只有做愛的時候我才聽得見聲音: （27）

作為一個一出世就住大屋嘅人，Alex從未見識過咩係劏房。

當入到晴晴間屋，佢先知原來一個人嘅屋企係可以咁細。

成間屋一眼睇曬，得一張碌架床，兩個細衣櫃，一張木凳，另有一啲電器，仲有一個廁所。

佢諗佢屋企個雜物房都大過呢間劏房。

不過，雖則地方細，但周圍都算乾淨企理。



「你自己一個住？」Alex打字問。

「係呀。」

「租嘅？」

「梗係租啦，一個月要交五千蚊租金架。」晴晴揀幾件衫褲，放入行李袋。

「咁你依家都有九萬蚊個月，點解唔搬個大啲嘅地方？」



「慳錢呀嘛，加上我一個人住，呢度夠住架啦。」

晴晴忙住執嘢，Alex睄到床頭邊擺有幾幅相，無估錯嘅話，呢幾張都係晴晴同佢阿媽嘅合照。

當中有兩張明顯係全家福，卻被剪走左一邊。

Alex記得晴晴講過自己老豆係一個仆街，家下見到對方全屋淨係放左同阿媽嘅合照，一張同老豆嘅相都無，睇嚟晴晴真係好憎自己個老豆

晴晴拎左其中一幅相擺埋落行李袋度。



好快執齊嘢之後，二人就啟程返清水灣。
 
晴晴被安排住喺Alex間房隔離嘅客房。

佢唔洗再朝朝未夠六點半，就起身從黃大仙趕入嚟清水灣，依家每日可以訓到七點半，再慢慢起身煮早餐都未遲。

之前嗰兩樣佢頂唔順嘅嘢，一樣係六點半起身，家陣已經解決左，咁就得返陪Alex去打高爾夫呢一樣。

呢日，Alex見幾日都無去打波，朝早食早餐時就同晴晴講定，話下午要去高爾夫球會。

「天文台預測今日平均氣溫三十九點五度喎，天文台不建議市民外出活動，我地都係留喺屋企好啲。」晴晴同Alex講。

「send 個天氣報告嚟睇下。」

事實係天氣預報話今日平均氣溫係三十四度，晴晴諗住作大個數嚇下Alex，可惜一眼就被對方識穿。



「滋滋—滋滋—滋滋—」

Alex放喺檯面上嘅電話不停震動，開頭以為係晴晴發短訊震佢機，但睇真啲原來係有人打俾佢。

係一個陌生電話。

佢無理會，相隔十五分鐘後，嗰個電話又打過嚟。

「少爺，洗唔洗我幫你聽？」何管家問。

Alex搖搖頭，心諗多數係打錯，無需理會。

佢本身無乜朋友，基本上平時都唔會有人揾佢，打得佢電話嘅一係cold call，一係打錯。



到左中午，健身完嘅Alex，等晴晴吸埋塵，就出去高爾夫球會食lunch，順便打波。

「滋滋—滋滋—」

呢個時候，佢部電話又喺度震。

有人發短訊俾佢，呢個人唔係晴晴，而係來自朝早打過俾佢嗰個電話號碼。

而呢個電話號碼嘅擁有人，竟是Priscilla。

短訊嘅內容係咁嘅：「Alex，最近好嗎？我係Priscilla，我有啲事想揾你幫手。」

Priscilla？點解佢知道我電話？

Alex諗左幾秒，先醒起有次喺酒吧門口，自己俾左個電話號碼對方。



突然收到曾經喜歡嘅人嘅message，佢呢刻心情有啲緊張，亦有啲興奮。

佢小心翼翼敲打屏幕，回覆問：「Hello，請問你揾我咩事？」

「下個星期六，我地樂隊有個喺酒吧嘅演出，但就欠一個結他手，你可唔可以過嚟頂替一下？」

「你應該仲有彈結他？下星期六如果你得閒嘅話，可唔可以幫我呢個忙？」Priscilla發短訊繼續問。

Alex望住對方發嚟嘅message，諗緊點覆好。

佢家下都彈唔到結他，只能拒絕，問題係用咩藉口拒絕好。

直接話唔得閒會似乎俾人感覺敷衍，如果話無彈結他，又驚破壞自己喺對方心目中「彈結他好叻」嘅形象，應該點覆好？



同一時候，晴晴喺客廳吸緊塵，見到Alex坐喺梳化上，望住手上嘅電話，望到入曬神，於是佢偷偷地行近去八卦下。

「下個星期六，我地樂隊有個酒吧演出…」晴晴「裝」到電話嘅短訊內容，一邊偷睇一邊讀出聲。

Alex無聽到吸塵機嘅聲，亦無聽到晴晴把聲，直至望到地下多左個人影先知隔離多左條友。

佢立即坐開個人，收返起部電話。

「有人揾你去酒吧表演？」晴晴展示自己部電話問。

「關你咩事。」

「去表演啦，彈結他先係你真正鐘意做嘅事，高爾夫球唔啱你架。」

「都費事睬你。」

打完呢句，Alex就返上房，靜靜一個諗下點樣回覆，婉拒Priscilla嘅邀請。