［愛情純愛］既然忘記唔到佢，不如試下中意我⋯？: 22. 放下該放下的⋯

岑諾新咁樣講，係因為張景彥係讀物理⋯

「先唔係⋯」我輕輕一笑，緩緩地搖頭

雖然我的確睇過補課時間表，知道今日有物理補課，但係我唔係因為張景彥所以先話等埋岑諾新

我望住小食部嘅入口，見到張景彥行入嚟小食部，企喺小食部兩端嘅我地對望咗一眼

我嘅心底即係滲出不自在嘅感覺，我同佢對望咗兩秒之後，我先移開了視線





就連我落到嚟小食部都會見到佢⋯

「你咁樣，對我呢個男朋友係唔係有啲唔公平呢？」岑諾新開玩笑地問道

「呿⋯」我望咗岑諾新一眼，「講到好似你對我呢個女朋友好公平咁⋯」

岑諾新聽到我講嘅嘢之後不禁一笑，佢望向張景彥嘅方向，張景彥行到去近操場嘅嘢飲機買嘢飲

「我放5點半。」岑諾新講完之後就自己朝學校接待處行，睇嚟佢打算行前梯上番去





我一個人番到課室，坐喺自己嘅座位，打算邊做功課邊等岑諾新放補課

喺只有自己一個人嘅課室裏坐着，其實唔會太安靜，畢竟係喺學校，又有人補課

老師喺課室拎住咪講嘅嘢聲音會從窗外傳入嚟課室，我拎起原子筆，打開數學書同單行功課簿

「隔離課室好似就係物理補課用緊嘅課室⋯」我喺心中忽然間諗道，「阿彥佢，喺隔離補緊課⋯」

我總係好自然咁就會諗起張景彥呢個人，個天一直都同我對抗緊一樣，我愈唔想自己諗起佢，佢就愈係會不斷地出現喺我嘅腦海中什至出現喺我面前





「唔好諗佢⋯唔好諗佢⋯！」我喺心中對自己講道同時，用手拍拍自己嘅臉頰，「諗起佢都冇咩意思⋯」

我拍着自己嘅臉對自己講，希望自己清醒啲

唉⋯但邊有話唔諗就真係可以唔諗⋯？

其實我冇後悔過同張景彥一齊，自己揀嘅邊有得後悔？

中意又好，中意過都好，都係自己嘅選擇嚟，何況我一早就知道佢中意孫慧伶？

「自己攞嚟。」連我自己都嘲笑自己嘅愚蠢，「又怪得邊個？」

我將早就寫晒喺數學書中嘅題目公式步驟同答案一次過抄番嚟去數學簿，不過咁樣嘅話我會好快就會做完呢份功課

「唉⋯」我不禁又嘆咗一口氣，我都唔知點解我會嘆氣，「諗嚟又有咩意思⋯放低該放低嘅⋯」





我對自己講道，就好似係勸緊自己一樣

其實我自己知自己事，張景彥對我嚟講係咩一回事，我又點會唔知⋯？

「唔⋯！」我企起身伸咗個懶腰，將櫈推後，我行出座位，喺課室內遊走着

我行到壁報前睇下壁報上釘着嘅嘢，行到黑板旁睇下今日嘅補課時間表

「物理⋯」我望住喺今日日期嘅格仔中寫嘅字

我輕輕一笑，諗到自己就好似笨蛋一樣就想笑

留戀一個冇必要留戀嘅人⋯





我都想要一段愛得轟轟烈烈嘅戀愛，我同張景彥呢段關係更加似係喺我將來回頭望嘅時候，會笑自己傻嘅一段感情

不過張景彥的確係我嘅初戀，人人都話初戀最難忘，係代表住情竇初開，最青澀嘅戀愛

「或者真係會好難忘⋯」我微微一笑喺心裏講道

將來嘅景色又會變成點樣⋯？我會唔會更加理智成熟？我身邊嘅人又會係邊個？

我行到課室門口企着，伸咗個大懶腰，鬆鬆筋骨，眺望着遠處，旁邊傳嚟老師講書嘅聲音

「幾時先到5點半⋯？」我回頭望向掛喺黑板旁邊嘅時鐘，先4點半

如果今日岑諾新早啲放學就好啦～咁我就唔洗一個人喺課室坐咁耐

我行出課室，打算出去行一下，經過隔離補緊物理嘅課室，我下意識朝裏面望去





一眼望過去就見到坐喺課室中排嘅張景彥，用手上拎住嘅原子筆抵着下巴，苦惱地望住出面嘅screen

我收回視線，嘴角微微上揚着

「今日嘅陽光好好睇呢～」我細細聲地喃喃自語

我望住打喺地上嘅影子，淡黃色嘅光照喺地上，我望住自己嘅影子微微一笑

「快啲落堂啦～」我喃喃自語地講道

「哦～有人等緊你喎岑諾新～」

我唔洗望都知道係楊朗然把聲，睇嚟生物科都補完課





我將枱上嘅嘢都執好然後放入書包入面，孭起書包行到岑諾新嘅座位旁

「等我放埋嘢入locker先。」岑諾新繞過我向locker行去

我企喺原地等佢，回頭望一望向行緊去locker嘅岑諾新

「你男朋友心情唔好呀⋯」我聽到楊朗然細細聲地講道

「嗯？心情唔好？」我望向楊朗然，見到楊朗然將視線從岑諾新嘅背影移到我身上，「點解？」

「生物測驗考衰咗呀佢⋯」楊朗然望一望我背後，好似好驚岑諾新會知道佢同我講一樣，「佢本來好高期望，溫好晒書，但失咗手。」

「哦⋯」我扁扁嘴，回頭望向準備閂上locker門嘅岑諾新




IG Link: https://www.instagram.com/nd_cotttoncandy/?hl=zh-tw