［愛情純愛］既然忘記唔到佢，不如試下中意我⋯？: 139. 一樣的結果

呢一刻嘅我思緒有啲混亂，有帶着猜忌嘅不安，對自己唔自信嘅不安⋯

我換咗套衫打算出去行一陣，行去邊度都好，想行一陣

我漫無目的地喺街上行，行下行下就行到海傍⋯帶着海水鹹味嘅微風吹過，我雙手捉住手機，一個人帶着煩惱同所有思緒緩步行⋯

「明明佢地咩都冇發生⋯我到底擔心啲咩⋯？」我不禁喺心中問自己

耳機裏播着嘅歌，我都冇心情聽落去，大腦中灰濛濛一片，我都唔知自己嘅擔心從何而來





「佢地只係一齊做個project，晏就嗰陣只係講咗兩句⋯」我喺心中對自己勸解着，「佢地咩事都冇呀⋯」

我喺心裏一直對自己解釋，咁佢地又真係咩事都冇呀，佢地又真係單純地一齊講兩句⋯更諷刺嘅係我自己今日先同詠妍佢地講，大家同一間學校，佢地又同一科，咁見到講兩句都唔出奇

但呢句出自我口嘅事實，卻冇講到比自己嘅心聽⋯到頭嚟在意緊嘅人，係我⋯

「唉⋯」我行到一個欄杆前，雙手捉住欄杆，背靠住大海坐到欄杆上，坐穩後180度轉身，面向維多利亞港，雙腳踩喺石壆上

海水嘅鹹味，就好似眼淚嘅鹹味一樣⋯入到心，烙喺腦⋯





「小姐，你一個人？識個朋友？」

忽然有人企喺我隔離，雙手搭喺欄杆上對我問道

「唔接受搭訕⋯」我瞄咗佢一眼後，淡然地講道

張景彥自顧自地坐到我旁邊，同我一齊望海

「我地本來就識，唔算搭訕。」張景彥望住對岸問道，「你一個人喺度做咩？」





「坐下。」我淡然地講道，望咗佢一眼，「你做咩又喺度？」

「同friend食完飯，行一陣再番去。」張景彥笑咗一笑

我同張景彥都靜咗落嚟，冇再講任何嘢，我望住前方，張景彥微微耷低頭

「做咩最近去到邊都見到佢⋯」我喺心裏默默抱怨，「連個天都想逼我同佢做番朋友⋯？」

我同張景彥之間仍然保持着一段距離，我地冇掂到對方，亦冇刻意咁同對方坐近，或者呢10cm嘅距離，係我地對彼此友好嘅表現

「你有冇聽岑諾新講，佢地Physics project分到喺同一組？」張景彥先開口主動問道，我心裏一顫，原來孫慧伶都有同佢講

「嗯，佢有講。」我微微點頭，本來被微風稍微吹散嘅愁緒，因為佢一句又重新歸位

我回答咗張景彥嘅提問後，佢又默默地安靜咗落嚟





「嬲唔嬲？」張景彥過咗一陣之後緩緩開口問道

「可以嬲啲咩⋯？又唔係佢自己揀⋯」我無奈地笑咗一笑

如果話係佢自己揀入孫慧伶嗰組，所以先同孫慧伶同一組，咁我都就話可以嬲啫，但宜家又唔係

我可又嬲佢啲咩⋯？如果我因為咁樣而嬲咗佢，佢或者會覺得我小氣、唔體諒佢⋯

「如果係佢自己揀嘅話，我可以嬲，但佢唔係⋯」我微微耷低頭苦笑道，「所以⋯」

我搖搖頭，提手將被微風吹亂嘅髮絲撓到耳背

張景彥望向我，飲一啖拎喺手中嘅奶茶，然後又望向前方；佢微微耷低頭，若無其事地笑了笑





「孫慧伶都有同我講。」張景彥望我一眼後講道

「嗯⋯」我輕輕抿唇後點點頭，我抬眼望咗佢一眼，「所以你，嬲佢？」

「嗯？冇呀～」張景彥深呼吸一口後，嘴角微微上揚，我都唔知道佢呢個笑容代表住啲咩，「冇嬲嘅意義，就算我嬲又好，唔嬲都好，結果⋯應該都一樣⋯」

「一樣⋯都係嘅⋯」我了解地點點頭，「就算嬲，都唔會有咩改變⋯佢地都唔會再分過組，算啦～都係做個project啫～」

張景彥望住我，我同佢對望着，我輕輕抿唇，佢拎住奶茶嘅手捉住杯邊，杯上嘅水珠沿住杯邊滑下

「你⋯有嘢想講？」我不禁問道，我總覺得佢好似有啲嘢想講

「有時覺得，做朋友比較好，冇咁多顧慮。」張景彥望住我講道，佢不以為然地笑咗一笑，「亦唔洗計較啲咩，明就明，唔明就唔明。」

「嗯⋯」我聽到佢講嘅嘢後，我默默地耷低頭，從手機黑色嘅螢幕中望住自己嘅倒影，「都係⋯」





的確做朋友比較好，我唔需要再刻意討佢歡心，我做自己就可以；佢唔會因為我做嘅嘢而覺得厭煩，唔會抱怨，我唔會覺得佢冷淡定熱情

張景彥望向我，對我微微一笑，我忽然間都好似鬆一口氣一樣，將我抗拒佢嘅嗰面牆拆咗落嚟

⋯

星期一

經過咗星期六、日之後，我同岑諾新嘅「冷戰」都結束，我都冇點將佢同孫慧伶一齊做Physics project嘅事放到心上，畢竟佢地都係一齊做個project啫

「我地約咗星期四放學留低喺學校。」岑諾新行到我身旁講道








IG Link: https://www.instagram.com/nd_cotttoncandy/?hl=zh-t