《行山撞到女神，重同佢…》（少甜）: 女｜girl

卻原來已接近故事的結尾。
 
小翹和我在山上逗留了一會便下山，俗語有云「上山容易落山難」，正正反映此刻我們遇到的境況，兩旁的懸崖所造成的心理陰影，使得我們不得不牽手下山。
 
「啊衡你小心啲啊，可以唔使拖我㗎。」小翹說。
 
「唔拖緊啲，我驚你走嘛。」我笑說。
 
「嘻嘻，做咩咁驚我走？」小翹說。
 


「咁我咁難得先捉到你，梗係怕你走喇。」我笑答。
 
「或者喇。」小翹說。
 
「喂喂喂，啊衡你咪借啲抽我呢個新朋友水。」這時我們已經與家欣會合，啊峰則從旁表現出讚嘆的眼神。
 
「衡哥你真快手。」啊峰說。
 
「唔係啊，因為啱啱山上面太斜，啊衡先拖住我落嚟咋。」小翹嘗試解釋。
 


「重講，依家都點幾，重唔快啲落山，如果唔係陣間過咗六點就冇得食嘢喇。」我轉移話題，以免小翹尷尬。
 
「係喎。」家欣說罷便草草收拾東西。
 
下山途中，我和小翹走在前方，以加快他們的進度，當然亦方便我了解更多小翹。
 
「係呢，你依家係讀緊書？」我問。
 
「係啊，PolyU 嘅 marketing。」小翹說。
 


「咦，咁你有冇住Hall?」我再問。
 
「有啊，所以陣間過一過海就得。」星期六都要回宿舍，看來她跟hallmate關係不錯。
 
「重諗住陣間見多你一陣添。」我說。
 
「嘻嘻，聽日咪見到我囉，傻。」小翹說罷指指我的額頭。
 
「聽日？點解嘅？」我疑問。
 
「你枝鏡頭爛到咁，重唔聽日攞去整？」她笑笑說。
 
「哦，我重以為你想快啲見到我添。」我笑說。
 
「唔，知，呢。」她說，然後便以碎步落山，我緊追其後。


 
「我哋即將帶你回到現代化的香港」，下午三時左右，我們終於到達愉景灣的中央廣場，家欣和啊峰早已坐在地上，而我個小翹則在覓食。最後我們決定去海濱白教堂旁的西餐廳，順道打卡。
 
「真係㗎？我原本都好想去果個教堂，但驚趕唔切。」家欣說。知道我們將會去白教堂，坐在巴士上的家欣便精神起來，而坐在我身旁的啊峰早已倒頭大睡。
 
「你唔好咁激動住，可能好多人呢。」我決定打擊坐在我前方的家欣。
 
「唔緊要喇，最多食完嘢先去影囉，反正間餐廳就係隔離。」小翹說。
 
「所以話都係小翹最好。」說罷家欣便繞住小翹，然後竊竊私語。
 
到達白教堂，果然有不少朝聖者，所以我們還是先在餐廳找個位置坐下，再靜待時機。餐廳的食物看似不過不失，我們便隨便點了幾樣。不知道曾幾何時，我頗喜愛意大利出產的葡萄酒，原本想試試酒牌上的Chianti，但還是Prosecco比較適合，因為真的太熱了。至於小翹和家欣就點了杯特色Cocktail，啊峰則叫了可樂，也許是因為太熱了。
 
「幾時都話衡哥識歎，你睇吓佢一叫就叫杯香檳。」家欣說。
 


「呢個係意大利汽泡酒，唔係香檳，淨係得法國香檳區出嘅酒先可以叫香檳㗎。」我試著解釋。
 
「好好飲㗎？」小翹在詢問的同時已拿起我的Prosecco喝下去，家欣及啊峰便同時向我發出一個詭異邪惡的眼神。
 
「嘩，依家冇咩人喇。」我迅速轉移話題。
 
「係喎，啊峰過嚟幫我影相。」啊峰只好放下他剛放到嘴邊的牛肉跟了出去。
 
「係呢，咁我哋聽日點啊？」小翹問。
 
「我啱啱Book咗十一點整機，咁我哋十點半銅鑼灣地鐵站等？」我問。
 
「好啊，聽晚一唔一齊食埋飯？」小翹邊按手機邊回覆我。
 
「可能要係街到食喎。」我笑說。


 
「咁又唔一定，總有其他地方嘅。」小翹笑說，我下意識想到的，應該和你們想的差不多。
 
「我諗諗，我諗諗。」我尷尬的完結這個話題。
 
最後我們坐了晚上六時半的船準備回到中環，小翹挨著我的膊頭睡著了。在她依偎著我睡覺的這一段船程，我不斷回想和她相遇的每一個過程，感受著緣份的奇妙，空氣中同時瀰漫著她的香水以及手機的震盪。
 
下船後，我們各自回家，家欣和小翹坐Uber回宿舍及沙田，而啊峰則是巴士回到荃灣。
 
「到底佢講食飯嘅意思係咩？」回宿舍的過程中我不斷反覆思考著這個問題，同時亦不得不承認，通常在這些時刻，男性總會用下體思考。
 
「早啲瞓喇，聽日見喇🥰」我最終決定Signal小翹。
 
「你都係啊，早抖😝」過了一會，小翹回覆我。
 


唔通女神真係咁主動？
 
 
戀愛i-n-g happy i-n-g 心情就像是 坐上一台噴射機 － 戀愛ing

歡迎大家follow我ig：9.shoots，果邊應該會更新得快啲，同埋會容易覆到大家嘅留言，大家嘅follow同like都係我寫落去嘅動力嚟㗎！

https://www.instagram.com/9.shoots/

出咗新故喇～《嗰晚，女神竟然攻擊我嘅Coin Master村莊》，希望大家多多支持～