念念不忘 都冇迴響: 背景

2020，眾所皆知係黑暗嘅一年。除咗武漢肺炎之外，世界上好多名人都同年離開左我地。而對我而言，2020係從頭黑到落尾。

因為上莊，我一番到香港就用左成個月準備Mock Cam。果陣我冇意識到，嚟個係惡夢嘅開端。可能好多人唔知咩係Mock Cam咁我就簡單解釋下：上莊果陣，你需要開一個Campaign向你D會員講解下來年有咩活動、D會費點用、解答下會員D問題，等人投票俾你上莊。而Mock Cam就係借訓練你Campaign 唔好柒嘅名義，叫翻歷年所有莊D人翻來一齊屌爆你。我會用「屌爆」，係因為一大有個傳統就係叫仙制，佢地絕對唔會好聲好氣教你點做，同你講解上莊D嘢；相反系八日七夜完全冇得休息嘅情況下，講緊每日都可能只瞓咗三四個鐘，佢哋會用極惡劣嘅態度不斷咒罵你，詆毁你。由你所設計嘅活動，去到嚴重少少人身攻擊，批評你全個人嘅性格等等，全件事就係一個自尊心嘅踩踏，一件極唔合理嘅所謂「青春回憶」。

系準備Mock Cam嘅過程，其實你完全冇任何指引，你只可以盡你所能去準備。系Mock Cam開始前幾日其實我好想見下遊爍嵐，當精神支持都好，不過可惜真係區區得果幾日，我哋夾唔啱時間見面。

反正Mock Cam所經歷嘅嘢對我嘅影響都好深，可能你會好奇吓咁咁多人上個莊，點解係得我一個打擊咁大？咁我只可以答可能係我本身個人廢？或者話我本身個人有啲自尊心又熱愛自由，對於唔合理嘅制度我真係理解唔到。加上大家都知，有一班好嘅莊友同你同甘共苦；但如果包莊友唔好就真係慘過死，偏偏我啲莊友係後者，曾經聽過人話「上莊等於執屎嚟食」，真係中肯到爆。

反正我全個2020嘅大背景就係比個垃圾莊不斷規範我，完全冇私人時間，on call 24/7,仲要對住班自己唔鍾意嘅人，無端端又會俾人鬧，呢個亦都係我全年心情都好差嘅原因，係我全個2020嘅大背景。因為本身心理狀態唔好同肺炎，可以引用楊丞琳一句歌詞「我們這一年忙到少見面」。2020我同遊爍嵐真人只係見得果2-3次，不過2020係真係改變左我好多，雖然我到依家都未知D改變係好定壞。