［愛情純愛］既然忘記唔到佢，不如試下中意我⋯？: 109. 對他的感覺

記得喺佢生日嘅時候，我知道佢中意啲咩，特登買咗比佢，但結果換嚟嘅，係佢臉帶笑容但卻毫無感情嘅一句「多謝」

當你好中意一個人嘅時候，呢份感情真係會蒙蔽你嘅雙眼⋯你會努力地為一段唔會有結果嘅感情付出，你會睇唔到喺你嘅背後做盡一切討你歡心嘅人⋯

「真係好傻⋯」諗起以前嘅自己嘅我都不禁嘲笑自己，「不過，我唔會再咁傻啦⋯」

⋯

翌日因為係假期，唔洗番學，所以我反正喺屋企都冇嘢做啦，就同詠妍傾下電話





主要係我想將琴日嘅事話比詠妍知，我唔會特登瞞住詠妍唔同佢講，我最放心將我嘅心事話比佢知

「佢搵番你都好，你一定一定一定！唔可以心軟理佢呀！」詠妍再三對我強調道，「一定唔可以呀！佢之前咁樣對你，而且蔣倩盈你唔好唔記得，你有岑諾新㗎啦！」

「我知啦⋯我又冇講啲咩，你唔洗咁大反應啦⋯」我無奈地講道，「都唔知佢想點，莫名其妙⋯」

「理佢想點呀！總之你一定唔可以對佢心軟就係！」詠妍堅持地講道，「佢嗰陣咁樣對你，當晒你係水泡咁，宜家佢又無啦啦搵番你，都唔知佢有啲咩心思就真！」

「我都覺得奇怪就係，突然間同我講生日快樂⋯」我輕皺起眉頭，「但你放心啦，我唔會心軟。」





「但聽講⋯算啦，都係冇嘢啦。」詠妍忽然間欲言又止，將說話講一半又唔講一半

「吓吓吓？」佢嘅欲言又止激法咗我嘅好奇心，「咩呀咩呀？唔好講一半又唔講一半啦！」

「唔⋯聽講嘛，最近佢地，呃⋯即係張景彥同孫慧伶，好似關係唔太好⋯」詠妍吞吞吐吐地講道，「我都係聽講啫，又唔一定係嘅，不過我唔知佢會唔會真係咁過份，因為咁樣就搵番你啦～」

佢同孫慧伶最近嘅關係唔太好⋯？嗌交啦⋯？但感覺又冇咩可能

張景彥佢又特別中意孫慧伶，應該咩都會遷就佢就係，關係唔好呀⋯





「我又唔係以前嘅我⋯」我無奈一笑講道

「你識咁諗就最好啦⋯佢以前點對你，我都知⋯」詠妍好似都係有啲擔心，「你同咗岑諾新一齊㗎啦！雖然一開始一齊嘅原因就唔係你地互相中意嘛⋯」

聽到詠妍咁講，我諗起一開始我同岑諾新一齊嘅原因⋯

我地之所以一齊，的確係因為孫慧伶同張景彥嘅關係，但我覺得宜家嘅我地關係唔錯呀～

雖然岑諾新佢，一直都冇講過一句過佢中意我，但我感覺到，佢應該係中意我嘅

不過喺佢親口講出佢對我嘅感情之前，我都唔敢100%去肯定佢對我係抱住咩嘅想法

「嗯⋯不過我覺得宜家好好呀～」我諗起琴日嘅kiss時笑一笑講道，「至少宜家，我對佢係戀人嘅感覺，大概⋯」

「哦～哦～哦～」詠妍頓時比反應，我完全唔洗望到佢個樣，都知喺電話另一邊嘅佢正擺出一副點嘅表情，「戀人嘅感覺呀～即係你已經完全中意佢啦～」





「完全就唔敢講，但我的確中意佢⋯」我喺提起岑諾新嘅時候，腦海中諗到嘅全部都係令我心動嘅畫面，「同佢一齊之後，發現真係好多嘢都唔一樣⋯」

「咁唔係一件好事咩～」詠妍笑一笑問我，「對你嚟講。」

「都係嘅～」我冇否認嘅打算，「的確係好事。」

「既然係好事，就繼續咁樣落去啦～」詠妍講道，感覺詠妍好擔心我會因為張景彥嘅突然出現而又走回頭路

如果張景彥再早啲搵番好⋯成件事，又會變成點⋯？

「嗯，當然會繼續落去。」我肯定地回答道

喺收咗線之後，我坐喺書枱前發呆，諗起詠妍話張景彥同孫慧伶好似嗌咗交





「如果係因為咁樣而搵番我嘅話⋯」我喃喃自語道，然後不禁冷笑，「都太過份啦掛⋯」

算啦⋯我都係繼續同佢保持距離就好了⋯我唔想再好似以前一樣啦已經

夜晚我沖完涼之後，都已經大概11點半，對我嚟講呢個時間都唔算夜，平時成日都係去到2點幾先瞓

我坐低喺書枱前，將搭喺頸上嘅毛巾扯咗落嚟，瞄咗一眼手機嘅螢幕

「唔知佢做緊咩⋯」我不禁諗道，然後拎起手機，心裏有股想打電話比佢嘅衝動，「但佢會唔會唔得閒⋯」

我搵到佢嘅手機號碼，但卻猶疑緊㩒唔㩒「call」打比佢

「算啦⋯打比佢啦⋯」我最後都係㩒咗「call」打電話比佢

「嘟嘟⋯嘟嘟⋯」電話裏頭傳嚟撥號中號聲音，我好似從來都冇真係咁樣打電話比佢，有啲緊張，「嘟嘟⋯嘟—咔！喂？」





「喂？」我緊張地開口，「係我啦⋯！」

「哈⋯我知道。」岑諾新笑咗一笑，「我有save你電話，做咩呀？」

「唔⋯掛住你唔得咩！」我將後半句說話好快地講出口

「咩呀？你講咩呀啱啱？」岑諾新完全係明知故問嘅語氣

「我話我掛住你所以打比你⋯！」我伏喺枱上講道，用嚟掩蓋我嘅害羞

「哦～好呀～」岑諾新回答道








IG Link: https://www.instagram.com/nd_cotttoncandy/?hl=zh-tw