念念不忘 都冇迴響: 見面 一

我咪話2020我地見得兩次嘅，兩次都係因為我地生日所以要約要見而已。

我咪4月生日嘅，不過遊爍嵐果陣好多deadline果D所以佢話完sem先見。老實講，我曾經同遊爍嵐講過話約去好需要勇氣，去get唔到點解我會咁講，但係其實都好難解釋。係有心理準備俾人拒絕？定係要勇氣去打擾佢嘅日常生活？最想見嘅人，反而因為各種恐懼，自尊，反而最少聯絡。回想起咁多年都係我主動約佢，其實我好好奇點解一次都唔可以係佢做主動。所以久而久之就算我好掛住呢個人，我都好少夠膽主動約佢。

反正終於完sem大概六月我地見左次，都係簡簡單單食個飯，食埋個甜品。果期我學識咗點樣玩扭計色，好興奮咁分享左係IG sorry所以全世界都知，而果一年遊爍嵐就係送咗個有兩面黐咗我哋嘅相嘅扭計色俾我。表示自從扭返好，就唔捨得再整亂佢。

而家個扭計骰，連同埋佢之前俾我嘅信，有啲就買咗落個時間錦囊；有啲就擺咗我天花板個櫃。係因為有一日我又唔知發咩神經想忘記佢，所以就決定首先眼不見為淨擠埋晒佢啲嘢。

其實我哋之間啲嘢又真係唔少，以前中學有好多工作紙都有佢啲痕跡。當年篩選留邊啲工作紙作為紀念，我每張都好細細咁睇吓有冇佢寫過嘅嘢喺上面，後來有一日同佢出街食飯，佢知我收拾緊Dse啲嘢竟然講咗句





「有我寫過嘅嘢就值得留低啦！」

我心諗其實你唔講我都會咁做。

//

反正我曾經試過好多次嘗試將帶有我哋回憶嘅物品擠埋一二邊，覺得咁樣有助我忘記呢個人。時間錦囊天花板，上都試過展覽一次，但後來我發覺情感係喺個心，而唔係你嘅外在環境。其實都冇乜嘢嘅後來我都可以慢慢忘記，但係有個小問題，就係我好多社交媒體都用咗同佢有關嘅數字或者文字作為密碼，因為啲密碼比較長所以我有寫落一本簿，但係嗰本野有記錄我哋其他嘢事，所以我都擠埋左。後來我想登入返個帳號覺得真係難過登天，不過成件事都搞笑嘅。