［愛情純愛］既然忘記唔到佢，不如試下中意我⋯？: 30. 詠妍的低語

我一㩒入去睇，見到希童喺story嘅中央大大隻字寫住「佢睇靚仔睇到面紅要除衫」，喺呢句嘢下面@咗岑諾新

「痴線咩事呀～」我無奈地笑道，「洗唔洗@埋佢呀～」

「話比佢知你掛住睇仔。」希童笑道嘅同時我地嘅嘢食都嚟到

「人就係中意睇好睇嘅嘢㗎啦～」我理直氣壯地通道，然後將我碗米線推到自己面前，「睇靚仔好正常啫～」

「哦⋯你話岑諾新唔靚仔～」詠妍望住我，「你死硬啦～」





「我冇咁講～」我即刻講道，「我冇話岑諾新唔靚仔～」

因為四個人入面得我「拍緊拖」，所以佢地成日都拎我嚟開玩笑，不過我都唔太介意，因為係我地嘅相處模式嚟

「只係～」佢地三個即刻就默契滿分地幫我接落去

「噗⋯」我忍唔住笑咗出嚟，一邊將米線夾到匙羹上一邊講道，「只係我都會想睇下其他靚仔啫～」

佢地三個真知我心，知道我一定有下一句， 即刻就幫我接落去





我飲咗一啖凍檸茶後便耷低頭靜靜地食嘢，雖然聽住佢地講咩，不過我冇摻和，只係聽佢地講一齊笑；我嘅手機放喺一旁，打開IG，睇唔同人po嘅story

Story播完自動跳去下一個，我望住張景彥啱啱po嘅story不禁將story㩒停嚟睇

「佢兩個真係形影不離⋯」我望住張景彥嘅story時不禁喺心中諗道，心中有啲不是味兒

「喂。」詠妍用手撞咗我一下

「嗯？」我回神過來抬起頭，「做咩？」





我望向詠妍，我懷疑啱啱佢係特登撞我一下，可能佢瞄到我睇緊邊個嘅story掛⋯

「唔好再睇靚仔啦～岑諾新咁好。」詠妍嘅說話有弦外之音，因為希童同樂恩唔知，所以詠妍唔可以講得咁明顯，「睇多啲岑諾新啦！」

「冇睇呀！」我無奈一笑，我當然知道詠妍嘅意思

「睇多啲岑諾新啦～佢咁好，多佢兩眼啦～」詠妍笑笑口講道，「佢就喺你面前你都唔睇？」

「我有睇呀！」我心虛地摸摸耳珠，「有睇到呀！」

詠妍嘅意思我明白，我都努力咁放低緊，至於睇唔睇岑諾新呢個問題，我冇諗過

宜家嘅我，心裏淨係想放低嗰個總可以牽動我每一條神經線嘅張景彥

放低咗佢，我就真係自由啦⋯





我地食完飯便直接番學校，我地行出食飯嘅地方，沿路行番學校

我望一望詠妍，詠妍對我微微一笑，見到佢嘅微笑，我都微笑一下

「試下有冇感覺嘛～」詠妍喺我耳邊細細聲地講道，「真係中意咗嘅話，唔係可以放低得快啲咩？」

我嘅眉頭輕輕一皺，我對於詠妍比我嘅建議有啲愕然，應該話，冇諗過詠妍會咁樣同我講

「試下咋嘛～」詠妍認真地講道，「到時真係有感覺嘅咪繼續囉～冇感覺嘅話咪按番你地本來嘅打算囉～」

「但係⋯」我心底係唔想用呢個方法

我講唔出有咩唔好，但我覺得我做唔到





「可以忘記一個人嘅方法得兩個，一係靠時間，一係靠新歡⋯！」詠妍捉住我嘅手，有啲著急地對我細聲道，「咁大個比你搵新歡嘅機會喺度，你都淨係諗住個舊愛？」

「一時三刻點中意啫？」我輕皺起眉頭，想迴避呢個話題

「你係信一見鍾情㗎咩？」詠妍無奈地問道，「感情要培養㗎嘛～」

我知詠妍為我好，想我快啲放低向前走，但我一時三刻又點可能中意岑諾新⋯？

我唔係話岑諾新唔好，佢好，但我冇諗過要同佢發展落去

我地都只係對方嘅水泡咋嘛，唔係咩？

「岑諾新都冇嘢差過張景彥呀，諗得過。」詠妍仍然一臉認真咁遊說我，「我覺得你真係中意岑諾新都不為過。」

「就算你同岑諾新講，佢都唔會咁做⋯」我搬岑諾新出嚟做擋戰牌反駁道





「你又知？你係岑諾新咩？」詠妍毫不猶疑地問我，「可能佢都覺得可以試下呢～」

聽到詠妍認真嘅勸說，搞到我都唔知我可以講咩，一時間無言以對

「我覺得佢唔會囉⋯」我無奈地講道

「其實真係諗得過！」詠妍好堅持佢嘅睇法，「岑諾新一定好過張景彥！」

「嗯嗯⋯」我敷衍地點點頭，「係係⋯」

「你睇下佢咁長情都幾好呀～」詠妍講道

「嗯嗯，佢個心咪得佢個前女友囉，咁我咪又重蹈覆轍囉～」我無奈地講道，咁同嗰陣我同張景彥一齊有咩分別啫





「咁你地目標一致㗎嘛，咁佢都中意你嘅話咪得囉！」詠妍極力推薦我中意岑諾新

「其實你真係唔洗hard sell⋯」我講道

詠妍根本就係hard sell緊岑諾新比我⋯面對佢嘅堅持，我都無言以對




IG Link: https://www.instagram.com/nd_cotttoncandy/?hl=zh-tw