［愛情純愛］既然忘記唔到佢，不如試下中意我⋯？: 26. 熊貓早安

放喺我褲袋嘅手機忽然一震，我拎出手機睇，螢幕一亮就見到係蔣倩盈send過嚟嘅message

蔣倩盈：心情好啲未？

X⋯X⋯X

我望住手機嘅螢幕，見到岑諾新正輸入中

岑諾新：我冇心情唔好





「但楊朗然話我知你心情唔好」我回覆道

岑諾新：佢同咗你講呀⋯我冇心情唔好，佢諗多咗（反白眼）

我拎住手機，諗咗一諗，今日岑諾新嘅表情明顯地心情唔好，應該唔係我嘅錯覺

「咁你個Bio⋯」

岑諾新：一時失手，下次再努力就得





我望住手機螢幕不禁一笑，睇嚟佢又真係好似冇咩事咁喎～

正當我想回覆佢一句加油嘅時候，岑諾新又send多咗一個message過嚟

岑諾新：啱啱番緊屋企嘅時候同孫慧伶撞到正一正

本來頹廢地坐咗喺梳化上嘅我頓時坐好起嚟，盤着腿坐喺梳化上

「然後呢然後呢？」





我覺得自己好似想食花生多過想關心佢，呃⋯關心佢嘅成份都係有嘅，不過我更加想知道佢見到孫慧伶之後發生咩事

「然後發生咗咩事？」

岑諾新：冇咩特別，講咗兩句，佢同我打招呼

岑諾新：佢嗰種就真係自然，好似我同佢冇一齊過，只係咁啱喺街撞到嘅朋友咁

岑諾新：你唔喺度太可惜，見唔到我有幾唔自然

「咁咪好可惜？（笑喊)(笑喊)(笑喊）」

不過唔洗岑諾新講，我都估到孫慧伶一定係以一個自然嘅姿態同岑諾新主動打招呼

諗番起前兩次撞到佢，都係佢主動行過嚟同我地打招呼，臉上掛着微笑





真係好似岑諾新講嘅咁樣，孫慧伶嘅表現的確就好似冇當過岑過新係佢前男友一樣

「但你應該都自然過我」

岑諾新：唔知，放低該放低嘅就得

「放低該放低」

喺我收到岑諾新嘅回覆同時，我將我嘅回覆send出去

「噗⋯」我望住手機螢幕忍唔住笑咗出嚟

果然，係同病相憐嘅人先會有嘅默契





「你今日黑面黑到我有啲驚」

岑諾新：冇黑面，平時都係咁

「最好真係」我回覆道同時笑咗一笑

今次我，真係唔會再放棄，我真係要放低張景彥啦，真係真係要放低

「佢唔係我㗎啦⋯」我灘低喺梳化，細聲地對自己講道，「張景彥唔係我㗎啦⋯」

我提點着自己，希望自己唔好唔記得呢個事實

不過⋯

「我要點樣放低？」我心中默默地諗道





「呵～欠⋯」我邊打喊露邊朝巴士站行去

早知琴晚早啲瞓啦，掛住睇YouTube睇到4點幾先瞓，搞到今朝早起身嘅時候眼都睜唔開

「咦⋯？岑諾新？」我見到一個超級熟悉嘅身影行喺我面前，停低喺斑馬綫前面等綠燈

我急步行到佢嘅身後拍咗佢一下，然後行到佢嘅身旁

「早晨⋯」我一開口講嘢就係充滿疲倦嘅聲線

「早晨。」岑諾新淡淡地望咁我一眼

一大清早就要比佢冷淡對待啦我⋯都唔知我應該要因為見到佢真實一面而開心定唔開心先係⋯





「你今日cosplay熊貓？」岑諾新望住我講道

「我有黑眼圈呀？你見到呀！？」我瞪大眼望住岑諾新，仲不忘伸出指尖摸一摸自己嘅眼袋

「我又唔係盲⋯而且咁大個黑眼圈點會睇唔到⋯」岑諾新望住我嘅雙眼無奈地講道，「你冇睇到咩？」

「今朝早好眼瞓，又懶咗一陣床⋯趕住出門口，根本就冇留意⋯」我雙手捧住臉頰，「好明顯呀？」

「我都可以睇到，咁你話呢？」岑諾新邁步上巴士，拍卡後直行到對住樓梯嘅輪椅位企，背着住車門

「呀⋯咁點算呀？」我行到去岑諾新嘅面前企，拎出手機用梳機嘅前置鏡頭睇下自己嘅黑眼圈

我望住手機中嘅自己，眼袋嗰個位都明顯咁黑咗，好似話比人知我琴晚好夜瞓咁

「點見人呀咁大個黑眼圈⋯！」我默默地收起手機

呢一刻嘅我真係想喊出嚟⋯

我抬眼望向岑諾新，佢正注視住窗外，面無表情地，雙手插着袋，真似佢嘅風格⋯




IG Link: https://www.instagram.com/nd_cotttoncandy/?hl=zh-tw