念念不忘 都冇迴響: 心態

果晚我久違咁打左電話比陳珊蕾問下情況，陳珊蕾話遊爍嵐系佢地個whatsapp group都係話出左pool 之類嘅，所以我都信左95%。

過左一日之後我同遊爍嵐dm果陣恭喜左佢，佢都認咗我一句多謝，但係隔唔夠幾個鐘佢又post story突然話佢地分左手，果陣我有7成懷疑一切都只係一個prank,所以又dm佢問下。

問問下遊爍嵐開始解釋乜鬼條仔要去外國乜乜柒柒，但係我心裏面始終唔係好信佢，嗰陣又有啲心急所以我話其實我有份功課2359交，問佢使唔使安慰佢嗰啲。結果講講吓遊爍嵐話見我真係有野做費事整蠱我太耐，果然一切原來都只不過係一個局。

我聽到嗰陣其實又冇特別開心，我用咗一整日嘅時間去接受，佢真係拍咗拖呢個「事實」。其實都幾好我預演左一次個反應會係點，因為我真係從頭到尾都知道呢一日點都會嚟。

//





我記得中五嗰年有一個親戚結婚，邀請我哋去飲。佢因為好鍾意播嗰啲片，展示返一對新人嘅成長過程嘅，我記得嗰陣我一路睇一路覺得我同佢根本冇可能行到呢一步。終有一日有一個人會俾到幸福佢，只不過嗰個人一定唔係我。

我有幻想過如果一日佢結婚，我無論點都一定唔可以喺現場見證，我怕我到時真係會喊。

所以後來其實我都幾鍾意去睇人結婚或者去飲，我覺得咁樣拉近左我同現實之間嘅距離，提醒我，永遠都唔會見到佢着婚紗個樣。