［愛情純愛］既然忘記唔到佢，不如試下中意我⋯？: 10. 她才沒有

「我地講好咗要放低。」岑諾新細細聲、提醒我一樣講道

「嗯⋯」我不情願地點點頭，但其實我不情願都冇用，因為係我講話要放低，我唔可以反口

「好好面對。」岑諾新對我講道，我望一望佢，佢真係望住前方

「話說，你隻手搭得好舒服係唔係？」我呢一刻先察覺到佢嘅手繞過我嘅背，舒適地搭住我嘅膊頭

「身高啱啱好。」岑諾新微微耷低頭望住我，「邊個叫你矮？」





「我矮？我生到163都嫌自己太高啦好唔好？」我一臉嫌棄地望住岑諾新講道，「你覺得我矮只不過係因為你高咋嘛！」

「係，所以你矮，對我嚟講。」岑諾新嘅臉上露出淡淡嘅笑容

我已經有163，我覺得自己都已經夠高，女仔生咁高做咩？我又唔係想做Model之類，我洗咩咁高？再加上岑諾新覺得我矮只係因為佢有180⋯我喺女仔嚟講都算高㗎啦⋯

我望一望仍然將手搭喺我膊頭嘅岑諾新，心裏有啲無奈，不過唔係討厭

我同岑諾新本來都冇咩嘢講，我嘅意思係喺一齊之前，我同佢真係都唔知講過嘅嘢有冇十句，不過我同佢一齊咗之後，先熟起嚟，可能因為都有感情問題，所以熟得好快





宜家都算係朋友嘅，都算係可以聽心事嘅朋友

平時我地私下唔會特別講電話之類，最多都係喺WhatsApp講下嘢，講下今日有咩唔開心之類，所以都稱得上係可以傾密計嘅朋友

一開始都會有少尷尬，但慢慢地都唔太在意身體接觸，拖下手，偶爾錫一啖都唔算啲咩，畢竟係個合格嘅水泡嘛～

再加上，佢係我名義上嘅「男朋友」，我係佢名義上嘅「女朋友」，喺其他人眼中我同佢係真係情侶，咁如果我地分得好開，手都唔拖嘅話，咁咪好奇怪？

所以偶爾有親密嘅接觸都係好正常嘅事，當然，唔會喺其他人面前錫⋯





「撐完枱腳番嚟啦？」我同岑諾新一踏入課室，即刻就比人串，係佢啲朋友串我地

我同岑諾新都無奈地笑起嚟，只係簡單咁食個飯

「呀！」

喺我地嘅背後傳嚟一個女仔嘅叫聲，岑諾新向前行咗一小步，我因為怕佢跌親而下意識伸手捉住岑諾新嘅手

我比岑諾新更快地回頭望向後面，我不禁怔了怔；岑諾新回頭一望，頓時向我嗰邊行咗一小步，我悄然抬眼望咗岑諾新一眼，呢個時候我先發現，班上嘅人，靜咗⋯一種尷尬嘅氣氛傳嚟⋯

「唔、唔好意思，行錯課室！」孫慧伶一臉尷尬地講道，然後轉身小跑着踏出我地課室

岑諾新望一望我，我又望一望岑諾新，我微微一笑，鬆開手後輕輕地拍一拍岑諾新嘅手臂

「氣氛尷尬。」我喺心裏默默地講道，然後行番埋位





我坐番埋位，同岑諾新對望咗一眼，我微微聳肩，詠妍同希童、樂恩望住我，楊朗然望一望岑諾新後又望一望我，基本上平時同我地兩個熟嘅人都望一望我地

X⋯X⋯X

「你死硬啦岑諾新⋯」楊朗然捉住我嘅膊頭，將我整個人向後拉，然後細細聲地對我講道

「我做咩要死？」我無奈地問道同時，望咗蔣倩盈一眼

蔣倩盈同我對上視線，然後朝我無奈地聳聳肩

啱啱個下真係尷尬死，我個心都覺得尷尬同有啲唔知點算，上一秒同蔣倩盈喺餐廳食嘢嗰陣，先講完要放低孫慧伶，轉個頭番到嚟學校就撞到正一正

佢點解偏偏揀今日入錯課室⋯？





啱啱課室內嘅空氣都凝固咗一樣，班上面嘅人基本上知道我喺同蔣倩盈「拍拖」之前係同孫慧伶一齊，啱啱完全係前任同「現任」撞到正一正

「你個ex咁樣撞落你度，蔣倩盈一定嬲死！」楊朗然認真地講道，然後緩緩地望向蔣倩盈，再望一望我，指一指蔣倩盈，「你死硬啦兄弟。」

我同佢一齊望向蔣倩盈，蔣倩盈坐喺位托住頭，佢只不過係單純咁樣發緊呆，唔係發緊呆嘅話，咁應該係諗緊關於張景彥嘅事

「佢一定係諗緊要點罰你⋯！」楊朗然認真地望住我講道，「前任同男朋友有接觸，係要受死嘅事嚟。」

「嗯，然後呢？」我無奈地回答

「你可以買嘢氹番佢。」楊朗然認真地建議，「女仔嬲起上嚟好得人驚！如果你地結咗婚係夫妻，佢一定唔會比你番屋企或者要你瞓廳！」

佢知唔知自己講緊啲咩⋯

「兄弟，我唔想睇住你死⋯！」佢拍一拍我膊頭，對我講道





「兄弟，我想講，佢冇嬲亦唔會嬲。」我無奈地對楊朗然講道，要打破佢多餘嘅想法，「佢先唔會因為呢啲事而嬲，佢冇你想象中咁小氣⋯」




IG Link: https://www.instagram.com/nd_cotttoncandy/?hl=zh-tw