回到過去，破我未婚妻個處: （67）

離開道觀後，我叫小曼約左Eric出嚟，先同對方解釋曬琴日發生嘅事，並拜託佢揾律師即刻改資料。

喺結婚紙上，新郎一欄由佢個名改成我個名。

雖然Eric唔係小曼鐘意嘅人，但Eric卻真心喜歡小曼，佢唔想見到小曼死，因此同意揾律師改資料。
 
結婚只係宣個誓、簽個名，本來律師一改完，我就想即刻想簽字，但小曼話連結婚戒指都無，好似唔太恰當，仲話起碼要揾個地方，舉行一個簡單嘅儀式。

雖然時間緊迫，但我都順佢意思。



我去揀結婚戒指，佢就去尖沙咀book左一間露天餐廳，並揾埋班中學同學佈置場地。

嚟到星期日，場地同戒指都準備好曬，而今日亦都係最後限期。

小曼假如喺呢日同唔到鐘意嘅人結婚，咁就會無命。

一大早我換上整齊西裝，拎住一對結婚戒指，嚟到露天餐廳。

所有嘢都安排得好急，故事亦轉折得好突然，明明小曼係同Eric結婚，我本來要同Veronica結婚，但短短幾日之內，卻演變成係我同小曼嘅婚禮。



然而一班中學同學都無問啲咩，照樣到場祝賀。

陣間宣左誓，簽完名，咁我同小曼就正式結為夫妻，如無意外嘅話，交換戒指嗰一刻，我就會好似未中六合彩前嘅阿叔咁，七孔流血而死。

換係從前嘅我，一定好驚死，而事實上，呢刻嘅我其實都係驚到腳軟，只係我無法眼白白睇住小曼死，我一定要救佢。

無論幾驚都好，結婚紙上嗰一個名，我一定會簽。

婚禮本來係十二點舉行，依家已經十二點十分，但小曼居然仲未出現。



我突然有種唔好嘅預感。

負責接小曼嘅Kelly亦都未見人。

我叫森仔打俾Kelly，我就打俾小曼。

「嘟…嘟…嘟…」

無人接聽。

森仔講完電話，行過嚟同我講：「Kelly話佢本來同小曼搭的士過嚟，但中途小曼話要落車買啲嘢，之後就唔見左人。」

我繼續打俾小曼，但仍然係無人聽。

發生咩事？點解佢呢個時候玩失蹤？



佢唔會係睇穿左，琴日我喺夾埋個道士呃佢？

佢臨時失場，唔係咁傻想犧牲自己？

唉！小曼你快啲聽電話啦！

「嘟…嘟…嘟…」

打左好多次都係無人聽，呢種關頭之下，只能親自去揾佢。

我叫埋班同學分散去揾，唔單止係尖沙咀，連隨其他地方包括佢屋企都揾埋。

眾人由朝揾到晚，平時佢會去嘅地方統統都揾過曬，都係揾唔到人。



仲有兩個鐘就十二點，過埋呢個時間，小曼個咒就會發作，佢就會無命。

我個心好慌好亂，好似盲頭烏蠅咁到處咁揾.

佢屋企又揾過，診所又去過，平時我地去開嘅冰室，凡係佢常去嘅地方，甚至連石澳嘅沙灘都我去過，可惜都係揾唔到佢。

我不停咁諗仲有邊個地方未去過，最後終於諗到。

我嚟到我地第一次擁抱嘅嗰一個海旁。

對方真係喺度。

但時間已經係差唔多到十二點，簽字結婚已經嚟唔切。

我行到佢身邊，對方抬頭眼甘甘咁望住天。



「鐘耀輝，你講大話好渣呀，之前明明就唔信啲道士，又話係神棍，琴日就信到十足十，我一
眼就睇穿你地夾埋架啦，係我費事踢爆你之嘛。」小曼望過嚟對我講。

「點解你唔俾我救你？」

佢無答我問題：「你知唔知嗰一日喺沙灘，我對住流星許左個咩願望？」

我一時哽咽，出唔到聲。

「我許左個願望係希望可以同你一齊，估唔到最後真係靈驗，係就係遲左啲，但證明左向流星許願，願望真係會實現。我就聽講今晚都有流星出現，咁咪一早過嚟等，等到佢出現我就會許願，希望身上嘅詛咒會解除。」

小曼拉我到身邊，翹住我隻手，望向夜空：「你都一齊過嚟昅下，睇下流星出現未？」

我向上「岳」高頭，眼淚流下來。



今晚夜空無雲，閃爍住幾粒星星。

我地靜靜咁望住夜空，大家都無出聲。

點不知，真係有一粒流星劃過。

「快睇下，嗰粒係咪流星…」我指住粒流星講。

小曼挨住我膊頭，雙眼閉合，失去左知覺。

「唔好訓啦！快啲望下粒流星...」

無論我點嗌佢，佢都無反應。

我嘅眼淚隨之如決堤般湧出嚟，攬住小曼痛哭。

小曼...對唔住...係我害左你...對唔住...

就喺傷心欲絕之際，忽然間，一粒流星劃過。

世界頓然好似定左格咁，幾秒後，有一道白光閃過。

白光十分刺眼，掁眼到令人頂唔順，要合埋雙眼。

過左唔知幾耐，感覺到有人掹我衫尾。

我睜開一望，第一眼就見到小曼。

十六歲嘅小曼，仲有石澳嘅沙灘，而我手上拎住兩袋嘢。

「哇！你快啲睇下嗰粒係咪流星？」小曼指住個天。

我丟低兩袋嘢，一下攬埋去，緊緊咁攬住唔放手。

事出突然，對方亦反應唔過嚟。

我一時激動，忍唔住哽咽。

「你...你喊呀？」

我帶住眼淚，對住眼前嘅小曼，講出心裡話：「陸小曼，我鐘意你。」



（全文完）