念念不忘 都冇迴響: 追問

又一日如常咁喺ig direct 傾偈。

果一晚唔知點解講到講大話嘅話題，遊爍嵐問我有冇呃過佢咩。實際上其實我呃過佢好多次：

有一晚凌晨佢叫我幫佢print工作紙，我應完ok之後見佢冇覆，結果我成晚冇瞓到等佢個訊息，令我可以準時print到張耶返學拎俾佢。第二日朝頭早佢話點解我好似唔使瞓咁，我叫佢唔好傻，點有可能唔瞓。

以前我哋好鍾意喺尖沙咀食嗰間豬扒飯，雖然冇心呃佢，但係我話之前我都去過食。利申返先本身我以為佢講緊另外一間野，去到間餐廳門口我先知原來我搞錯咗。不過見我哋咁合拍都冇特別解釋翻。其實實際上有幾樣佢鍾意食嘅嘢，我都話我以前有食過，後來我先發覺實際上我搞錯晒，不過唔緊要我成功拉近左我哋嘅距離。

總之細細碎碎其實我呃咗佢都唔少次，但係我會覺得情有可原(?)反正直到今時今日我都因為唔同細碎耶有繼續瞞住佢。反正當佢問我有冇嘢呃佢嗰陣，我求其講咗記單冇咁明顯嘅嘢，而佢都聽得出我講埋啲濕碎嘢。





實際上我真係同遊爍嵐講過最大嘅大話，就係佢整蠱我果日問我係咪鍾意佢，我死口話唔係。我最大隱瞞佢嘅嘢，就係我一唔小心鍾意左佢三年。

因為我好好奇到底一直以來，遊爍嵐係咪知我鍾意佢；而遊爍嵐，都好想知到底我呃佢最大嘅嘢係乜，所以果一晚，佢不斷叫我開估，而我就不斷叫佢講佢D assumptions 出嚟。

而家諗返，其實佢死都唔肯估係好正常，當佢有九成肯定，佢都唔會冒嗰一成風險去問我係咪鍾意佢。一陣間如果我真係唔係鍾意佢，件事就會變到好尷尬。所以遊爍嵐話好想我話佢知，如果唔係都會係一個幾大嘅誤會。

而遊爍嵐好有信心會令到我主動坦白我個秘密，但係佢低估左我深櫃嘅程度，雖然有好幾次我都差啲俾佢打動咗講咗出口，但係最後我唔想冇咗呢個朋友，一方面我幾肯定佢唔係鍾意我，二方面我最大嘅願望就係佢長長久久都係我嘅人生裏面，而繼續做朋友就係最直接嘅方法，所以我最後都冇講到出口。

果一晚我哋真係傾咗成晚，用咗好多比喻問咗好多問題。最後其實我都幾肯定遊爍嵐一直知我鍾意佢，佢話：





「其實我一直都知道但係我扮唔知。」

「我估唔到詳細嘅例子因為一講咗就好明顯。」

但係我諗唔明白嘅位係我同佢講話一講咗出口就會冇朋友做，佢話：

「你講咗出口友誼唔會毁滅。」

反正到今時今日我都係諗唔明，點解當日遊爍嵐咁想我親口同佢講一次我鍾意佢。明明大家好隱晦已經知道一切，點解佢為咗個絕對正確嘅答案，可以咁有心機說服我全晚。我有諗過其實佢係咪想我表白，定係佢想我講粗口令到我心死？





反正最後我哋有個共識，我估到佢知咗好耐，我估佢都估到我鍾意咗佢好耐。但係正如佢講，真相只要唔好講出口，就可以繼續扮冇事發生過。遊爍嵐最後問我今世諗唔諗住同佢講，我答佢：

「十年後可能我會同你講。」

遊爍嵐覺得十年實在係太長，佢叫我等佢18歲生日果陣同佢講，我都拒絕左。

其實後來我會諗如果當日我真係有講，到底而家我哋嘅關係會係點。可惜世界上冇咁多個如果，而去到今時今日我依然思考緊呢個問題。