［愛情純愛］既然忘記唔到佢，不如試下中意我⋯？: 86. 尷尬

「蔣倩盈你真係變咗⋯」詠妍細聲地對我講道，佢好似好意外一樣

喺我望向詠妍嘅時候，詠妍笑咗一笑，輕輕拍一拍我嘅膊頭

「你終於唔再係淨係見到張景彥。」詠妍嘅語氣令我察覺到佢內心嘅安慰，我只好無奈一笑

⋯

「中文咪要做SBA嘅～你借咗書未呀？」我喺踏上樓梯嘅時候問岑諾新





我地啱啱食完飯番嚟，仲有成半個鐘先完食飯時間，我特登早啲番嚟打算去圖書館借書

「借咗。」岑諾新講道，「你未？」

「未啦⋯我打算去圖書館睇下有冇呀⋯」我講道，「不過要番課室拎一拎學生證先～」

我行入課室後快步行番自己位，蹲低喺書包前拎放喺前隔嘅學生證，我平時都係咁樣將學生證放喺書包前隔，好少會真係袋住喺身上

我將拎咗出嚟嘅學生證先放到枱上，然後將銀包從裙袋拎番出嚟放入書包





「學生證⋯」我一企起身發現啱啱放喺枱上嘅學生證消失咗，抬頭一望見到岑諾新拎住我張學生證，「你拎我張學生證做咩呀？」

我頓時伸手想將學生證搶番，但岑諾新卻拎住我張證遞高手，望住我張學生相

「喂！比番我呀！」我拍埋張櫈竹到岑諾新嘅面前，一手捉住佢垂低嘅左手，一手朝住學生證遞起，「比番我啦！」

「你拎到咪比番你。」岑諾新嘅視線落到我嘅身上，輕輕一笑對我講道

「你估我會拎唔到咩？」我不忿地講道，然後微微踮起腳尖





「矮妹。」岑諾新輕輕一笑同時望住仍然努力踮起腳尖嘅我講道

「咩⋯你話邊個矮呀！我好歹都163cm！」我微微鼓起兩泡腮，「快啲比番學生證我呀！我仲要去圖書館借書啦！」

「比番你。」岑諾新講道，然後將學生證比番我

「哼！我去圖書館啦！」我喺兩邊都嘅枱櫈中間嘅走廊行出去，行出課室從前梯上去7樓圖書館，「你做咩呀？你唔係借咗書啦咩？」

岑諾新忽然行到嚟我嘅身旁，我一臉疑惑咁望向佢，佢啱啱先話佢已經借咗書做SBA

「陪你去。」岑話新淡然地講道

聽到佢咁樣講，我嘅嘴角都忍唔住上揚

岑諾新份人的確比人一種好冷淡嘅感覺，但佢撩起嚟，都真係好識撩⋯！搞到我心癢癢的





我冇理岑諾新，一入到圖書館就行去放文學類別嘅嗰個架，雙眼掃視着每一本書

「我們仨⋯」我細聲地唸着書名，順帶一提，我揀咗楊絳嘅《我們仨》，「我們仨喺邊⋯唔會冇掛⋯？」

我將每一本書嘅書脊望清楚，睇清楚每一本書嘅書名，我們⋯咦，有啦！

我見到書架上唯一一本 《我們仨》，我頓時伸手去拎，但我嘅手都未掂到本書，就有另一隻戴住黑色手錶嘅手先掂落去本書嘅書脊

我頓時望過去，一望過去，我有啲訝異同時個腦空白一片，張景彥都要借《我們仨》？唔係呀嘛⋯

「呃⋯」我同佢都縮咗手，尷尬地對視着

「你⋯都借呢本書呀？」張景彥先開口問道，意料之外呢⋯





「嗯⋯你都打算用呢本嚟做SBA⋯？」我尷尬地點點頭

以前又唔見我地咁心有靈犀⋯宜家先嚟心有靈犀有咩用⋯？得番個尷尬喺度

「你、你用呀～我自己再出去圖書館借就得啦⋯」我連忙講道，我想盡快逃離現場

我轉身想離開呢個位置去搵岑諾新，要我一個人單獨面對住張景彥，我宜家唔會多諗啲咩，但會覺得尷尬地爆炸

「倩盈⋯！」喺張景彥叫我嘅同時，我嘅手比佢一下子拉住

「蔣倩盈，你搵到本書未？」岑諾新從前排書架行過嚟我所在嘅呢一行

「冇⋯」我立刻甩開張景彥嘅手，行到岑諾新嘅面前，「我地放學再去我地嗰邊嘅圖書館睇下⋯」

岑諾新朝我身後望咗一眼，我莫名其妙地因為有啲心虛面微微耷低頭





「嗯。」岑諾新回答後，直接拉起我嘅手拉住我行

「倩盈！」張景彥又叫咗我一聲，我同岑諾新已經離開咗書架嘅範圍

「做咩⋯？」我停咗落嚟，有啲尷尬咁回頭望向張景彥

「本書，你用啦，我另外再借就得啦。」張景彥將唯一一本《我們仨》塞到我嘅手中，「你就拎去用啦。」

張景彥將本書比咗我之後，好似為咗避免我會拒絕一樣即刻就朝圖書館嘅門口行去；我拎住本書，抬頭望咗岑諾新一眼，但我望咗佢一眼後又有啲心虛咁耷低頭

「我去借書先⋯」我對岑諾新講完後快步行到去櫃檯前

喺我企喺櫃檯時，眼尾嘅餘光見到岑諾新行咗出去圖書館，我借完書後連忙行出去，一推開圖書館嘅門就見到岑諾新企喺門外








IG Link: https://www.instagram.com/nd_cotttoncandy/?hl=zh-tw