［愛情純愛］既然忘記唔到佢，不如試下中意我⋯？: 11. 有他在

蔣倩盈先唔會嬲呢啲嘢⋯佢又唔係真係我女朋友，佢嬲嚟都冇咩意思⋯

「你又知？」楊朗然似乎唔太相信我講嘅嘢

「佢係我女朋友，我又點會唔知？」我反問道

我會唔知我「女朋友」嘅想法咩？我當然知道，佢唔嬲先係正常反應，佢嬲先唔正常

我從褲袋中拎出手機，將手機放喺櫃桶，望到我嘅手機，就自自然然地諗起啱啱喺餐廳時我同蔣倩盈做嘅嘢





「放低⋯都係時候啦⋯」我微微耷低頭，喺心中講道

我知道孫慧伶已經唔中意我，佢同咗張景彥一齊，我知道，呢啲事我都知道⋯

將手機入面同孫慧伶有關嘅相刪晒，或者對我嚟講係真係一件好事嚟，可能我可以好快咁就放低咗孫慧伶，由得佢慢慢成為我嘅過去

我望向蔣倩盈，佢仍然托住頭發呆，佢好努力咁想放低張景彥，但佢又唔捨得

睇下啱啱喺番嚟嘅嗰一段路上，佢連望向前方嘅勇氣都冇拎出嚟，我都見到佢地喺前面，但可以點？唔通真係要一直耷低頭行？





我呀，都係好好咁面對現實啦，遲早都要放低嘅嘢，咁執着一直拎住喺手都冇意思，更加冇意思嘅係拎住一個已經放棄咗自己嘅人

X⋯X⋯X

我托住頭，望住貼住筆袋放喺枱上中嘅手機，我send咗個message比岑諾新

「興奮不？呢頭講完嗰頭就撞到」我喺WhatsApp寫道

我望向岑諾新，佢應該已經收到個message，我望住佢耷低頭，手伸入櫃桶將手機拎咗出嚟，佢望咗手機嘅螢幕一眼然後望向我





岑諾新：個天真係有心整蠱我⋯

「(笑喊)(笑喊)(笑喊)」

岑諾新：（反白眼）楊朗然話你嬲，然後話我死硬（反白眼）

「我似咁小氣咩（黑面月亮）我冇咁小氣」

「定我要話你死硬啦岑諾新咁樣？」

岑諾新：多謝晒（反白眼）我真係多謝你

岑諾新：啱啱我都嚇咗一下

「睇到你個無奈樣」





岑諾新：佢偏偏今日行錯課室⋯我都唔知講咩好

「上天比你嘅考驗嚟，你就接受挑戰好了」

我偶然抬頭望向走廊，見到張景彥喺走廊行過，向住廁所嗰邊行去；岑諾新都碰巧抬頭望，佢應該都見到我望到嘅嘢

岑諾新：你講錯嘢（黃面月亮）

「唔⋯（黑面月亮）對唔住囉！」

我耷低頭望住手機，但係我冇抬起頭嘅打算，亦唔打算望向走廊嗰邊

真係放低一個人，大概係當你見到佢嘅時候，心境平靜，冇大浪掀起亦冇小浪，亦唔會有暗湧；當你面對嗰個令你心動得要心藏病發嘅人嗰陣，可以保持心境平靜時就係代表你真係放低咗佢





「唉～好難呀⋯」我喺心中講道，「中意過一個人真係好難好煩。」

老師行入嚟課室，一放低嘢就開始講書，我望住黑板，手打開筆記，從筆袋中拎出原子筆同我同開嘅螢光筆，順手地梳一下馬尾

我托住頭望向窗外，今日嘅天空好藍，藍天白雲，天氣好好，但我嘅心情卻唔係真係咁好，總係若有所思，但又唔知自己諗緊咩

「愛情易啲定數學易啲？」望住出面黑板上嘅數學題，我不禁諗道，「點知⋯兩樣都好難，數學可以喺考晒試之後輕易忘記，但佢唔得⋯」

我又點可以拎一個人同數學題比較？兩樣嘢嘅性質都唔一樣，邊有得比較？

「我幾時先可以忘記佢，就算見到佢都唔會覺得點⋯？」我耷低頭，喺數學堂課簿上做數學題，「呢一日幾時先到⋯？」

我總係會問自己「我幾時先可以放低？」，因為對我嚟講，只要我唔再中意佢，只要我忘記佢放低佢，我先唔會再咁難受，無論佢同邊個一齊都好，我都唔會介意

有啲說話，我始終冇問出口，喺分手嘅時候，我想問但因為唔想自取其辱而冇問出口嘅嘢，宜家嘅我仍然有啲在意個答案，但我知道，答案唔會係我想聽嘅嘢，問嚟都已經冇意思





再加上，係你嘅就會係你嘅，唔係你嘅點都唔係你嘅⋯我的確有唔甘心、有傷心、有迷惘⋯但呢啲事唔可以一直存在，我都要向前行

分手嘅初期我真係會避佢，心裏嘅難受唔係三言兩語可以講得清，特別係見到佢嗰個早就放低咗嘅模樣，但或者因為後來有岑諾新理解我，所以一切都冇咁難受⋯




IG Link: https://www.instagram.com/nd_cotttoncandy/?hl=zh-tw