［愛情純愛］既然忘記唔到佢，不如試下中意我⋯？: 160. 為什麼⋯？

喺差唔多夠鐘嘅時候，我同楊朗然一齊落去操場集隊，喺我同楊朗然行緊樓梯落去嘅時候，張景彥同佢班上嘅人喺我地身旁行過

我不禁多望咗一眼，佢同蔣倩盈，最終都會一齊番吧⋯

「大佬⋯！」楊朗然喺張景彥經過咗我地之後壓低聲線叫咗我一聲

「嗯？」我收回落喺張景彥身上嘅視線

「聽隔離班啲人講，蔣倩盈冇同番張景彥一齊。」楊朗然忽然間對我講道





「所以呢？」我淡然地反問一聲

「大佬，你唔追番佢呀？」楊朗然問道，「或者係因為蔣倩盈嘅心入面冇張景彥，所以先唔同番佢一齊。」

「嗯⋯」我一時間反應唔嚟，默默地嗯咗一聲

「你兩個分手都不明不白咁，你連問都冇問過佢點解同你分手？」楊朗然用手肘輕撞咗我一下

不明不白咁就分手⋯楊朗然嘅一句好似令我回過神一樣，當初佢講分手嘅時候，我好似一早已經喺心入面認定佢係中意張景彥，所以要同我分手，但其實我冇問過佢點解，佢亦冇講過點解要同我分手⋯





表面睇嚟係因為嗰個Physics project，我同孫慧伶嘅事令佢委屈，但佢冇親口講過佢真係因為呢個原因而同我分手⋯

楊朗然勾起咗我心中嘅疑惑同好奇⋯到底我同佢分手嘅理由係咩⋯？

X⋯X⋯X

喺完咗散學禮之後嘅班主任時間，我一直都喺度諗岑諾新同孫慧伶講嘅嘢

我下意識偷偷地瞄向岑諾新，腦海中忽然間諗到今日唔小心聽到佢同孫慧伶嘅對話





「我都話我唔會同你一齊，你唔洗做咁多嘢。」

「佢點解最後，冇同到孫慧伶一齊⋯」我不禁喺心中問道，「既然佢係中意孫慧伶嘅話⋯」

呢份疑惑持續到放學，我好想問佢點解佢最後冇同孫慧伶一齊，點解同孫慧伶講佢做咩都好都唔會同番佢一齊

我冇即刻喺課室問出我想問佢嘅嘢，因為我同佢搭同一班車番屋企⋯

喺落咗車之後，我行喺佢身後，佢行喺我前面，我同佢之間相隔咗一小段距離

我真係好想知點解佢冇同孫慧伶一齊，係因為佢心入面有我，定因為唔想分咗手一段咁短嘅時間內又拍拖⋯？

我停低落嚟，雙手用力握成拳頭，朝佢大聲問道；喺我停落喺嘅同時，岑諾新都停咗落嚟，轉身過嚟面向我

「岑諾新，我想問—」「蔣倩盈，我想問你—」





我同佢同一時間對對方開口講道

我愕一愕同時，見到岑諾新都窒咗一窒

「你⋯你問先⋯」岑諾新先將發言權讓比我，我行到佢面前

「點解你冇同到孫慧伶一齊⋯你唔係仲係中意佢㗎咩⋯點解唔一齊⋯？」我深呼吸，然後一次過將我想問嘅嘢問出口，「雖然咁樣問好蠢，我地亦已經分咗手，但我都係好想問你⋯！」

我望向岑諾新，佢皺起眉頭⋯但就算佢再一次冷淡對我都好，笑我蠢都好，我都只係⋯想知道一個答案⋯

「你唔係都冇張景彥一齊咩？」岑諾新卻反問我，「你都冇同佢喺埋一齊，你唔係中意佢咩？」

「我都唔中意佢⋯做咩要同佢一齊⋯？」我輕皺起眉頭，心裏頓時又嬲又無奈，「我成全你，比你同孫慧伶一齊，又唔見你唔同佢一齊⋯」





明明我只係想問清楚原因，但一聽到佢話我中意張景彥，我頓時感覺到怒火喺肚子凝聚

「你成全我？」岑諾新嘅皺頭深鎖着，「我幾時有話過我中意孫慧伶，話要同番佢一齊？」

「你唔係中意人地咩？嗰日落大雨，你約我出嚟嗰日，我親眼見到你兩個⋯」講到呢度，我又冇辦法講出當日我見到嘅事，「你同佢都咩啦，仲話唔係中意佢？」

「我⋯」岑諾新一時語塞，佢靜咗落嚟，我同佢都冇講嘢

我都係講事實咋嘛，我親眼睇到㗎⋯！我又唔係盲嘅，唔通係錯位呀？

「你嗰日有嚟⋯」岑諾新盯着我，一臉嚴肅地講道，「你既然嚟咗，做咩唔出嚟？做咩要話自己唔舒服？」

「佢錫你，你唔推開佢，我仲行出嚟做咩？落自己面？」我嘅怒火直湧出嚟，「你唔推開佢，答案都擺到出嚟啦，仲有咩好講？我仲要出嚟聽你親口講你中意佢呀？」

「我都話我冇中意佢，你有冇聽到我講咩？」岑諾新皺起眉頭，「我嗰日冇諗過佢會嚟，我唔知佢會出現喺度，亦唔知你嚟咗但同我講大話。」





岑諾新氣沖沖地對我講道，我感覺到佢努力地壓抑住自己嘅怒火，佢撇開臉唔望我

「宜、宜家怪我啦？」我唔忿氣地講道，「明明係你自己唔講清楚⋯我同你講分手你唔講？宜家怪我啦⋯」

「嗰日約你就係想話你知我中意你，想同你講清楚我同孫慧伶真係咩都冇！想問你對張景彥到底係點！係你自己唔出現！」岑諾新望我一眼，忍唔住又白我一眼，「我從來都冇講過我仲中意孫慧伶囉好唔好？都唔知你係邊度聽番嚟⋯」

聽到岑諾新咁樣講，我不禁愣了愣，佢的確一直以嚟都冇講過佢仲中意孫慧伶

嗰日我見到孫慧伶錫佢，但我冇問過佢當日發生咩事，當下亦冇行出嚟問清楚佢⋯

我係因為佢冇推開孫慧伶，所以覺得佢仲係中意孫慧伶⋯？係因為張景彥話我知孫慧伶同佢已經冇可能，因為冇新鮮感？到底我係點樣肯定，岑諾新仲係中意孫慧伶？

「咁你一直唔講，我邊度知啫⋯！」我心裏嘅怒氣正在慢慢地散去，「我唔問，你唔講⋯咁我點知啫⋯」





岑諾新擺出一副沒好氣嘅表情，佢瞄咗我一眼，然後將自己嘅冷衫除咗落嚟

「你⋯！」我望到佢手腕上嘅髮圈，「我地都分咗手啦，你仲戴住做咩⋯」

///
聽日係大結局啦！係最後一集！大家聽日記得睇！！！


IG Link: https://www.instagram.com/nd_cotttoncandy/?hl=zh-t