［愛情純愛］既然忘記唔到佢，不如試下中意我⋯？: 153. 互不信任

我嘅雙腿好似插喺地上一樣郁都郁唔到，呢一刻我覺得我就好似多餘嘅一樣⋯

無論係喺張景彥嘅身邊定係喺岑諾新嘅身邊都一樣⋯我原來都只係一個配角，只係最近同岑諾新一齊太開心，有啲得意忘形⋯

「推開佢⋯拜托你⋯」我喺心中祈求道，捉住雨遮嘅手都不禁微微顫抖着，「岑諾新，推開佢⋯！」

岑諾新會推開佢係唔係？佢心入面有我㗎係唔係⋯？佢會推開孫慧伶⋯

話比我知，一直以嚟都係我多心，係我誤會你，你冇中意番孫慧伶，你冇打算番轉頭好唔好？





「⋯！」我不禁瞪大雙眼，我比剛才更加更加震驚

孫慧伶踮起腳尖，直接吻喺岑諾新嘅臉頰上

本來攬住岑諾新嘅腰嘅雙手鬆開，搭到岑諾新嘅頸上然後攬住佢嘅頸，岑諾新冇推開佢⋯

呀⋯我點會唔記得咗⋯岑諾新嘅初戀係孫慧伶，一直喺佢心底嘅嗰一個初戀⋯

我唔想再睇落去啦⋯





我轉身就走，喺我轉身嘅一刻，眼前嘅所有事物景象都模糊起嚟

「果然，連你都一樣⋯！」我嘅心痛得好似要被撕開一樣，「張景彥佢，講得冇錯⋯！岑諾新你，仲中意孫慧伶⋯！」

原來到頭來，我又成為咗一個代替品⋯岑諾新，你對我做嘅一切，到底係唔係真係有付出過真心⋯？

喺臉上滑落嘅，到底係眼淚定係雨水？應該係雨水⋯

X⋯X⋯X





「你⋯！」我一下子推開孫慧伶，孫慧伶向後行咗兩步，離開咗遮嘅範圍，「你咩事？」

孫慧伶踉踉蹌蹌地企好，雨水打喺佢嘅臉上，我望住孫慧伶，孫慧伶抬起頭望住我

「點解你會喺度？」我皺起眉頭，用着質問嘅語氣問道，「你喺度做咩？」

孫慧伶朝我行近咗一步，我下意識想後退同佢保持距離

「你唔好太過份。」我認真地對孫慧伶講道

「我同張景彥分咗手，我同佢分手，因為我中意你呀⋯」孫慧伶望住我講道

「咁關我咩事？」我輕皺起眉頭，沒好氣地問道

「你唔係中意我咩？」孫慧伶走一步行到我面，提手捉住我嘅衫袖，「唔係咩？」





「唔中意，已經唔中意啦。」我甩開佢隻手，「我做咗啲咩令你覺得我仲中意你？」

我唔想佢捉住我，更加唔想陣間蔣倩盈嚟到見到，誤會我同孫慧伶之間仲有啲咩瓜葛，最近我同蔣倩盈之間已經好多唔開心嘅事發生

「你當初同蔣倩盈一齊，唔係都係因為我咋咩？」孫慧伶輕皺起眉頭，理直氣壯地講道，「你搵佢代替我，我宜家同張景彥分咗手啦，我地可以繼續一齊。」

「就算我當初同佢一齊係同你有關咁又點？我冇搵佢嚟代替你。」我解釋道，「我宜家中意嘅人係佢，Okay？你都只係因為對張景彥冇新鮮感，所以先搵番我。」

孫慧伶真係當我蠢，我點會唔知佢咩心思？

我之前覆佢機，只係因為大家一齊做Physics project，但我對佢冇多餘嘅想法，完全冇

佢當初同我分手，係因為覺得我呢個人對佢嚟講已經冇新鮮感，佢覺得悶啦，所以先同我分手；宜家佢又一次因為新鮮感嘅問題同張景彥分手，然後理直氣壯咁番轉頭搵我





「你話過你會對我好，會一直中意我！」孫慧伶輕輕抿唇，死死地拉住我隻手

「你都唔中意我，憑咩要我繼續中意你？」我打從心底不解，佢係點樣先可以理直氣壯咁講得出啲咁嘅說話，「冇人會一直企喺原地等你，係你先放棄。」

「我宜家番轉頭，遲咩？」孫慧伶唔明白，佢楚楚可憐咁望住我，卻唔知道我唔會再對佢心動，「我都番轉頭啦，你就唔可以比一次機會我？」

「係你自己揀咗放棄，我冇逼過你，我唔會同番你一齊。」我決絕地講道，然後將佢隻手甩開

我拎手機出嚟望一望，蔣倩盈人呢？佢去到邊？

「你到邊？我過嚟搵你」

正當我要轉身走，將message send出去嘅時候，孫慧伶用力地拉住我

「張景彥中意蔣倩盈。」孫慧伶忽然間講道，「我知道佢地最近都見過面。」





我頓時停低步伐，回頭望向佢

「你可以肯定佢一定係全心全意咁中意你？」孫慧伶抬頭望住我，「佢最近對你，唔係冷淡咗咩⋯？」

「你唔好亂講。」我不禁輕皺起眉頭，明明係堅定咁講出口，但心裏卻隱隱約約地感到不安

我一下子將佢隻手甩開，孫慧伶又再捉次捉住我嘅手腕

「新，我冇對你講大話嘅必要呀⋯」孫慧伶講道，「明明你自己都知佢心入面一定有張景彥⋯你一早就知，點解就唔信？」

「講夠未？」我冷冷地問道，「我同蔣倩盈之間嘅事，同你冇關係。」

「佢啱啱都係同張景彥一齊呀！」孫慧伶又道，佢將手機遞到我面前，打開snapchat嘅location比我睇，「你點解就唔肯信我？」








IG Link: https://www.instagram.com/nd_cotttoncandy/?hl=zh-t