念念不忘 都冇迴響: 比賽

～本章節與遊爍嵐無關～

果種要證明自己好快樂嘅感覺，一直去到十月先消失，而消失嘅契機係班際閃避球比賽。

以往係精英班年年贏係家常便飯，所以到10月嗰陣我都冇太大興趣真係去睇閃避球。可能係我個心一直凝住我嗰班其實唔夠精英班咁叻，所以先會有自卑感想證明自己比以前過得更好。

但係劇情往往就係咁老土嘅，我哋嗰班由初初一直沿路打到入決賽，對正精英班。記得決賽係系放學後舉行嘅，而我果班又好團結全班留低睇，中午學期初個工作量又未係好重所以我都應承咗一齊睇。

睇之前我仲同我啲朋友講，其實都冇乜嘢好睇反正我地都會輸。





我唔識形容我哋嗰班有幾勁，簡單嚟講就係已班啲人本身幾有運動天份，又有幾個籃球校隊嘅人同我一齊由精英班入咗二班，結果全級最勁啲人都喺晒我哋班，佢哋又好識屈人headshot同埋好有默契咁傳波。結果，我地真係贏咗人哋班仲要係All kill。

當我哋贏嗰陣，我嗌到差唔多失聲。最開心嘅唔係我哋贏咗而係呢場比賽向我證明咗精英班唔一定係最勁。呢件事其實都改變左我心態唔少，好慶幸嗰日有睇場比賽。日後當說服人哋我覺得好好過得好開心嗰陣，我都可以好理所當然咁講，而唔再覺得只不過係呃緊人哋呃緊自己。