念念不忘 都冇迴響: 日常

上堂果陣大家鍾意做乜，仲記唔記得？嗱，大家都係好學生，就緊係鍾意專心上堂抄筆記啦係咪？中學學左嘅知識往往都唔會係最深刻，你最後記得嘅，可會係課堂上一D小片段，但係D知識自從考完DSE，就真係原封不動還囇比D老師了。

我記得同你坐果陣，我地鍾意講文具。係，女仔係會講文具的。有時上堂聯想到D無聊好笑耶，我都會好自然同你講。可以分享一單深刻嘅：

老師要每個同學起身翻譯文言文，有個同學果句係：「乜乜乜神遊乜乜。」，果個同學竟然翻譯左做個作者遊神，我果陣聽已經覺得奇奇怪怪，遊神唔係指發夢D意思咩？D人又好似冇乜反應，但係見你一面愕然，都估到你都聽得出奇怪，我地當時都覺得個意思好怪好搞笑，之後又忍唔住笑。

中學果陣就係鍾意笑埋D無聊耶，笑下笑下又一日。笑下前面果兩個同學D動靜好古怪，笑下D老師講嘢奇奇怪怪，乜都可以笑一餐。

果陣我地稱唔上深交，但係一齊相處同笑下成為左一種日常，我地仲笑到俾人鬧，之後我地發明左個方法，用鉛筆寫D嘢去對方檯面講嘢，笑聲係無減退的，但最小講果陣無聲。





回想翻起，果陣我地真係好純碎。落堂我地各自有唔同friend去交際，一上堂又會聚翻埋一齊吹水。我無諗過果D無聊嘅日常，到依家我依然覺得係最珍貴嘅回憶之一。