［愛情純愛］既然忘記唔到佢，不如試下中意我⋯？: 87. 在意⋯？

「Okay啦⋯」我行到岑諾新嘅面前，「我地行後梯番去呀⋯！」

我拉住岑諾新朝後梯嘅方向行去，我怕行前梯嘅話又會見到張景彥，其實見到佢冇咩，只係會尷尬啫

我偷偷地望岑諾新一眼，然後又耷低頭，明明我都冇做啲咩唔見得光嘅事，我心虛啲咩呀到底⋯？

「呃⋯啱啱其實我冇諗過佢會捉住我⋯」我下 意識就開口解釋起嚟

「我知。」岑諾新望向我，「見到你嘅反應。」





「嗯⋯」我點點頭，不禁用力地捉住本書

可能係因為我因為不知名原因而心虛嘅關係，我會覺得岑諾新嘅語氣有啲冷淡

「你做咩要特登解釋？」岑諾新輕輕一笑後問我

我做咩要特登解釋？係囉，點解我要解釋比佢知⋯？明明我就冇做啲咩違背承諾同對唔住佢⋯嘅事⋯

我解釋係因為⋯係因為⋯





「冇呀～就係想解釋一下～」我以笑容遮蓋過真實嘅想法

因為⋯我怕佢會誤會我⋯

岑諾新忽然一下子捉住我嘅右手手腕，我疑惑地抬頭望向佢，但佢就好似冇事發生一樣繼續行

「捉住我做咩？驚我走失呀？」我開玩笑地問道

「唔係⋯」岑諾新一副欲言又止嘅表情望住我，下一秒就鬆開我隻手，「咩事都冇⋯」





岑諾新講完就徑自前行，我愣住喺原地，佢捉住我嘅右手手腕嘅位置，就係啱啱張景彥捉住我嘅手腕嘅位置⋯

「岑諾新佢⋯」我喺心中欲言又止，想估佢嘅諗緊啲咩，但亦唔敢諗佢諗緊啲咩

呢一刻嘅我，有啲怕，怕又會變成咗自己嘅自作多情⋯人就係會喺錯誤中學習，錯咗一次，撞咗一次板，下一次就會知道唔應該點做，我撞咗一次板，所以唔敢諗太多

「你要企喺度企到幾時？」岑諾新行到去平台，回頭望向仍然企喺樓梯中段嘅我，「唔番課室？」

「呀？」我回過神望向佢

岑諾新定睛望住我，我連忙落樓梯行到佢嘅身旁，同佢對望咗一眼

「番課室啦～」我先邁步落樓梯，我行咗兩步回頭望一望岑諾新，「你企喺度唔行做咩呀？行啦～」

岑諾新若有所思地喺原地企多咗兩秒，回神過嚟先落樓梯，我有啲好奇佢啱啱發咩呆





我同岑諾新番到課室，反正詠妍佢地都未番嚟，咁我就先同岑諾新一齊啦～

「你仲拎住本書？」岑諾新問坐咗喺佢前面座位嘅我，然後將本書從我手中拎走，「人地拎過特別好？」

「咩呀⋯」我無奈地望一望岑諾新，「我本來都打算讓比佢，係佢夾硬塞比我⋯」

「哦，聽住先。」岑諾新點點頭，但明顯係唔信我講嘅嘢

「比番我啦！」我瞄咗一眼佢嘅手，然後將本書從佢手中搶番過嚟，「宜家就真係特別好啦～」

「哦，係咩？」岑諾新聽到我咁講之後，臉上掛上淡淡嘅笑容，但卻用一種唔在意嘅語氣講道

「係呀！」我加重語氣對佢講道





我將本書放喺我大腿上，不自覺喺抬頭後，視線就落喺岑諾新嘅身上，我同佢對望着，我嘅心不禁加快咗跳動嘅速度；岑諾新托着腮， 微微側着頭定睛望住我

比佢咁樣望住，我頓時覺得渾身唔自在⋯坐都坐得唔舒服，我回頭望向課室門口，借機回避一下佢嘅視線

佢係點做到臉不紅耳不熱咁一直定睛直視我？我心都要跳出嚟啦⋯！佢完全唔會唔自在一樣

我望向走廊，見到孫慧伶喺外面同佢嘅朋友一齊，經過我地課室朝廁所嗰邊行去

「孫慧伶⋯」我喺心裏默唸佢嘅名，「差啲就，唔記得咗呢個人⋯」

我差啲唔記得咗孫慧伶嘅存在，對岑諾新嚟講，孫慧伶宜家到底喺佢心中咩位置⋯？對岑諾新嚟講，佢嘅內心，會唔會仲係在意孫慧伶？

喺佢嘅心中，大概一定會有孫慧伶⋯畢竟，孫慧伶係佢嘅初戀⋯

放喺裙袋嘅手機忽然間震咗兩下，我拎出手機睇，見到係岑諾新喺IG send咗message比我，正確嚟講，係send咗張圖比我





岑諾新伏咗喺枱上，頭側着靠着左手前臂上

「send啲咩比我⋯」我無奈地解鎖手機，睇佢send咗啲咩比我

我一㩒入張圖，就見到岑諾新影住自己隻右手，將我嘅髮圈影咗比我睇⋯唔係影咗孫慧伶比我睇呀⋯

「影比我睇做咩⋯」我無奈地伸手推起佢嘅冷衫衫䄂，將戴喺佢手上嘅髮圈影番比佢睇，「我都影到啦，影得好睇過你添呀⋯」

「意思唔一樣。」岑諾新淡然地講咗一句，然後默默地將衫袖拉番落嚟

「吓⋯？」我有啲唔明白佢嘅意思，呆呆都吓咗一聲，「即係點呀⋯？」

「估下。」岑諾新露出一個意味深長嘅微笑然後企起身，「我去廁所。」





我滿腦子都係問號，但佢就起身去廁所，我嘅視線鎖喺佢身上，望住佢行出課室後先將視線收回

「即係點⋯」我望住已經鎖上嘅手機螢幕不解地問道，「髮圈⋯孫慧伶⋯」

我不禁細聲地講出「孫慧伶」三個字




IG Link: https://www.instagram.com/nd_cotttoncandy/?hl=zh-tw