只有做愛的時候我才聽得見聲音: （34）

排練時間由下晝兩點半開始。

Alex兩點從屋企出發，出發前笠定個飛機杯，咁去到就可以直接排練。

由於佢唔可以笠住個杯超過三個鐘，即係話佢最多可以練五點。

相隔多年，自己再有機會同Priscilla同台，佢心情感到興奮，另一方面咁耐無出過show，依家再踏舞台，同時又令佢感到緊張。

開頭佢以為間嘢係啲細清吧，平時得幾台客嗰種，去到先知原來個場都幾大。



酒吧老細話自己每個禮拜六都會搞music night，搵啲band演出搞旺個場，旺起上嚟嘅話，間吧都有百幾二百個客。

二百人？Alex咁耐無上台表演，一嚟就要對住咁多人表演，佢心情不禁變得更加緊張。

Priscilla同其他樂隊成員已經到左，Alex行上台同佢地打招呼。

「Hello，Alex。」喺台上試緊咪嘅Priscilla同Alex回應。

「等我同你介紹，呢個係鼓手阿傑，結他手…....」對方向佢逐一介紹樂隊成員。



「Priscilla，你個friend啲打扮，似係hip hop友多啲喎。」鼓手望一眼Alex身上嘅造型。

為左遮掩胯下嘅飛機杯，Alex今日著一條好寬鬆並加厚左瀨嘅屎褲，加埋上身件Tee都有少少oversized，如果掛多條金鏈，咁就真係典型hip hop仔look。

「我平時…鐘意著得鬆身啲。」

「唔洗理佢地，佢地隨口噏架渣。Alex，今次我真係多謝你肯嚟幫手。」Priscilla道謝。

「唔洗客氣…不過我晏啲有啲事…所以要五點前走。」



「OK無問題，事不宜遲，快啲開始啦！」Priscilla話。

Alex望一望台下酒吧角落頭一張檯，啱先跟埋佢入嚟嘅晴晴本來坐喺嗰度，負責留意住時間，但依家卻不見蹤影。

有時排練太投入好容易會練到過曬鐘，咁佢就叫晴晴到差唔多夠鐘就嚟提佢，點知家下條友無左人影，都唔知係咪偷走左出去玩。

「咳咳—」Priscilla清清喉嚨，準備開口唱歌，「我地開始啦。」

佢地先排練《Mardy Bum》，Alex數四拍跟住入歌，彈奏歌曲嘅結他前奏。

Priscilla伴住音樂，開口演唱。

估唔到Priscilla把聲同當年一樣，都仲係咁悅耳動人，Alex一邊彈一邊感受對方嘅歌聲，同時眼尾周不時睄去酒吧角落，心諗晴晴呢條友去左邊仲未返嚟。

除左Priscilla唱得好之外，另外嘅樂隊成員都好專業，演奏得好好，而Alex練習左幾日，都彈得好唔錯，只係間唔中有一兩下錯漏咁。



過左大半個鐘，晴晴終於蒲返頭。

Alex鬆左口氣，唔洗擔心無人提佢時間，可以安心將全幅精神投入練習。

下午四點四十五分。

仲有十五分鐘就夠三粒鐘，晴晴行過台下前提醒Alex。

「差唔多夠鐘啦。」晴晴展示電話嘅時間講。

Alex點點頭表示知道，彈埋彈緊嗰首歌嘅結尾，佢就同大家告辭：「唔好意思...時間差唔多...我有啲事要走先。」

「無問題呀，反正我地都練得七七八八，你走先啦。」Priscilla同Alex講。



「咁我走先…bye bye…聽日見。」

Alex同各人講再見後，孭返支結他行落台同晴晴離開。

「啱先你彈得好好呀，表現簡直係完美！」晴晴稱讚。

「OK啦…有幾個位彈得唔好。」

「呢個表現絕對無問題啦！」

「係咩？」

「係呀，同埋你知唔知原來呢間吧啲串燒都幾好食，我啱啱食左幾串，味道真係幾正。」

「食串燒？咁即係又有…幾張單要我報銷？」Alex話。



「哈哈，係呀，到時記得幫我報銷。」

「話時話…你啱先去邊…唔見左人嘅？」Alex問。

「肚痛呀嘛，所以咪去左廁所囉。做咩呀？見唔到我幾分鐘就掛住我呀？哈哈！」晴晴講笑咁話。

「我係驚你偷走去玩...無人幫手睇時間...過左鐘都唔知咋。」

一講起時間，Alex覺得自己好似有啲嘢唔記得左做。

大獲！掛住同晴晴吹水，佢竟然唔記得左除走個杯。

好彩仲有三分鐘先踏正四點半，而且未行得遠，佢拿拿臨跑返入酒吧，借個廁所拎走下面個杯先。



佢衝入廁所厠格，正當要熄個開關掣時候，厠格出面傳來三把男聲。

佢認得出係啱先樂隊另外三個成員嘅聲音。

「你地覺唔覺嗰個Alex手結他好渣？」

「覺呀，條友成日喺啲solo位彈錯音，喺嗰啲位彈錯好覺眼架嘛。」

「係囉，如果唔係Priscilla同Peter鬧交，都唔洗揾呢啲友嚟頂替，彈得廢又早走，好彩唔係長期夾……」

Alex掹返走嗰杯，自動mute左外面嘅聲音。