只有做愛的時候我才聽得見聲音: （58）

眨眼之間，時間又過左一個月，晴晴已經完成曬一個階段共三個月嘅療程。

值得慶幸嘅係佢仲未死得，唔慶幸嘅係佢亦未痊愈。

佢需要繼續做多一個療程，問題係之前佢已經洗左百幾萬，家下個戶口得返幾萬蚊，已經唔再夠俾醫藥費。

「晴晴，呢度有十萬蚊，你拎去做醫藥費啦。」今日嚟探病嘅佳瑩遞俾晴晴一卷銀紙。

「你幾時儲到十萬蚊咁多架？」晴晴問。



「我問老細借糧，再加埋戶口筆錢，就得出咁多啦。」

「但係你借左呢啲錢俾我，我唔知第日有無機會還…」

「睬睬睬，唔准你講埋啲唔吉利嘅說話，重新講過呀。」

「你借左呢筆錢俾我，日後我一定會還。」

「咁講先啱架嘛，我呢度十萬加埋你戶口剩低嗰幾萬，應該夠俾一期錢架啦，剩低嗰啲唯有再諗辦法。」佳瑩問。



醫院知道晴晴有難處，俾佢分期付款嚟俾醫藥費。

佳瑩同晴晴提議話：「短時間籌大筆錢真係有啲難度，不如晴晴你試下，揾你之前識嗰有錢仔借呀？」

晴晴搖搖頭：「我同Alex都解左約咁耐，我又唔係佢邊個，大家非親非故，佢點會無啦啦借俾我？」

「問下都好呀？」

「算啦，就算係夫妻任何有一方有事，另一方都唔一定願意出錢幫手，更可況我同Alex一啲關係都無，又點會肯借咁大筆錢幫我，仲要借左隨時可能拎唔返。」



「喂呀，都話唔好講啲衰嘢囉，既然唔問個有錢仔借，咁我記得你講過你個走左佬嘅衰老豆最近返左嚟香港？不如你試下問下佢借？」

晴晴一聽到有人提佢老豆，塊面即刻變色：「問佢借？呢條仆街點會肯借呀？

「你求下佢可能肯呢？」

「癡線！我寧願無錢醫病就咁死左去，都唔會去求嗰個仆街死賤人！」晴晴一時激動，chok到條氣，咳個不停。

佳瑩一邊掃佢個背一邊講：「你唔好咁啦，為左啖氣你想連條命都唔要？最多我幫你求佢，你係佢個女，我信佢會幫你架。」

「唔好，我唔洗佢幫…」

雖然晴晴堅持唔要揾佢個老豆幫手，但佳瑩為左幫晴晴籌錢醫病，決定自把自為一次，去左揾晴晴老豆林哲求救。

一個星期後，林哲嚟到醫院探病。



晴晴本來聽緊歌，但一見到佢個仆街老豆，立即熄左喇叭，用不友善嘅眼神睥住對方：「你點解喺度？你嚟做咩呀？」

「你個friend話你有事，叫我嚟睇下你。」

「嚟睇下我死得未？」

「我知你好憎我，亦唔會原諒我，係我對你地唔住。」林哲行到床頭，放低一張支票，「呢度有啲錢，你拎去俾住醫藥費。」

晴晴望一望張支票，用不屑嘅語氣問：「你放低張支票咩意思？十年前你個仆街拋妻棄女，十年後竟然走嚟我面前假惺惺扮好人？俾三十萬當補償，想你自己個心好過啲？」

林哲無正面回應，佢話：「我唔阻你，你好好休息。」

講完佢就轉身離開。



「你知唔知你同個女人走左佬去台灣之後，阿媽日日都喺醫院等你返嚟。」

林哲止住腳步，聽晴晴講落去。

「你知唔知阿媽一直都信你，信你會回心轉意返嚟佢身邊，你知唔知喺佢臨死嗰刻，佢都淨係怪自己等唔到你返黎，無怪你一走了之。佢每日就訓喺病床一直等緊，心入面一直相信住，終有一日你會返嚟佢身邊，可惜佢等唔到。」

林哲無出聲，晴晴繼續講：「其實你真係好自私，由始至終你淨係諗你自己，十年前係咁，十年後都係咁，你想自己個心好過啲，就求其放低三十萬當補償，但係其實，有啲嘢係補償唔到架。」

「對唔住。」林哲靜默左半分鐘，抱歉一句，離開左病房。

晴晴講得佢無錯，由始至終佢都係一個自私嘅人。

十年前，林哲唔想負責任，丟低兩母子，同左第二個女人去左台灣，十年後，受到良心責備嘅佢，為左自己好過啲，想用呢三十萬作補償。

但正如晴晴所講，有啲嘢係無得補償，有啲嘢永遠無法被原諒，做得仆街就預左唔會好過。



林哲走左之後，晴晴就撕爛左支票。

佢唔會原諒呢個老豆，絕對唔會用佢一分一毫。

佢開返著喇叭，聽下歌放鬆一下心情，一開著就播緊Pink Floyd嘅 Wish you were here。

與此同時，門外突然傳出一把熟悉嘅聲音。

「有錢都唔要，唔似你喎。」
 
Alex出現喺眼前，晴晴一開始以為自己眼花，但睇真啲，呢個男人真係Alex。

點解Alex會知我喺呢度？佢嚟呢度做咩？佢係咪已經知道左我有病？



呢一刻，晴晴腦海閃過好多疑問，與此同時，心入面嗰隻小鹿又忍唔住亂撞。