［愛情純愛］既然忘記唔到佢，不如試下中意我⋯？: 161. 遲到的一句〈完〉

「還番比你！」岑諾新將髮圈一下子從佢嘅手腕上扯落嚟，拎起我隻手將髮圈塞到我嘅手中

髮圈剛到我手，岑諾新就轉身走

「就知道你仲中意佢！憑咩要我一直做後備！」望住岑諾新轉身就走嘅背影，我冇法再壓抑住快要失控嘅情緒，諗都冇諗就朝佢嗌道，「張景彥講得啱，你根本就冇放低孫慧伶！你地兩個都覺得我好好恰，當我係後備！」

岑諾新聽到我嘅說話停咗喺原地，緩緩轉身過嚟面向我

「張景彥話我仲中意孫慧伶？」岑諾新冷笑一聲，「佢講你就信？你真係好中意佢，人地講咩你就信咩。」





「我都話我唔中意佢！」我皺起眉頭，「講極都唔聽！」

岑諾新壓抑住自己嘅怒氣，我不悅地白佢一眼

我係中意張景彥嘅話，點會一直同岑諾新一齊？明明係因為佢中意孫慧伶！我同佢講分手嘅時候，佢諗都冇諗就答應咗

唔通喺嗰一刻我開口同佢講我中意佢？等比佢拒絕呀？我唔想再做單相思嘅嗰個！

X⋯X⋯X





我聽到蔣倩盈講嘅嘢之後，怒氣完全冇減少，反而仲嬲

「你又知我唔中意你，一直都當你係後備？」我不禁皺起眉頭問蔣倩盈

「你一直都冇講過你中意我呀⋯」蔣倩盈輕抿一下唇，一臉委屈地抬眼望我，「我本來就同孫慧伶冇得比⋯佢係你嘅初戀，你又咁中意佢，我都話過，我唔係喺咩都唔知嘅情況下同你一齊⋯」

望住蔣倩盈委屈地訴苦，我嘅怒氣頓時褪去一大半⋯我都有錯⋯

原來⋯一直以嚟係因為我冇表現得好中意佢，亦冇親口同佢講，所以佢先會覺得我冇中意佢⋯





孫慧伶係孫慧伶，佢係佢⋯佢地都唔一樣⋯

望住蔣倩盈嘅雙眼，我只見到佢嘅淚水一直喺眼眶打轉，佢係真係打從心底覺得委屈⋯

「我冇中意張景彥，一早就冇⋯」蔣倩盈講道，然後喺眼淚滑過眼眶嘅同時：「我中意你呀⋯！」

我伸手捉住佢嘅手腕，將佢朝我嘅方向拉，佢向前行咗兩步撞入我嘅懷中

「對唔住⋯係我冇先一步開口，話你知我中意你⋯」我將佢抱緊喺我嘅懷中，唔捨得放開佢，「我冇中意孫慧伶，我有推開佢，對唔住⋯」

如果我係唔中意佢，我先唔會問佢拎髮圈，唔會帶佢番屋企，亦唔會同佢去玩，唔會主動搵佢

我唔可以否認孫慧伶係我嘅初戀，但我更加唔可以否認，我的確中意咗蔣倩盈⋯好中意佢⋯

「講分手嘅時候你做咩一口就答應呀！做咩唔、唔同我講你中意我呀！」蔣倩盈頓時傷心地喊起嚟，我心裏又心疼又內疚





係唔係當初佢講分手嘅時候，我有開口話比佢知，表明我對佢嘅心意，我同佢就唔會產生咁多誤會？係唔係就唔會有分開嘅時候？

「我以為你中意張景彥所以同我分手⋯」我心疼地講道，將佢攬得更緊，「你又唔講點解，就咁掉分手兩個字比我⋯」

「邊、邊有人要女仔表白㗎⋯！仲要係以為自己係後備嘅女仔⋯！」蔣倩盈捉實我嘅裇衫，我感覺我嘅裇衫都皺晒

「冇呀，冇後備呀⋯」我對佢講道，「你自己諗多咗啦⋯！」

「所、所以宜家，係、係點㗎？」蔣倩盈抬頭望我，雙眼同鼻尖都紅透，「你、你講清楚呀⋯！」

「髮圈呢？比番我先。」我捉住佢嘅雙手，望下佢將佢個髮圈收咗喺邊

「唔、唔要⋯！」蔣倩盈喊到打嗝，邊個叫佢喊得咁厲害，「你、你唔講清、清楚，我唔會比個髮圈你⋯」





我見佢滿臉期待咁望住我，都知道佢大概係期待緊我講一句「我中意你」

我望住佢笑而不語，蔣倩盈由一開始嘅期待，然後開始輕皺起眉頭，最後一臉不滿咁望住我

「岑諾新！」蔣倩盈不滿地叫咗我一聲

「咩呀？」我不禁笑起嚟問道

「唔講就算！」蔣倩盈氣沖沖地將我推開，然後轉身想走，「我走啦！」

「喂！」我見佢咁樣，頓時拉住佢，從佢嘅背後將佢攬住，細聲地喺佢嘅耳邊講道：「我中意你，好中意你。」

「你講咩？講多次⋯！」蔣倩盈推開我攬住佢嘅雙手，轉身望住我，雙手捉住我嘅手腕

「我中意你，好中意你。」我跟住佢嘅要求，再重複一次我啱啱講嘅嘢，「聽到未？」





「聽到聽到！」蔣倩盈頓時破涕而笑，雙手攬住我

我嘅左手攬住佢，右手放到佢嘅後腦勺輕輕摸咗兩下，安慰一下佢

諗到我同佢都咁蠢咁比人玩咗一輪一樣，我不禁自嘲地笑起嚟

「對唔住，我應該信你多啲。」我低頭對蔣倩盈講道，「以後會信你多啲。」

「我都有唔啱⋯我以後都會信你多啲！」蔣倩盈嘅雙手緊緊地攬住我，「我都中意你⋯」

聽到佢親口將「我中意你」講出口，我心裏頓時變得波濤洶湧的

「當初我地都應該喺中意嘅時候就講中意⋯」蔣倩盈喺我懷裏蹭了蹭，下一秒卻將我鬆開，捉起我隻手，將拎喺手中嘅髮圈套到我手上，「比番你啦！」





X⋯X⋯X

岑諾新望住蔣倩盈套到自己手上嘅髮圈，岑諾新打從心底高興地笑了笑

「行啦，我地去食個雪糕慶祝一下啦！」岑諾新孭起書包，牽起蔣倩盈嘅手

「嗯嗯！」蔣倩盈行到岑諾新嘅左邊，右手拖住佢嘅手，左手攬住佢嘅手臂

「係呢，到底點解要將我嘅髮圈戴右手，你一直都冇講過比我知。」蔣倩盈抬頭望向岑諾新，問出自己好奇咗好耐嘅問題，「而且我又要企左邊，你都一直冇講比我知⋯」

「原因好簡單呀。」岑諾新望向蔣倩盈，對蔣倩盈輕輕一笑，「右手係慣用手，所以好多時都會先伸出右手去拎嘢，一伸右手，就會見到你嘅髮圈，會諗起你。」

「咁我點解要企左邊？左邊又唔係你嘅慣用手⋯」蔣倩盈一臉天真地問，臉上嘅淚痕仍未褪去

「咁簡單你都要問？」岑諾新不禁一笑，然後微微耷低頭，靠近蔣倩盈嘅耳邊細聲地講道，「重要嘢要放喺心上。」

蔣倩盈聽到岑諾新講出嘅理由，頓時甜甜一笑，甜到入心

兩人對上視線，心裏因為對方番到自己身邊而鬆一口氣同時，又不禁甜甜一笑

「我果然好中意你！」「我真係好中意你。」




〈全文完〉

///
蔣倩盈同岑諾新嘅故事就嚟到呢度啦～
希望大家中意佢地啦！亦希望大家中意呢個結局！
多謝你一直以嚟嘅努力追故同支持！
歡迎IG DM comment比我/下方留言

希望中意我嘅小說嘅你會繼續支持我！
想知道幾時出新故？
記得Follow我嘅IG喔～（Link在下方）


IG Link: https://www.instagram.com/nd_cotttoncandy/?hl=zh-t