只有做愛的時候我才聽得見聲音: （10）

「咩話？真係架？你地真係同我簽約呀！哈哈哈哈！太好啦！」

晴晴收到何管家嘅通知，開心到彈起，仲嗌左出聲，搞到咖啡店周圍嘅客人都望曬過嚟。

依家嘅佢喺女僕咖啡店度返緊工，呢份係佢嘅正職。

私影model、酒吧侍應同寬頻推銷員都係佢啲兼職。

「咁我地幾時簽約呀？」晴晴問。



「聽日如果你得閒，咁就過嚟簽約架啦。」何管家答。

「得呀得呀，朝早定下晝？」

「咁聽日朝早十點，有無問題？」

「好呀，無問題！」

「咁聽日見，bye bye。」



「bye bye，聽日十點見，我會準時架啦！」

「晴晴，咩事咁開心呀？笑到笑見牙唔見眼咁。」一名年輕女僕侍應行過嚟問，佢係晴晴嘅同事兼好友。

「佳瑩，今次我發達啦！」晴晴喺佳瑩耳邊細細聲咁講佢被Alex包養嘅「好消息」。

「下！你講真架？你傻左咩？出賣肉體呢啲咁蝕底嘅你都做！」佳瑩一時激動，說話大聲左少少。

「Shh—細聲啲，唔好咁張揚。」晴晴做出「噓」嘅手勢，「唔蝕底架，一個月有九萬呀，好筍架！」



「為左錢咁樣出賣身體好似都唔係幾好掛？」

「呢啲無話好唔好嘅，最緊有錢袋姐，哈哈…」

「喂喂喂！你兩條友打完牙骹未呀？快啲去做嘢啦！」咖啡店老闆走過嚟訓斥二人。

呢刻晴晴開心到就算被老細鬧都仲笑得出：「老細，我聽日想請一日假得唔得呀？」

「下？你上個禮拜先請完假，聽日又請？」

「係呀老細，我個妹聽日結婚呀，我要參加婚禮做伴娘，所以要攞一日假。」

「你個妹唔係上上個月結左婚？今個月又結多次？」

「Er…上個月呢…」晴晴努力諗緊藉口，「哦~我記得啦，你話上個月，上個月係我堂妹，聽日係我表妹結婚，唔一樣架。」



「一時表妹一時又堂妹，你有無咁多個妹呀？」咖啡店老闆表示懷疑。

「真架啦老細！哎呀，唔同你講啦，我去做嘢先啦，總之我聽日放一日假，記住唔好扣我人工呀！」講完，晴晴行開去隔離檯幫人落單。

咖啡店老闆其實早就知晴晴喺出面keep住都有秘撈，只係見對方喺鋪頭幾幫得手，又吸引到啲宅男嚟幫襯，先至唔炒佢魷魚。

到左第二日一大早，晴晴搭車入清水灣，踏正十點準時到達。
 
何管家帶佢入書房，Alex已經喺裡面等候，檯面上都準備好有兩份合同。

「你睇一睇份合同先，有咩唔明可以問我地。」何管家遞上熱茶。

晴晴花左兩分鐘睇完份合同，問：「工作時段上面話係夜晚九點到十二點，即係我淨係需要喺呢個時段出現，其他時段唔喺度都無問題？」



「無錯，你每日淨係喺呢個時間出現就得啦。」

「哈，咁正喎，咁我咪可以繼續返café…」晴晴細細聲自言自語。

「仲有無其他問題？」何管家問。

「有呀有呀！點解上面無寫我有得放幾多日假嘅？同埋遲到嘅話會唔會扣錢架？如果扣嘅話，咁會扣幾多呀？」

「你每個月有四日月經假，除此之外，其他日子你都要過嚟，無得放假。至於遲到問題，我少爺絕對希望你可以每日準時，遲到多過十五分鐘我地就會扣錢，每十五分鐘就扣兩百蚊。」

「唔係掛，每個月得四日假，遲十分鐘仲要扣咁多錢？」

「如果你覺得條件唔合理，你可以唔簽。」何管家解釋。

Alex靜靜坐喺一旁，望住晴晴問個不停，佢心諗明明之前啲女仔好爽手就簽左份嘢，因乜解究佢就咁多問題問。



「唔係呀，我都係問下啫，一場嚟到我點會唔簽約呢。」晴晴澄清，「我仲有個問題係，到時我過左三個月試用期，咁有無人工加架？同埋假設我每個月都無請假，會唔會有勤工獎或者獎金拎架？」

「呢啲都係我地合同無標明嘅嘢，所以係無嘅。」

「咁可唔可以加落合同呀？例如加個一千蚊勤工獎？」晴晴問。

「Er…呢層…」何管家無諗過晴晴會咁要求，一時間唔識答。

Alex用手語問何管家張約係咪有乜問題，何管家將晴晴嘅要求解釋一次。

一千蚊勤工獎？Alex重複一次何管家嘅動作，確認自己無睇錯。

佢用一隻食指戳一下掌心，呢個係表示一千蚊嘅手語動作。



好似晴晴呢種愛財（難聽啲即係貪錢）嘅女人佢都唔係第一次見，但嫌九萬蚊都唔夠，簽約時咁直接要求加多一千蚊勤工獎嘅，就真係第一次見。

而Alex嘅答案，當然係no。因為九萬蚊已經好多，根本唔需要再加。

晴晴見Alex臉上有一絲不悅之色，驚對方嬲左會唔同佢簽約，於是打圓場話：「哈哈，其實呢我都係口痕講下，大家唔好放上心。」

講完佢就即刻喺合同上簽名。

Alex都簽埋名之後，雙方就正式變成主僱關係。

晴晴亦正式進左Alex嘅世界。