回到過去，破我未婚妻個處: （51）

「鈴鈴鈴—鈴鈴鈴—」屋企電話響起。

佢走去接電話，聽佢講電話嘅語氣，唔洗估都知係小曼。

對方打嚟應該係問佢幾時集合，同喺邊度集合。

收左線後，十六歲嘅我繼續整佢張卡。

起初穿越返嚟我係要破Veronica個處，而事態發展到依家，我已經唔知點面對佢。



無論係十六歲嘅佢，定係2021年嘅佢。

下晝六點，十六歲嘅我換曬衫準備出門去石澳bbq。

「話時話你穿越返嚟，唔係有咩緊要事要做嘅咩？搞咩全日都攤屍咁攤喺梳化。」佢問我。

「無嘢，唔洗理我。」

「我多口問佢，邊攰得閒理你，不過屋企已經無曬嘢食，連啲杯麵都已經食曬，你要揾嘢食就自己落街買。」



「唔係呀嘛，咁你依家落去幫我買啲返嚟。」

「要買你自己買，我家下準備同同學入石澳。」

「咕咕—」我琴日同今日都無食嘢，個肚餓到打曬鼓。

「算啦， 我同埋你一齊去啦。」

「下？去邊呀？」佢問。



「bbq囉。」我答。

話曬今日24號平安夜，我喺屋企都「嘔」左一日半，我唔想「嘔」住咁過十二點，所以決定跟埋十六歲嘅我去石澳燒嘢食。
 
「唔好跟住嚟啦，我地都無預你！」十六歲嘅我對我講。

「有咩所謂啫，多個人多支叉之嘛。」

「頂，你真係好煩，隨你啦！」

佢先去同高佬威、森仔、馬騮會合，四人先去買食材同燒烤用品。

我話自己係阿輝嘅堂大佬，平安夜孤零零無人陪，想join埋一齊燒嘢食。

而我都知佢地都唔鐘意多個生保人，所以特登拎幾舊水出嚟，出錢幫佢地買嘢，借此消除隔膜。



到夜晚七點，買齊曬嘢，我地拎住一袋二袋拎到小巴站。

Kelly同小曼已經到左，至於阿德就一個提早入石澳先。

今日小曼身上一件白色Tshirt加牛仔褲，襯對黑色cons，孭個手袋仔，簡簡單單嘅打扮，卻已吸引住十六歲嘅我嘅目光。

「點解你喺度嘅？邊個叫你嚟架？」森仔問Kelly。

「既然你都嚟得，點解我唔嚟得？」Kelly「gut」森仔。

「其實係我見人多熱鬧啲，所以先叫埋Kelly。」小曼解話。

「你耳仔有問題呀？我只係問你點解喺度，幾時話你唔嚟得？」森仔無視小曼，繼續同Kelly嗌交。



「你話我耳仔有問題？我話你把口有問題就真，咁鬼臭！」

中學嗰陣，佢兩條友好似前世撈亂骨頭咁，見親面都嗌交，後來唔知係咪嗌交嗌出真感情，拍埋拖仲糖黐豆咁。

「俗語有話，冤家宜解不宜結，好男又不與女鬥，你地一人少句啦。」高佬威出言勸交。

「係啦，唔好拗啦，有車到啦。」十六歲嘅我拎住袋凍肉先坐上小巴。

其他人包括我在內跟隨上車。

兩個女仔一齊坐，十六歲嘅我就同森仔坐，佢周不時借啲意，望過去小曼嗰邊。

以前我以為自己扮到不經意，掩飾得好好，呢刻當以一個第三者角度去睇，其實係偷望得幾明顯。

三個字車程後，我地就嚟到石澳沙灘燒烤場，阿德已經到左喺度等。



「阿輝個堂大佬，你識唔識透爐？」森仔問。

「Er…唔識喎…」我答。

「咁等我嚟啦。」阿德拉高衫袖，拎包炭精出嚟，落手落腳透爐。

「阿德真係好『得』，又靚仔又識透爐，唔怪得學校咁多女仔冧佢。」Kelly喺小曼耳邊竊竊私語。

小曼無出聲，淨係笑一笑。

森仔同高佬威都有幫手，阿德見十六歲嘅我同馬騮無嘢做，就叫佢地拎啲燒烤叉去過一過水。

唔洗十分鐘，阿德就透好個爐，大家開得餐。