［愛情純愛］既然忘記唔到佢，不如試下中意我⋯？: 25. 自然⋯？

平日嘅佢對住我，永遠都係最冷靜嘅一面，今次可能已經係佢最大反應嘅一次

講真呀，我知佢因為測驗測衰咗所以唔開心，然而當我見到佢嬲嬲地嘅時候，我嘅心真係怯咗一下，因為真係好少見佢咁樣

「我想放低佢⋯」我望住天花板喃喃自語道，「如果當初我冇同張景彥一齊，一切⋯係唔係唔會變成咁⋯？」

我對張景彥嘅中意已經難以言喻，佢嘅一切我都中意，我就係咁中意佢

當你好中意一個人嘅時候，你會選擇包容佢，什至早就知道佢其實唔係真係咁中意你嘅時候，你都會選擇矇起雙眼當唔知道





「不過，我都係時候醒啦⋯」我喃喃自語地講道

夢該醒啦⋯我早就醒啦，只係唔想相信呢個事實⋯不過事實都已經擺喺眼前，我其實，都冇否認嘅必要⋯

我企起身，從架上拎出一個淡黃色嘅盒，將佢放到我嘅枱上

我將盒蓋打開，入面放住一張又一張嘅紙，全部都係之前同張景彥一齊出街嗰陣keep低嘅單；每次同佢一齊去食嘢，我都會將單keep低，番到嚟之後將單據放入盒中

「唉⋯」我輕輕地嘆一口氣，然後伸手將放喺架上嘅碎紙機拎咗落嚟





一張又一張嘅單，放入手動碎紙機中碎掉，我親手將呢啲已經冇用嘅廢紙碎掉，都已經冇回憶嘅必要

「放低啦放低啦⋯」我喺心中默默地講道，手一直捉住碎紙機嘅把手攪動着，「放低該放低嘅⋯人同事都係⋯」

我將空空如也嘅盒蓋番蓋，猶疑緊應該掉咗個盒定係留番個盒

「掉唔掉好呢⋯」我望住個盒問道，「但個盒仲用得，掉咗好似好嘥嘢⋯但個盒係嗰陣同張景彥一齊買⋯」

買呢個盒嘅時候係仲同緊張景彥一齊嘅時候，係某一次同佢出街，行開12蚊店嘅時候買





「一個盒啫～冇掉嘅必要呀～」我將個盒放番上去架上面

本來放住我珍貴嘅回憶嘅盒，宜家只係一個普通嘅盒，人要向前望嘛～我都知道⋯

放心啦，我真係真係醒㗎啦！唔會再當咩都唔知，放低該放低嘅

X⋯X⋯X

我行喺番屋企嘅路上，送咗蔣倩盈嗰個喊包番屋企，我當然都要番自己屋企

「我真係，好中意張景彥⋯！」

今日佢喊住咁同我講，唉⋯我又點會唔知佢好中意張景彥？但係我講嘅都係事實嚟

我都好中意孫慧伶，但係佢都同我講咗分手啦，我就算再中意佢又可以點？就算繼續同佢一齊都唔會有結果





「佢今日仲話我好自然⋯」我不禁諗起蔣倩盈同我講嘅嘢，「原來喺佢眼中，我嘅表現係咁自然⋯」

我又點可能放低咗孫慧伶？我又點可能真係可以當睇唔到？我只係唔將所有嘢都擺晒出嚟啫，但唔代表我真係可以做到若無其事

每一次見到孫慧伶，我都只不過係強逼自己唔好望向佢，就算我望向佢，佢嘅目光都唔會再落喺我身上

每次孫慧伶迎面行過嚟，我唔望佢都好，眼睛嘅餘光都會注意到佢，我個心都會唔知點算

我自然咩⋯？先唔係⋯

我都好中意孫慧伶，我都仲未放得低⋯

我同蔣倩盈講好咗要放低，當大家都放低咗之後就分手，當初叫我唔好半途而廢嘅人居然會想做先放棄嘅人⋯我都唔知我要欣賞佢嘅毅力定係要嬲好





「嗨～你喺度嘅？」孫慧伶朝我迎面行嚟，得佢一個人

「嗨⋯」我嘅心中有少許緊張，但都假裝自然地打招呼

我呢頭講起佢，轉個頭就迎面見到佢，到底係我太好彩定太唔好彩⋯？

「你喺嗰邊行過嚟嘅？你唔係住嗰邊咩？」孫慧伶微微側身指住佢嘅後方，「送女朋友番屋企？蔣倩盈住嗰邊？」

佢嘅舉動都太自然啦掛，簡直就好似直接冇將以前嘅事當成一回事一樣，就好似我同佢從來都冇一齊過一樣

每一個微笑都完全係話緊比我知佢已經完全放低咗我一樣，仲可以咁樣問起蔣倩盈，輕易地將有關我現任嘅問題問出口

「嗯，係呀。」我假裝自然地微微一笑

「我地番學再見啦，拜拜～」孫慧伶對我笑着揮揮手，然後從我身邊走過





喺孫慧伶從我身邊走過，我回頭望向佢，佢向住屋企嘅方向行，頭也不回地向前行

喺呢一刻，彷彿連佢都話緊比我知，佢冇嘢值得我繼續留戀、繼續拎住唔放手

佢仍然好似當初我中意嘅嗰個佢一樣，冇改變過，仍然中意笑，仍然對個個都好

「仲話我自然⋯」我喺心中不禁一笑講道




IG Link: https://www.instagram.com/nd_cotttoncandy/?hl=zh-tw