［愛情純愛］既然忘記唔到佢，不如試下中意我⋯？: 138. 怕⋯

我見佢主動拉我到佢嘅懷中，我伸手攬住佢嘅腰，將佢抱緊

屬於佢嘅味道傳到我嘅鼻中，聞到佢身上嘅味道令我覺得好安心，佢就喺我嘅身邊

「你要勒到我透唔到氣啦⋯」岑諾新細聲無力地講道，我先發現自己嘅雙臂不自覺地收窄得過份

「Sorry⋯」我頓時鬆開雙手，但岑諾新喺我鬆手時又即刻將我嘅雙手捉住，放番喺佢嘅腰上

我將佢攬實唔放手，臉頰喺佢嘅鎖骨前蹭了蹭





「要等兩日先可以再見你⋯想攬多一陣⋯」我帶着少許撒嬌嘅語氣對佢講道

「好，當然可以。」佢朝我微笑道，佢對我講嘢嘅聲線就好似寵着我一樣溫柔

我唔知道我沉迷喺佢嘅溫柔中係唔係一件好事，但至少呢一刻佢喺我面前，我就想要佔有⋯

我緩緩地耷低頭，躲喺佢懷中迴避佢嘅視線，岑諾新將下巴微微靠喺我額上

我感覺我嘅心又比佢一點一點咁逐漸溫暖着





「岑諾新，你身上嘅味道好好聞⋯」我合上雙眼漫不經心地講道

「嗯？」岑諾新嘅聲線帶點愕然，然後聽到佢笑一笑，「比你剎咗一個措手不及。」

「咁係嘛～」我笑一笑講道，用笑容掩蓋心事，「就係覺得你好香好好聞～」

我抬頭望岑諾新，只見佢紅了耳根，無言以對之餘又覺得難為情

「好啦好啦，唔玩你啦！」我鬆開雙手，回頭指一指大堂嘅大門，「我番去啦，你番到去話我知啦！」





「嗯，好啦，我嗰組confirm咗時間之後，我再同你講。」岑諾新微微點頭，企喺原地直到我入咗大堂

我番到屋企，坐喺梳化上發一下呆，然後先起身拎埋書包番房

我灘低喺床上，有種難以言喻嘅攰喺心裏滲出嚟，我拎起手機，提起手，手機螢幕一亮

「唉⋯」我不禁嘆一口氣，「點解今日會咁攰？」

X⋯X⋯X

喺我番到屋企嘅時候再睇手機，已經見到佢地開咗個Physics細project group

「番到屋企」但我選擇先喺IG同蔣倩盈報到

蔣倩盈：Okay！





我望住蔣倩盈回覆我嘅一個「Okay」，諗起今日嘅佢⋯今日嘅佢同平日嘅佢有啲唔一樣⋯

佢好努力咁表現出佢同平時一樣，但一睇就知道佢今日唔同，感覺佢好似有啲心事，有啲事冇同我講，揀咗一個人收起晒所有心事，仲要喺我面前扮到冇事一樣

我再三問佢，但佢都話佢冇嘢，我唔知道佢煩緊啲咩⋯

眼見佢努力咁掩飾，我心裏有啲⋯唔開心，做咩要對我掩飾咁多一樣⋯？

「呼⋯」我嘆一口氣，手肘放喺書枱上托住額，「到底煩緊啲咩⋯因為我個Physics project分組⋯？」

我拎起手機，打開IG頁面，㩒開置頂嘅對話，一直幾乎長駐首位嘅都係蔣倩盈

「你今日真係冇⋯」我將想問嘅事打咗一半，手停咗落嚟冇打埋後半部份





我諗咗一陣之後，將成句嘢刪咗

「你真係冇⋯」我又再重新打一次想問嘅事，但又係打到一半就停咗手

「唉⋯」我輕皺起眉頭，嘆一口氣，然後再一次將成句嘢刪咗

佢係因為唔想我知，所以先要扮冇事吧⋯我咁樣再追問，佢應該都係會答我冇事

「算啦⋯」我直接將手機Lock screen然後掉到一旁

我嘅手機先啱啱掉到床上，手機嘅螢幕就亮起，我無奈地伸手拎起手機望一眼，係Physics project group嘅message

我㩒開嚟睇，見佢地約緊星期四放學之後，等佢地confirm之後先再覆⋯

X⋯X⋯X





夜晚

我拎起手機，手機螢幕自然一亮，岑諾新冇send過嘢比我⋯

「嘖⋯」見到佢完全冇搵我，亦冇send啲咩post比我，我心裏有啲煩躁，「唉⋯」

我獨自默默地嘆一口氣，算啦，係我先同佢講冇嘢⋯我唔可以怪佢唔搵我

「佢地Physics project喺同一組⋯」我灘喺床上望住天花板喃喃自語，「岑諾新嘅心入面，係中意我多啲，定中意孫慧伶多啲⋯？」

我明明⋯可以直接問佢⋯但我偏偏冇勇氣開口問佢一句「你中意我多啲定孫慧伶多啲？」

其實我唔係怕佢嘅回答，我怕嘅係見到佢回答時嘅猶疑不決⋯怕佢明明講中意我，但眼神裏卻裝滿遲疑⋯我怕，所以唔敢問出口⋯








IG Link: https://www.instagram.com/nd_cotttoncandy/?hl=zh-t