［愛情純愛］既然忘記唔到佢，不如試下中意我⋯？: 21. 毫無破綻的我們

「肚餓嘛⋯」我臉帶着微笑講道，然後拉咗張櫈坐低，「好餓⋯」

課室入面好少人，其他人都出咗去食飯，得我地四個留喺課室食飯

佢地三個興高采烈地唔知討論緊啲咩，但我完全冇聽到佢地講咩，腦海中一直浮現出啱啱見到張景彥嘅情境

我唔想再諗，但大腦就好似控制唔到一樣一直記起

「倩盈？」樂恩捉住我嘅膊頭搖咗兩下





「嗯？」我回過神來望向樂恩，然後一笑，「做咩呀？」

「嗰日見你地又去咗約會喎～去咗嗰間好好食嘅蛋糕店～」希童講道

「你話下次同我去㗎！」詠妍忽然間又摻和一腳，平日詠妍唔會特別出聲講呢啲，但今日卻開口湊熱鬧

「知啦知啦～」我望向詠妍，沒好氣地笑一笑講道，「下次同你一齊去囉～」

「係呢～嗰間蛋糕店啲蛋糕好唔好食呀？」樂恩一臉好奇地問道





「都幾好食，唔太膩。」我回想一下嗰個蛋糕嘅味道，「我嗰日食牛奶味，甜甜地但又唔會話甜到膩嗰一種，而且好香。」

「你淨係望住佢都甜到入心啦～」希童笑着講道

詠妍聽到之後都耷低頭一笑，但我肯定佢笑嘅同時，心入面一定講緊「佢先唔會因為望住岑諾新而甜到入心。」

「平時番學都可以見到佢啦～」我平靜地帶着笑容講道，「都唔洗特別望住佢。」

對於大家嘅「抽水」我都已經習以為常，拍拖嘛，一定會比人講，不過我通常都係笑笑就算





「不過，冇諗到你同岑諾新會一齊。」樂恩拎起放喺手邊嘅蘋果綠茶

「嗯嗯！有啲震驚！」希童點點頭，「畢竟，岑諾新之前同孫慧伶拍拖，然後宜家孫慧伶又同咗張景彥一齊⋯」

嗯⋯係呢⋯真神奇⋯

我嘅前任係張景彥，張景彥嘅現任係孫慧伶，孫慧伶嘅前任係岑諾新，而岑諾新嘅現任係我⋯真神奇呢～都唔知可以講啲咩

希童咁樣一講，詠妍嘅視線隨即落喺我身上；咩都知道嘅詠妍，了解我最深嘅詠妍，第一下有咁嘅反應都係好正常嘅事

「你唔介意咩？」希童問道

「有咩好介意？」我輕輕一笑反問道，「都過咗去啦～冇嘢值得介意。」

我默默地耷低頭繼續食飯，就係我耷低頭嘅瞬間，我收起咗笑容⋯





我知道詠妍望住我，亦聽到希童同樂恩講嘅嘢，但我已經冇繼續聽落去嘅想法

「唔係我大量，係已經與我無關⋯」我聽到希童佢地話我好大量，但我心裏卻默默地比出另一個回答，「都已經同我冇關係，我仲可以介意啲咩⋯？」

張景彥都已經與我無關，咁就算岑諾新嘅前任係張景彥嘅現任，又關我咩事⋯？

「真係㗎？好呀～」

「你已經買咗飛啦？咁快嘅？」

「比個驚喜你嘛～」

我聽到走廊嘅人講嘢嘅聲音，我下意識望咗一眼，見到嘅又係張景彥同孫慧伶





「嘖⋯」我頓時喺心中不耐煩地嘖咗一聲

果然係連個天都挽我，做咩我愈唔想見到佢地就愈係會見到佢地㗎！煩死啦！

一係就見到張景彥，一係就見到佢兩個甜甜蜜蜜咁喺埋一齊，煩死啦！

詠妍喺枱底輕輕地踢咗我一腳，我望向詠妍，見到詠妍望住我，表情就好似係問緊我O唔Okay一樣

「你男朋友番嚟啦。」詠妍望住課室門口，對我講咗一句

我望向門口，岑諾新同楊朗然佢地幾一個食完飯番嚟，岑諾新將身上著住嘅長䄂冷衫除咗落嚟掉到枱上

岑諾新望向我地呢邊，佢嘅視線同我對上，我露出一個無奈嘅笑容，想話比佢知啱啱發生嘅事

佢見到我無奈一笑後，都自然地笑一笑，露出一個毫無破綻嘅微笑





我地之間嘅秘密，可以一直守落去對吧⋯？

「我今日要補課，你可以自己番去。」岑諾新拍一拍褲袋，睇下佢嘅寶貝銀包仲喺唔喺度，「你可以同余詠妍佢地一齊番屋企。」

我回頭望向詠妍，見到詠妍佢地都已經執好書包準備番屋企

「我等埋你先走啦今日～」我回頭對岑諾新講道，「你去小食部？」

「係呀。」岑諾新離開座位，喺去補課之前去一趟小食部

我跟喺佢身後同佢一齊出咗課室，陪佢一齊落小食部買嘢飲

當我同佢一齊落到去小食部嘅時候，岑諾新先開口同我講嘢，啱啱沿路落嚟佢都冇同我講過嘢





「你做咩要等埋我？平時我補課你都唔等我㗎。」岑諾新好快就察覺到啲咩一樣問道

「我今日想等你唔得咩？」我聳聳肩

「一定唔會係因為你想等我。」岑諾新果斷地否定我，「因為今日物理補課？」




IG Link: https://www.instagram.com/nd_cotttoncandy/?hl=zh-tw