［愛情純愛］既然忘記唔到佢，不如試下中意我⋯？: 112. 一絲不安

岑諾新行番埋嚟嘅時候，同我對上視線，我望住佢時佢又望住我，我只係笑咗一笑，等佢執好嘢之後同佢一齊番屋企

「行得。」岑諾新孭起書包對我講道

「咦⋯櫃桶嗰個嘢唔拎埋呀？」我瞄到喺佢嘅櫃桶中仲有嘢未拎

「櫃桶⋯唔係我㗎，唔知邊個喺呢個課室上完堂冇拎番走。」岑諾新伸手將放喺櫃桶嘅嘢拎咗嵋嚟，係一個三層卡套

「嗯？邊個㗎咁係？」我行到岑諾新嘅身旁，我見到卡套中有放學生證，「睇下學生證係邊個嘅～」





岑諾新將放喺卡套中嘅學生證拉咗出嚟，我呆咗一呆，學生證上印住孫慧伶嘅學生相，當然學生名同班別都係孫慧伶嘅名同班別⋯

「呃⋯」一把聲音傳嚟，我先抬頭望向聲音傳嚟嘅方向，望到孫慧伶入咗嚟企喺岑諾新嘅座位旁，「係我唔小心漏咗喺度⋯」

岑諾新將卡套遞比孫慧伶，孫慧伶接過卡套

「唔該⋯」孫慧伶對岑諾新講道

就喺佢地兩人對視嘅一刻，我忽然間覺得有啲不安





佢地之間嘅對視並冇維持好耐，孫慧伶拎番卡套之後便轉身走，岑諾新望向我時，我回神過來抬頭望佢

「番去？」我開口問道

「嗯。」岑諾新回答

唔知係唔係我多心，定我聽完前兩日詠妍講嘅嘢所以先有咁樣嘅不安感

前兩日詠妍話聽講⋯只係聽講，孫慧伶同張景彥嗌咗交⋯如果因為咁樣，所以孫慧伶搵番岑諾新嘅話⋯





「諗緊咩？」岑諾新微微俯身低頭望向我

「嗯⋯？」我回過神時，已經見佢定睛望住我，「冇咩呀～」

我習慣性地笑一笑，邊有人可以對一個自己唔中意嘅人咁好⋯？

「攰？」岑諾新問我

「唔係，只係⋯發個呆啫～」我提手挽住佢嘅手臂，我冇話比佢個我其實諗緊咩

如果同佢講，佢會唔會覺得我唔信任佢？所以咩都唔講就最好⋯應該係⋯

「有咩就同我講。」岑諾新淡然地拋下一句，伸手摸摸我頭

「嗯⋯」我點點頭，「好呀～但我地課室用嚟上咩elective？」





「唔⋯」岑諾新靜咗一靜，我同佢都諗緊我地課室會用嚟上咩堂，「好似係Econ。」

「哦～」我點頭表示了解，孫慧伶好似又真係讀Econ，「孫慧伶坐你個位呀？」

「應該係。」岑諾新若無其事地回答道

「哦⋯」我微微點頭

「做咩呀？唔開心？」岑諾新一眼就睇穿我嘅心事一樣，「我都係去到啱啱拎出嚟，先知係佢嘅。」

我冇回答佢，而係直接走到佢嘅面前面向佢擁抱佢，將頭埋喺佢嘅頸窩，代替我想要講嘅嘢

「拜托你⋯唔好番去孫慧伶嘅身邊⋯」我喺心中默默地講道





「放心⋯」岑諾新只係講咗兩個字

佢就好似知道我心入面諗緊啲咩一樣，知道我擔心緊嘅事，而叫我好好放心一樣

「嗯⋯」我用喉嚨發音，細聲地嗯一聲

我希望，我地可以一直落去

岑諾新，你唔好番去孫慧伶嘅身邊⋯

X⋯X⋯X

我同蔣倩盈分別之後，我一個人踏上番屋企嘅路

行喺路上嘅時候，我邊行邊睇手機，因為自己一個人嘅時候唔睇手機嘅話會好唔習慣





拎喺手中嘅手機忽然震一震，螢幕一亮，我望住彈出嚟嘅訊息通知輕輕皺起眉頭

孫慧伶：今日仲諗緊個卡套去咗邊，原來漏咗喺你櫃桶

我有啲疑惑，對於佢突然間搵我

孫慧伶：你拎卡套出嚟嘅時候，有冇見到張八達通？

「冇」我回覆重點道

今日我拎出嚟嘅時候，入面淨係放咗張學生證同一張唔知咩卡，根本就冇見到八達通

孫慧伶：好啦～咁我再搵下，可能放咗喺其他地方





我睇完佢嘅message就冇覆佢，反正都冇覆嘅必要，佢想知嘅嘢，我都已經答咗佢

孫慧伶：你地班調咗位？之前好似唔係你坐呢個位

我瞄咗手機一眼，然後又將手機鎖上

「⋯」我抬眼嘅瞬間，見到孫慧伶就企喺我面前




IG Link: https://www.instagram.com/nd_cotttoncandy/?hl=zh-tw