只有做愛的時候我才聽得見聲音: （39）

見就嚟天光，二人返清水灣，嚟到一個沙灘等日出。

佢地面朝大海，坐喺沙地上，看著暗沉嘅天空浮現一絲暮光。

「多謝你。」Alex同晴晴講。

「做咩無啦啦講多謝？」

「多謝你陪我出嚟玩…等我可以分散注意力…無咁難受。」



「哈哈，唔洗多謝，我都過左個開心嘅夜晚，咁你依家感覺點？都過左成晚，個杯照計都差唔多無電啦掛？」

「我諗都應該好快…可以抽得返出嚟。」

Alex一路數住射精次數，只要再射多次就到十一次，咁到時下體就會軟到扯唔起，從而滑出飛機杯。

「不過其實我一直都覺得好奇怪，點解你一時又聽到嘢，一時又聽唔到嘢？」晴晴問。

「醫生話性刺激會令耳朵…暫時恢復聽覺。」



「咁你聽到嘢，證明唔聾得曬，應該仲有得醫架喎，你仲有無試揾下醫生嚟幫你？」

Alex點點頭，回答：「我有個相熟嘅醫生…佢話如果有新療法…就即刻揾我去試。」

「咦？唔係喎，如果你好返咁咪唔需要我，咁我咪無錢收，你都係等我地完左合約先好返啦，哈哈！」晴晴講笑咁講。

Alex知道對方只係講笑，所以無嬲，笑笑口反問返對方：「話時話…點解你鐘意錢？」

「因為錢有用囉，你可以用錢買好嘢食，買靚衫著，仲可以買樓買車，而且有咩困難都好，就算身邊無人幫你，錢都會幫你。」



「買靚衫著？但我見你…嚟嚟去去…都係得嗰幾件衫。」

「哈，咁著開覺得好睇咪成日著囉。」

「咁我可唔可以…問多你一個問題？」Alex問。

「好呀，問啦。」

「嗰次點解你要劃花…你老豆架車…點解你…咁憎佢？」

一提到自己老豆，晴晴便面色一沉：「因為佢係個拋妻棄女嘅大仆街。」

「拋棄妻女？」

「……」晴晴無回答，腦海又諗返起佢爸做過嘅仆街嘢。



「你唔想答可以唔講。」Alex同晴晴講。

晴晴諗左一陣，開口話：「十年前，我阿媽患左重病，好需要人照顧，亦需要大筆錢嚟醫病，而我老豆林哲就係我阿媽最需要佢嘅時候，竟然丟低我地兩母女，同左二奶走左佬去台灣，仲一分錢都無留低，淨係留左間舊唐樓俾我地。」

Alex無出聲，俾晴晴繼續講：「之後，我阿媽賣左層樓用嚟做醫藥費，嗰陣我十二歲，每日放學就去醫院探佢同照顧佢，最後我阿媽捱左大半年，結果都係敵唔過病魔，離開左人世…」

講到結尾，晴晴哽咽左幾下。

「咳咳—」晴晴好快清一清喉嚨話：「我老豆喺我地最需要佢嘅時候拋棄妻女，所以我呢一生都唔會原諒佢，不過其實都應驗一句俗語，就係『夫妻本是同林鳥，大難臨頭各自飛』。」

Alex無想過原來晴晴背後有一個咁樣嘅身世。

晨光映照到二人臉上，太陽破曉而出，從地平線上緩緩升起。



「哇，你睇下！個太陽好靚呀！」

晴晴企起身欣賞眼前美麗嘅景色，剛才嘅不快仿佛一掃而空，臉上露出笑容。

Alex企埋身，同晴晴一齊望住日出：「係呀…好靚。」

唔知點解，Alex覺得呢一刻，係全晚落嚟最快樂嘅一刻。

係因為見到日出？因為就嚟可以拎走個杯？定係因為一直在旁嘅晴晴？

原因係咩，或者唔重要，佢只想好好感受快樂嘅呢刻。