［愛情純愛］既然忘記唔到佢，不如試下中意我⋯？: 108. 為什麼？

我感覺到拎住花嘅手嘅手心正在冒汗，好緊張⋯點解啱啱咁突然就⋯錫落嚟⋯？

「咩點解⋯」岑諾新盡力保持平靜嘅聲線，但聲線卻冇為佢掩飾佢嘅害羞，「可以有咩點解⋯」

「你咁突然咁⋯！」我稍微鼓起兩泡腮，然後細聲地道，「都⋯唔比心理準備我⋯」

「仲要比心理準備⋯？」岑諾新一臉無奈地講道，然後笑一笑，「洗唔洗搵你秘書book一book時間？」

「哪來嘅秘書？」我比佢講嘅嘢逗笑了，「我嘅秘書係邊個？你呀？」





「所以我唔洗book時間。」岑諾新伸手摸摸我頭，但我感覺，佢更加似係撥亂緊我啲頭髮

岑諾新轉身拎起書包，將書包孭到背上；我孭起書包，手上仍然拎住嗰枝花

「你唔收起佢？」岑諾新問我

「唔啦～」我搖搖頭，「想拎住～等陣⋯」

我拉住佢，將枝手放喺佢面前，當佢係一個佈景板一樣為我呢個生日禮物影咗張相





「Okay～行得啦～」我講道

我行喺岑諾新前面，回頭望向佢，自然而然地朝佢伸手

喺行出課室嘅時候，見到張景彥朝我地迎面行嚟，我冇望向佢，因為呢一刻嘅我，眼中只有岑諾新

⋯

我將枝花放喺我嘅書枱上，望住枝花，心裏甜絲絲的





「靚靚～」我心情愉悅地望住枝花講道，「呀⋯po張相先～」

我喺自己嘅IG將花嘅相po咗出嚟，順手地@埋岑諾新，caption上寫道：「17歲的我與您」

喺我正準備放低手機之際，手機嘅上方彈出一個dm message通知

張景彥：生日快樂

我，要唔要覆佢⋯？唔⋯都係出於禮貌覆佢一下啦⋯畢竟人地同我講生日快樂，唔覆好似好過份⋯

「多謝」我出於禮貌回覆道，我仲以為，佢連我幾時生日都唔知添⋯

張景彥：生日開心就好

我就咁like咗佢嘅message就算，like咗當覆咗就算啦⋯唔覆更多啦⋯





手機嘅上方不斷彈出邊個邊個like咗我張相嘅通知，正當我諗緊岑諾新將幾時睇到嘅時候，通知就彈出佢嘅名，話我知佢like咗我張相同時，佢喺我嘅po下面留咗一個comment：「17歲的佈景板與您」

「噗⋯」我忍唔住笑咗出嚟，佢講緊自己係我張相嘅佈景板，「咁可愛得唔得㗎～」

詠妍：放晒閃咁，關係好好啦～

我收到詠妍嘅dm，見到佢嘅message，我嘅嘴角微微上揚

「最近都係幾好嘅～」我回覆道，「所以還不錯嘛～」

詠妍：睇得出睇得出！你地最近成日都一齊添⋯

詠妍：唔洗要我啦！你恰我單身啫⋯





「冇啦，難得我放低咗，唔係好事咩」

詠妍：咁呢個係一定嘅，唔好再諗住佢就係啦，有咁多好男仔，唔要佢都唔緊要

我將手機放低喺枱上不禁開始沉思起嚟

的確，好男仔有好多，我真係冇必要執着喺張景彥身上⋯

「到底你想點⋯」我望住手機嘅螢幕，望住彈出嚟，來自張景彥嘅IG dm通知，「大家各行各路咪幾好⋯」

望住張景彥send過嚟嘅message，我真係唔知要比啲咩反應，雖然最直接嘅係唔比反應⋯

喺我仲同張景彥一齊嘅時候，我嘅生日，佢只會輕描淡寫地同我講一句生日快樂⋯

唔會有禮物，唔會有驚喜，唔會有擁抱⋯我曾經亦會好期待，佢會唔會比啲咩驚喜我，會唔會喺我生日嘅時候買一份禮物比我，我想要嘅，唔係啲咩好貴嘅禮物，亦唔需要名牌嘢，對我嚟講，只要收到一張佢嘅手寫卡都會覺得好開心





但當然，對於心底只有孫慧伶嘅張景彥嚟講，佢唔會有咁樣嘅心思放喺我嘅身上⋯

我真係早就知道佢中意孫慧伶，我係幾時發現㗎呢⋯？係喺一次咁啱撞見佢同孫慧伶傾計，見到佢臉上嗰個從未對我露出嘅笑容？係喺一次見到佢手機入面有孫慧伶嘅相，然後察覺到佢嘅心虛？定係幾時⋯？

我好似，都唔清楚到底係幾時發現呢件事⋯

但當時嘅我，實在太中意張景彥⋯我好天真咁以為，我只要努力對佢好，令佢見到我好嘅一面，就可以令佢中意我，但原來呢件事，喺我同佢之間從未出現過

張景彥就好似連機會都唔比我一樣，佢對我嘅感情⋯嗰種唔係發自內心嘅中意嘅感情⋯喺佢對我嘅態度中、行為中、眼神中都話緊比我知⋯




IG Link: https://www.instagram.com/nd_cotttoncandy/?hl=zh-tw