回到過去，破我未婚妻個處: （50）

朱天志自幼喺丹霞山修道，苦練茅山道術。

十八歲嗰年，佢學滿師下山，佢從未接觸過外面嘅世界，亦未見過女人。

有一日，佢經過一個湖邊，遇見一個女子喺度撲蝶。

該女人清秀脫俗，美麗動人，佢就係李圓圓。

朱天志第一眼就愛上左呢個女人，對方亦對佢一見鐘情。



一般嚟講，道士係唔可以拍拖同結婚，朱天志為左呢個女人，甚至捨棄左佢道士嘅身份。

佢地愛得火熱又纏綿，可惜李圓圓喺認識朱天志之前，早就同京城一個員外訂左婚。

喺嗰個年代，一個女仔嘅婚姻取決於父母之命，媒酌之言，自己本人係無得選擇，更無從反抗。

但係，自細喺山上練道嘅朱天志唔識呢啲嘢，佢以為係對方背叛左佢。

佢一心想得到李圓圓，為左唔俾愛人嫁上京，佢居然落咒威脅對方。



佢地都係彼此嘅第一次，朱天志落咒要對方，必須同獻出貞操俾自己嘅男人成親，如果女方嫁俾第二個，咁條命就過唔到二十八歲。

佢用死亡詛咒來要挾對方，無奈嘅係，對方係無得揀，佢一定要嫁俾一個從未見過面嘅員外。

後來李圓圓成左親，生左三胎，二十八歲前一日就七孔流血死左。

朱天志曾經上過京揾對方，曾經想阻止婚事，只但係京城咁大，嗰個年代又無google map，佢揾左好耐，揾過好多個地方都揾唔到。

仲要係對方死左好幾年，佢先知個消息。



為左紀念佢最愛嘅女人，佢喺二人第一次相遇嘅湖邊起左一個道觀。

後來我阿爺嘅阿爺強行霸左嚟起地，儘管喺第二個地方起過一個更大嘅俾佢，但嗰個唔單係一個廟、一個道觀咁簡單，對朱天志李講，嗰度係二人嘅定情之地。

拆左佢就等於破壞左佢最重要一段回憶，難怪會對我阿爺嘅阿爺懷恨在心，施咒害人。

至於世伯就係李圓圓嘅後人，當日喺李式身上嘅咒同我阿爺嘅阿爺嘅咒一樣，一直隔代流傳。

我個咒只傳男，世伯嗰個就只傳女。

因此，佢個女陳嘉玲，身上就附有呢個「處男咒」。

Veronica點解當日同我搞完嘢就倒追我，點解咁我又窮又無樓都肯嫁俾我？點解咁急搞婚禮同我結婚？

原來唔係因為佢鐘意我，而係佢唔想死。



唔怪得次次搞嘢都推三推四，唔怪得唔肯幫我含，唔怪得偷偷地同Kevin鬼混...

唔係佢嚟m，唔係學精左唔想蝕底，而係佢根本無鐘意過我。

由始至終，佢同我拍拖，至到向我求婚，都只係為左保住條命。
 
呢三年，我一直都係同緊一個唔鐘意自己嘅人拍拖，活喺一段虛假嘅關係。

Veronica講過嘅說話，做嘅所有嘢，全部都係虛情假意，做戲做出嚟。

真係俾馬騮條友講中左，呢個世界上邊有咁多真愛，條女咁正咁大波，唔係中左降頭，又點會同你拍拖？

呢刻嘅我大受打擊，回憶返好多同Veronica嘅點滴，本來開心嘅回憶，一諗到統統係假嘅，就感到好心悒。



全日都提唔起精神，無胃口食飯，夜晚訓教都訓唔著。

「想得太多，想得太多，可知我瑟縮在被窩…」

凌晨一點幾，十六歲嘅我傾住電話行出嚟播CD。

我無好似上兩次咁被嘈醒，因為我眼光光，都未訓得唔著，個腦仲諗緊過去三年點樣俾人呃。

直到差唔多三點幾先入睡，第二日訓到十二點先慢慢爬起身。

擘大眼，望見十六歲嘅我喺茶几上，搞緊張DIY聖誕卡。

張卡基本上已成形，就差聲效。

佢整緊個會發聲嘅零件落張卡度，心情唔好嘅我潑佢冷水：「唉，唔洗咁好心機整啦，最後你都唔會送到出去。」



「嗯？佢今日唔會嚟bbq？」佢問我。

我無直接答佢：「算啦，就算你送到俾佢又點，佢都唔鐘意你，好似我同你呢啲個樣又柒，屋企又窮，讀書又唔叻，賺錢又唔多嘅人，根本就唔會有人鐘意，話鐘意都係呃你嘅，放棄吧啦。」

十六歲嘅我無出聲，或者心入面都認同我嘅說話。