［愛情純愛］既然忘記唔到佢，不如試下中意我⋯？: 113. 不了解

孫慧伶同我對上視線，佢住嘅地方比蔣倩盈住嘅屋苑更後，我屋企則比蔣倩盈住嘅地方前

所以呢度剛好係我同佢番屋企嘅必經之路⋯

孫慧伶徑直朝我行嚟，我當見唔到佢一樣移開視線，打算直接從佢身邊走過就算

孫慧伶行到我面前，擋住我嘅去路，我行向左邊，佢又行向左邊；我行去右邊，佢又跟住我行去右邊

「你想點⋯？」我先開口問道





「冇想點。」孫慧伶微微一笑，緩緩搖頭

「嗯。」我點一點頭，微微側身從佢嘅身旁走過

「等、等等⋯！」孫慧伶轉身直接拉住我，我有啲不情願咁回頭望佢

「嗯？」我回頭望向孫慧伶，佢嘅手捉住我嘅手腕，我轉動着手腕將佢嘅手甩開，「仲有事？」

「新⋯」孫慧伶叫咗我一聲





聽到呢個稱呼，出自佢把口⋯覺得好熟悉同時，又覺得有種唔自在嘅感覺

「你真係變咗⋯」孫慧伶耷低頭笑一笑後抬頭望住我對我講道，「變咗⋯好多⋯」

「嗯，人都會變。」我輕輕點頭，「你會變，我當然都會變。」

「你同之前嘅你好唔一樣⋯」孫慧伶對我微微一笑講道

「係咩⋯」我移開視線





好唔一樣⋯都係嘅⋯我本來對孫慧伶，就唔會用呢種任何人都聽得出嘅冷淡語氣，亦唔會咁冷漠

「嗯！」孫慧伶點點頭，微微耷低頭嘅同時雙手放喺身前輕扣着，「我真係只係想同你做番朋友⋯但如果你仲因為嗰陣嘅事嬲我嘅話⋯」

「我冇嬲。」我直接回答道，「而且過咗去已經。」

「新，我地做朋友，可以嗎？」孫慧伶微笑問道，佢總係咁樣扮出一副善良又無害嘅表情

「孫慧伶，我地真係冇做番朋友嘅必要。」我講道

「新⋯你真係變咗，變得好冷淡⋯」孫慧伶苦笑道

「我本來就冷淡，只係你唔了解我。」我講道，心裏已經有啲唔耐煩

「同你做朋友，我冇其他意思⋯」孫慧伶平靜地解釋道，「希望你唔好誤會我⋯」





「嗯，冇誤會。」我淡然地講道，然後望一望手機顯示嘅時間，「就係咁。」

我轉身就走，唔想再同佢喺「做唔做番朋友」呢個問題上爭拗

對我嚟講，孫慧伶只係過去，就係咁樣

⋯

我番到屋企之後，將書包掉低喺房門邊

「呼⋯」我行到床邊坐低，然後將校呔拉鬆

我將校呔除咗落嚟，順手就將條呔掉到書枱上，解開兩粒衫鈕，向後灘低喺床上





喺啱啱見到孫慧伶嘅時候，我嘅心裏只有一個想法⋯

快啲結束話題，離開現場⋯！

我唔願意去面對孫慧伶，因為喺孫慧伶嘅面前，我會渾身唔自在⋯我唔愛佢啦已經⋯但佢係我嘅過去嘅一部分，所以令我格外唔自在⋯

企喺孫慧伶嘅面前，會令我諗起以前嘅我有幾愚蠢⋯為咗佢，好似將自己變成咗一個唔似自己嘅人

「我真係只係想同你做番朋友⋯但如果你仲因為嗰陣嘅事嬲我嘅話⋯」

腦海裏忽然浮現出呢一句，感覺好討厭

佢同我分手嘅時候同我講，覺得我同佢唔夾，試亦已經試咗，但真係唔夾，所以分手呢個決定，係對我同佢都好

當時佢苦笑着，但我卻冇感覺到佢內心有半點抱歉嘅感覺





我知道，「唔夾」只係用嚟同我分手嘅借口

「其實，係冇新鮮感所以先要分手⋯？」我當時想直接問佢，但我最終冇問出口

當下，我唔想知道答案，亦冇勇氣去知道答案

孫慧伶拋下一句分手就轉身離開，我有啲無奈⋯有啲難受⋯但我唔可能，改變佢嘅決定⋯

「做陌生人都幾好呀⋯」我用前臂蓋住雙眼，細聲地講道

呀⋯忽然間好想見蔣倩盈⋯

X⋯X⋯X





「唔⋯明明記得喺書度睇過㗎⋯」我拎住教科書專注地搵緊我要搵嘅嘢

明明嗰日上堂嗰陣，無意間有睇到呢題嘅答案，但宜家我搵唔番嗰一頁

呃⋯係呀，我做緊功課⋯雖然唔多想做，但都要做㗎～

不過呢份功課係後日交，唔係聽日嘅功課嚟，我都係做定先，反正都冇嘢好做，又唔想睇手機，亦唔想睇電腦，咁就做功課啦～

「Di、Di⋯」放喺筆袋隔離嘅手機震咗震同時亮起螢幕，我順手地拎起手機睇

「岑諾新？」我見到係岑諾新send message比我

岑諾新：忙緊？




IG Link: https://www.instagram.com/nd_cotttoncandy/?hl=zh-tw