［愛情純愛］既然忘記唔到佢，不如試下中意我⋯？: 152. 雨天

張景彥望一望我，下一個瞬間佢微微抬起頭望向無雲嘅天空，比起傷感，佢更加似鬆咗一口氣

「你都覺得佢會⋯？」我沒頭沒腦地問道，冇前文後理，刪走所有關鍵字

「唔⋯」張景彥冇第一時間回答，佢耷低頭，眼裏充滿着遲疑，我輕皺起眉頭望住佢

我嘅直覺話我知，張景彥一定係知道啲咩、察覺到啲咩⋯佢只係唔想話比我知⋯

「呼⋯所以你都覺得佢會嘛⋯」我微微低頭，隻手因為無處安放而喺身前緊扣着





「我咩都冇講。」張景彥頓時否認，「係你自己都覺得佢會。」

我無法反駁張景彥講嘅嘢，只可以抿着唇耷低頭，用沉默去默認一切

「我話過，孫慧伶係一個主動嘅人，佢覺得中意就應該去主動追，咁你覺得？」張景彥又道

「唔知⋯我諗緊點做好⋯」我緩緩地開口講道

「你係在意嘅，你咪去問佢囉～」張景彥講得輕鬆，但卻唔知道我要問出口係幾難嘅事，「同佢講清楚，問清楚佢係點諗。」





我安靜咗落嚟冇出聲，我有好多次都想問清楚岑諾新，到底佢心入面仲有冇孫慧伶嘅存在，但係每次到咗最後，我都問唔出口

「佢又唔係做咗啲咩好明顯嘅舉動，你咪問清楚佢，至少可以證實你嘅想法係啱定錯。」張景彥講道

好明顯嘅舉動⋯佢上次下意識咁提手護住孫慧伶，仲唔夠明顯⋯？

「你又寧願委屈自己，都唔問個明白？」張景彥笑問道，「你既然想知，點解唔問？」

「問唔出口⋯有啲嘢冇講出口，但我感覺到⋯」我輕輕一笑後講道，「好多嘢都可以睇得出⋯」





面對成為咗普通朋友嘅張景彥，我自然而然地講出我嘅想法，或者因為佢知道我同佢唔可能再一齊番

「就好似你知道分手嘅真相，但冇講出嚟嘅必要一樣⋯」我又講道

喺同張景彥交談過後，我一個人喺行番到屋企嘅路上諗咗好耐⋯到底我係唔係真係應該去問清楚岑諾新？

如果佢真係仲對孫慧伶有感覺，我可以放手⋯我拎得起放得低⋯大概⋯

「我應該點做⋯？」我迷惘地問自己，「問清楚佢係最好吧⋯」

我宜家諗到嘅唯一一個辦法係問清楚佢，同佢講清楚，搞清楚佢點諗，先係最好嘅事⋯

孫慧伶真係為咗岑諾新而同張景彥分開，我想知岑諾新會點做，雖然我唔知孫慧伶有冇同佢講啲咩，但我都想問清楚佢⋯

天黑啦，天空落起密密麻麻嘅細雨，我打開遮，緩步行番屋企





我拎出手機，正準備send一個message比岑諾新，同佢講想同佢講清楚嘅同時，岑諾新send咗一個message過嚟

岑諾新：有啲嘢我想當面同你講，亦想問清楚清楚你

睇嚟人算不如天算⋯我同佢都想同對方講清楚、問清楚⋯

岑諾新：我喺商場對開嘅公園等你

「好」我帶着一份疑惑回覆道

雨愈落愈密，愈嚟愈大，落到地面嘅雨水一直反彈上嚟，我停喺原地，抬起頭望一望天空

「原來今日係決定可唔可以繼續一齊落去嘅日子⋯」我望住雨水落下，喺心裏默默地道





我加快腳步朝住商場嘅方向行去，佢大概已經到咗商場外而嘅公園，其實都唔係啲咩公園，只係一個休憩區

最近呀⋯我同岑諾新嘅關係都好一般，已經冇之前咁好⋯

雖然我同佢地冇出聲講，但其實我心裏都係感覺到，我同佢之間冇之前咁⋯親近？好似多咗一層隔閡⋯

我行到商場附近，離遠見到岑諾新嘅身影，佢果然已經喺休憩區等緊我，我嘅心跳不禁加快

我覺得緊張，因為想知道佢到底想同我講啲咩，大概十不離九都會提到孫慧伶同張景彥分手嘅事，我嘅直覺係咁樣覺得

我企喺原地深呼吸，好讓自己有足夠嘅勇氣面對接住落嚟嘅事，問出我想問佢嘅嘢⋯

正當我深呼吸後準備再邁步嘅同時，我見到一個身影朝休憩區小跑過去，我一怔定住了腳步，再一次企喺原地

「點解孫慧伶會喺度⋯？」我心裏不禁問道





孫慧伶小跑到休憩區，佢直接一下子撲向岑諾新跑嘅懷中，佢毫不猶疑咁攬住人地嘅男朋友⋯

我呆呆地企喺原地，心裏失望、難過、慌張⋯就喺一刻間，我就好似窒息一樣難受

我就好似冇勇氣邁出一步一樣企喺原地，大腦一片空白

岑諾新微微耷低頭望住孫慧伶，明明因為今日落雨令入夜後嘅天色變得更暗，明明我冇見到岑諾新望住孫慧伶嘅表情，但我總感覺到佢望佢嘅表情一定好溫柔⋯

「點解唔推開佢⋯？」我定睛望住喺遠處嘅兩人，「佢想同我講嘅嘢，就係咁樣⋯？」

雨愈嚟愈大，落到地上嘅雨水一直跳動着，我完全冇在意自己嘅長褲已經比雨水打濕，迎面而嚟嘅雨水即使打喺我臉上，我都冇在意

我只係企喺原地，望住喺公園嘅兩人⋯








IG Link: https://www.instagram.com/nd_cotttoncandy/?hl=zh-t