［愛情純愛］既然忘記唔到佢，不如試下中意我⋯？: 31. 猶疑（上）

我知岑諾新好，但個感覺到對唔上，就算我想中意，但感覺唔啱都冇用㗎

「你考慮下啦～」詠妍用力咁點頭，用無比認真嘅眼神望住我，「諗得過呀！你宜家唔好堅決拒絕我嘅提議先～可能你過多排都會覺得唔錯呢～」

「嗯嗯⋯」我依舊敷衍咁答佢，「係嘅係嘅，咁就遲啲先算啦～」

踏入校門經過小食部嘅時候，就見到張景彥同孫慧伶喺我面前經過

「You see，你放低咗佢就唔會再介意呢啲嘢啦。」詠妍又借機說服我，「張景彥唔值得你對佢咁好。」





我嘅視線從張景彥身上移開唔再望佢，望向詠妍，詠妍仍然一臉認真，我仍然一臉無奈

我冇對張景彥好呀，對佢好唔好同放唔放低佢係兩件事嚟，兩者冇衝突

我番到自己嘅座位坐低，從櫃桶中拎出早就喺locker拎咗出嚟嘅中文書

「唉⋯煩呀⋯」我伏低喺中文書上

點解會咁麻煩㗎⋯「冇中意過佢就好」呢個想法喺我腦海中浮現出嚟，開始覺得麻煩





中意一個人本來冇問題，但喺中意過後面對嘅，只有困擾同難受，或者仲有猶疑

我側着頭伏喺枱上，目光落喺課室門口嘅同時，就見到岑諾新佢地食完飯番嚟

平均身高178嘅佢地，行入嚟課室嘅時候真係特別顯眼，順帶一提，我班嘅男仔平均身高大概係175左右

「啱啱詠妍係咁講住佢，搞到我都唔想望佢⋯」我將頭擰向另外一邊，望住窗嗰邊

如果我當初中意嘅人係岑諾新，咁宜家係唔係⋯就唔會咁樣？





「哈⋯我應該都會因為同一個問題而煩惱⋯」我喺心裏講道同時不禁一笑，「都係會因為我中意嘅人嘅心中有第二個而煩惱⋯」

戀愛什麼的⋯真係麻煩⋯喺最青春嘅年紀，卻總係要為呢啲事煩惱

岑諾新中意孫慧伶，又點會同我開展一段新戀情？

雖然我同佢宜家都「開展」咗一段新戀情，咁講好似自相矛盾咁，不過其實冇

一段冇感情嘅戀愛，叫做「戀愛」咩⋯？

失敗者嘅愛情，就係咁樣⋯？只可以成為某一個人嘅代替品⋯？

我一直以嚟，對張景彥嘅感覺，難受、不甘、喜歡⋯呢啲都係我對佢嘅感覺⋯我望住佢嘅背影都會覺得幸福，我以為咗好多嘢，但最後全都真係「我以為」而已

「得啦得啦⋯」我無奈一笑，為咗避免佢繼續講落去，我唯有咁樣答佢





我同岑諾新一齊走，同平時一樣，一齊搭巴士番屋企

先啱啱坐低， 我就見到有對情侶都上咗嚟上層，但佢地冇行到嚟後面，我同岑諾新都坐得算後，坐到去尾三行，佢地坐喺中段嘅位置，坐正喺我地嘅正前方

「陰魂不散咁⋯」我喺心中默默地無奈道，然後拉一拉岑諾新嘅衫袖，對佢細聲地講道，「真係去到邊都會見到佢地。」

「佢地唔會同我地同一個站落車掛⋯」岑諾新細聲地對我講道

「應該唔會掛，張景彥都唔係住我地嗰邊。」我冇啲疑惑地講道，「孫慧伶就係。」

「可能佢送孫慧伶番去。」岑諾新講道

我同岑諾新細細聲地討論緊一啲對其他人嚟講無關痛癢嘅問題，但對我地嚟講係好重要嘅問題





「我地要唔要早一個站或者遲一個站落車？」我遲疑地問道

「呃⋯都係會見到佢地。」岑諾新猶疑咗一陣，「同一個站落啦，克服困難嘛要～」

我望住岑諾新無奈地笑咗一笑，我望向車窗外，見到差唔多到我地落車嘅站

孫慧伶伸手㩒咗鐘，然後同張景彥一同起身落定樓下，我同岑諾新對望咗一眼

「果然佢地同我地喺同一個站落車⋯」我無奈地講道

「唉⋯面對現實啦要⋯！」岑諾新企起身孭好書包

岑諾新比我先一步落到下層，我行到落去嘅時候，見到岑諾新企咗喺樓梯前，佢面向住張景彥佢地嘅方向企

「落嚟，佢要剎車啦。」岑諾新對我講道，然後朝我伸手，自然地牽起我嘅手





喺車因剎停而晃一下嘅時候，岑諾新嘅手輕輕地將我扶住，自然無比嘅舉動，一點點嘅温柔

落車之後，張景彥同孫慧伶行喺我地嘅前方，我抬頭望一望向岑諾新，岑諾新又望一望我，我將視線落回前方，望住行喺我前面嘅張景彥

「岑諾新一定好過張景彥！」

我諗起詠妍今日晏就對我講嘅嘢，岑諾新比阿彥好⋯？真係咩⋯？

我對於呢一點，有啲猶疑⋯或者對於知情者詠妍嚟講，張景彥對我一啲都唔好，畢竟佢同我一齊嘅時候，心入面卻裝住另一個女仔，什至到咗最後，佢因為要同孫慧伶一齊而同我分手⋯

知道呢一切嘅詠妍，當然會覺得阿彥一啲都唔好，唔值得我咁樣中意佢

但對我嚟講，張景彥係我嘅初戀，係嗰個我好中意嘅人，初戀嘅難忘，我明白⋯





我忽然感覺到岑諾新用力地捉住我隻手，我抬頭望向佢

「⋯！」我呆咗一呆，不禁瞪大眼後頓時往岑諾新嘅方向望去




IG Link: https://www.instagram.com/nd_cotttoncandy/?hl=zh-tw