念念不忘 都冇迴響: 迪士尼

曾經聽過一句話：迪士尼裡面有男仔，係因為要陪女仔。一般女仔對迪士尼有一份執著，無論係覺得全件事好夢幻好靚，定係鍾意個氣氛鍾意種感覺，反正如果5係特別追求刺激，一般女仔都會鍾意迪士尼。而係人都知，買迪士尼年飛，特別係學生飛，去兩次已經可以抵翻。當年你一早已經買左年飛想有人陪你用盡張飛，我又好耐冇去過迪士尼，所以口輕輕應承過你買年飛。

到我生日果陣你post左生日文，裡面有提到話想同我快D去迪士尼，我先醒起好似有應承過同你去。中學果陣其實真係好得閒，雖然話就話中三選科，但係生活都有個規律，去補習，學課外活動，返學，基本上其實好得閒。就因為得閒，我決定真係去買迪士尼年飛；就因為得閒，果年我同你出左街無限次。

其實香港真係好細，可以去嘅地方基本上唔多。你話，去迪士尼其實只不過係幫我地搵個地方共度一日。嗯，其實都真。

老實講，迪士尼本身由細到大去左無限次，個地方就已經唔係特別特別了，所以個重點好自然就係同邊個去。後來，我每次諗起迪士尼，就會諗起你。

喺迪士尼裡面，時間彷如無物，我地可以好自由咁吹水吹全日，乜都講一餐。你話你特別鍾意食夢幻世界餐廳個豬扒飯，後來我每次去迪士尼都只係會食個豬排飯。你話你鍾意睇煙花，我話我都鍾意睇，但係個現實係其實我一次都冇睇過煙花，我鍾意當人唔太多果陣走。迪士尼有架火車會圍住全個園區轉，當我地喺上面休息果陣，你講到如果有一日我地嬲左對方，唔再聯繫，我地可以send句「迪士尼火車」比大家，當係俾個機會對方。你話如果如果夠膽send就代表依然好在乎對方，任何矛盾都可以化解。





落左火車隔左一段時間我問你，點解覺得我地有機會鬧交。你話，總有機會。果陣其實我已經都幾鍾意你，當你鍾意一個人果陣，你根本完全想像唔到果種「鍾意」嘅感覺會輕易消失。所以我同你講：「我覺得我永遠都依然會係你嘅朋友。」你話：「嚟個世界係冇永遠嘅。」

上面個對方，我莫名其妙係真係好深刻。我深刻嘅係曾經我講「永遠」果陣，我相信永遠真係會存在；而你一早已經好通透，世界上根本冇嘢係永垂不朽。所以後來我會話你教我最大嘅課之一，就係令到我認清現實，而嚟個現實，容不下永遠。