價錢仲唔平添架。」
「鐘意呀，其實你送咩俾我，我都鐘意架啦。」Alex滿心歡喜。
「咁你快啲戴上手睇下。」
唔知係隻錶本身太重，定係佢平時無戴慣錶，佢戴上手覺得隻錶有啲墜手，不過佢諗戴慣左之後，應該唔會覺得重。
「多謝你。」Alex就送返一對耳環俾對方作為回禮。
「哇！你點知我想要呢對紅寶石耳環架？」Priscilla興高采烈地戴上一對閃ling ling、襄住名貴紅寶石嘅耳環。
「上次行街你話想要，咁我咪買俾送俾你。」
「正呀！我超級鐘意呀！」Priscilla企起身，探前個人，喺Alex面上錫左一啖。
Alex見到對方開心，佢就開心。