回到過去，破我未婚妻個處: （66）

我地開左支紅酒，飲到醉醺醺，喺濃濃嘅醉意同愛意之下，發生左關係。

完事以後，小曼訓喺隔籬熟睡，我就眼光光，輾轉反側訓唔著，不停諗緊點樣救小曼。

「仲未訓？」小曼挨過嚟貼近我嘅背脊。

「係咪我嘈住你？」我翻身擰返轉個人對住佢。

佢搖搖頭：「你仲諗緊我啲嘢？」



我帶住愧疚嘅語氣對佢講：「對唔住，係我害左你。」

「得啦，你今日講左呢句十萬次啦，我對耳仔都聽到『起枕』，咪話左係我自己做嘅決定，唔關你事，你唔好再自責啦。」

「唔係，係我嘅錯，係我…」

小曼錫我一啖，用親吻嘅方式，唔俾我再講落去。

我地熱烈咁擁吻，之後做左第二次愛。



清晨六點幾，個天未光得曬，小曼仲訓得好「林」。

我淺睡左幾粒鐘就醒左，上次對方煮左一次早餐俾我食，今次輪到我下廚，親自煮返一次。

煲粥嗰啲我就唔識，簡簡單單煎隻蛋煮個通粉都難我唔到嘅。

小曼揉揉睡眼，行出房間。

「我煮左早餐，你拿拿臨刷完牙，快啲過嚟食，試下我啲手勢得唔得？」



「哇，煎雙蛋火腿通，賣相好似ok 喎。」

「梗係啦，快啲刷牙洗臉先啦。」

小曼喺廁所洗刷完，坐埋嚟飯檯，嘗左一啖通粉：「哈哈，估唔到又擺得落口，幾好食喎！」

「我啲廚藝係咪都見得下人呢？」

「Um…整體上都ok，係隻蛋煎得燶左少少。」小曼夾起隻煎蛋，的確係燶左一忽。

「燶左嗰啲唔好食啦咁，我幫你整走佢。」

小曼卻一啖咬落去，連啲燶位都食埋：「燶左都無所謂啦，橫掂都無幾日命，生cancer都無我份。」

對方又拎呢啲嘢嚟開玩笑，但我絕對唔會俾佢死。



「係啦，食完早餐，不如我地去多次大嶼山，揾嗰個禿頭道士囉？」我提議。

「下？又去？個道士咪話左無能為力，幫唔到你穿越多一次，亦解唔到我嘅咒。」

「解唔到你個咒啫，話唔定解到我身上嘅咒，如果我個咒無左，咁咪可以同你結婚囉！」

小曼皺一皺眉，諗左一陣。

我不停喺佢耳邊說服佢去多一次，佢考慮左一陣，最後順我意就答應左。

食完早餐，我地就又嚟多一次雲中道觀。

「師父，你有無辦法解除我身上個毒咒呀？」我問禿頭道士。



對方左手拎住拂塵，喺我面前揮動幾下，右手數數手指。

「附係你身上嘅毒咒隔代相傳，頑固且難除，的確有啲難搞，但都唔係無辦法嘅。」

「咁即係話你有辦法？」

道士點點頭：「嗯嗯！」

「太好啦小曼，我個咒一解，咁就可以同你結婚，咁你就唔洗死啦！」我好激動咁講，

小曼則露出一副驚訝又難以置信嘅表情。

禿頭道士立即就幫我開壇作法解咒，佢要我跪喺神壇前，正面對住廟中所供奉嘅神像，並喺我身上貼上百幾張黃符。

跟住佢一手執銅鈴，一手舞動桃木劍，嘴裡喃喃自語，唸緊啲無人聽得明嘅符令。



大約唸左五分鐘，佢幾下手勢，撕走我身上嘅黃符，再用打火機燒著，將灰燼放入一個青花瓷碗，然後溝另外一啲符水，隊埋嚟俾我飲。

「你身上嘅咒已經解除，飲左佢咁就儀式完畢，你身上嘅毒咒自此消失。」

我二話不說，「good」一啖飲曬碗嘢。

「好！搞掂曬！承惠七九九九！」

「多謝你！多謝你解左我嘅咒。」我拎信用卡出嚟俾錢。

小曼有啲質疑，問個道士：「你真係解左佢身上嘅毒咒？」

「Sure！當然係真，我連幫人穿越都得，區區詛咒又點會難到我？」



諗唔到呢個禿頭道士講大話都幾叻，事實上佢根本唔識解我個咒，頭先只係喺度扮嘢，我個咒根本無解到。

喺我嚟之前偷偷地打左個電話，叫佢幫我演呢一場戲，為嘅就係氹小曼同我結婚。

小曼本來就只係一個普通人，根本唔應該死於詛咒之下，該死嘅嗰一個應該係我。