只有做愛的時候我才聽得見聲音: （55）

呢個時候，佳瑩行入病房，佢嚟探晴晴。

「喂，你今日見點呀？」佳瑩買左外賣上嚟。

「都係咁架啦，未死得咁囉。」

「睬睬睬，唔好死死聲咁難聽，lur口水講過。」

晴晴笑一笑，問：「你又帶左咩上嚟呀？」



「魚片瘦肉粥。」

「做咩無端端買粥過嚟？」晴晴問。

「我就係見你成日唔食飯，所以特登買啲粥俾你食。」

「但我無胃口...」

「你成日唔食嘢咁點得架，我唔理呀，你一定食曬佢呀。」



晴晴見佳瑩一番好意，雖然無乜胃口，但都食左半碗粥。

「咦，乜你又喺度聽埋啲奇奇怪怪嘅歌呀？」佳瑩聽到晴晴床邊喇叭發出嘅音樂聲。

「呢啲唔係咩奇奇怪怪嘅歌，呢啲叫Post rock。」

「Rock？以前都唔見你有聽嘅，幾時鐘意埋啲Rock嘢架？」佳瑩問。

「唔知呢，覺得好聽咪聽囉。」晴晴答話。



「但點解聽嚟聽去都係前奏，仲未有人唱嘅？」

「因為Post Rock係以樂器聲為主，多數都無人唱。」

「哦~原來係咁，你竟然連呢啲咁奇怪嘅Rock都識。」

「我都係睇呢本雜誌睇返嚟。」晴晴喺床頭櫃桶拎一本音樂雜誌。

呢本雜誌係好耐之前，佢同Alex一齊行唱片鋪嗰陣所買嘅。

「呢種音樂幾好聽架，你得閒都可以揾嚟聽。」晴晴同佳瑩講。

「唔啦，呢啲嘢唔太啱我。」

二人傾左一陣計，佳瑩同晴晴傾下其他嘢，陪下對方，幫對方解下悶。



大約過左半個鐘，佳瑩望一望手錶，「我差唔多夠鐘返café啦，我聽日再嚟探你呀。」

「嗯，好呀，byebye。」晴晴揮手道別。

「Bye bye。」佳瑩離開病房。

晴晴啱先應承左護士，聽半個鐘歌就熄左個喇叭。

「滋滋—滋滋—」

突然間，床頭嘅手機傳來震動聲。

佢拎上手睇下，收到一條短信。



佢望一望，隨之眉梢上揚，面露微笑。

因為係Alex發短信過嚟。

對方同佢講：「有個好消息話你聽。我嘅治療好成功，耳仔已經完全好返曬啦，過幾日我就會同豆豆、何管家一齊返香港，如果你係掛住豆豆嘅，得閒嘅話隨時都可以過嚟探佢。」
 
Alex知道自己同晴晴嘅合約已經完左，理論上佢地已經無瓜無葛，佢亦無需向對方交代自己嘅嘢，只係唔知點解當佢耳仔好返之後，第一時間卻想將呢個消息講俾晴晴聽。

「滋滋—」電話收到對方嘅回覆。

晴晴回覆佢話：「真係架？你好返咁就太好啦，恭喜你呀！」

「係呀，我真係好返曬，以後隨時隨地都可以聽到嘢啦。」Alex回應道。

「我掛住豆豆呀，揾日得閒我上嚟探佢呀。」訓喺病床嘅晴晴，啱打完呢段字，正想send出去嘅陣，個肚又突然作痛。



痛到佢差啲連電話都拎唔穩，一分鐘後，等痛楚消失佢才能按下發送鍵。

Alex就覆返一個OK嘅表情符號俾佢。

晴晴都想趁自己仲未死得，想再見多豆豆一面。

見多Alex一面。

問題係佢依家俾個病，俾藥物同電療折磨到不似人形。

佢唔想帶住一副蒼白憔悴嘅樣去見Alex，於是向醫生提出話想暫停一個禮拜唔做治療。

「點解無端端要停一個禮拜？」醫生問。



「醫生，我真係好辛苦頂唔順呀，嗰啲副作用折磨到我就嚟死咁滯，我想抖下呀。」

「我知你好辛苦，但係…」

「嘔—嘔—」晴晴突然掩住個嘴作勢狂嘔。

「醫生...我...俾啲藥...同被部放射機搞到成日係咁嘔。」

晴晴一邊作嘔一邊講，隨即攤開手掌俾醫生睇，上面沾左啲淺綠色嘅液體，「你快睇下，我嘔啲嘢仲係綠綠地色嘅，睇嚟我個身體已經負荷唔到，真係要暫停一下先得啦。」

呢啲唔係佢嘔出嚟嘅嘢，而係佢預先用綠茶粉溝出嚟嘅液體，用嚟誇大副作用對身體嘅影響。

「如果係咁，睇嚟你可能真係要停一停，我盡快安排你去驗一驗血，檢查你身體咩情況。」醫生同晴晴講。

「咁樣中途停一個禮拜，無問題呀嘛？」晴晴問。

「正常停一個禮拜其實無問題嘅，不過停得耐就唔得啦。」

喺化療期間，病人需要定期驗血，若果驗血報告唔理想，化療係會暫時停止，等血液中嘅細胞恢復正常後，才繼續進行化療。

晴晴抽完血，喺醫生批准下，暫停一個禮拜電療同化療。

等個精神返些少，佢就偷走出醫院，到清水灣探望豆豆同Alex。

呢日佢特登化左個妝，畫左眼線，等自己個樣望落去無咁憔悴，另外頭上就戴左頂Cap帽，嚟遮一遮日漸稀疏嘅頭髮。