回到過去，破我未婚妻個處: （47）

我好想打過去質問Veronica，但又覺得對方，唔會咁順攤和盤托出，於是即晚用iPad call齊班中學朋友開Skype，揾佢地一齊幫我分析下，究竟我係咪戴左綠帽？
 
「仲洗問！肯撚定啦！你家下一片綠光，拍鬼片唔洗打燈嗰隻！」霸佔屏幕左下格嘅馬騮一口咬定。

iPad屏幕上現實四格畫面，分別係森仔、Kelly、馬騮同高佬威。

因為小曼喺出面同緊Eric一齊，阿德嗰邊又有時差，所以我無揾到佢地。

「綠唔綠我唔敢肯定，但Veronica擺明係講左大話呃你，Kelly你點睇？」森仔問隔籬嗰格嘅Kelly。



佢兩條友一齊住，但就分開嚟開cam。

「無錯，用假名嚟掩飾，呢招都幾高。」

「你唔係想學呀嘛？」森仔問。

「傻嘅，我點會呢，你都唔好諗住學…」Kelly回應。

「等等，你兩條友唔好喺度打情罵俏住，講緊正經嘢。」我打斷二人，「咁你地話依家點算好？」



「咁都仲洗問？梗係分手啦！綠帽唔怕戴，最緊要除得快！」馬騮建議。

「其實好難講，就算佢地偷偷地有聯絡，都唔代表佢地有路，可能只係朋友嘅關係。」Kelly話。

「係朋友咁簡單就唔會遮遮掩掩啦。」馬騮話。

「問題係阿輝手頭上無實質證據，又無捉姦在床，又無佢地偷情嘅記錄，話唔定佢地真係無嘢，可能係個ex一路單方面咁煩住佢，Veronica只係驚你誤會或者係呷醋，所以先set個咁嘅假名。」

「你啲女人梗係幫返女人，如果係單方面又點會上人架車，森仔你點睇？」馬騮問頭上嗰格嘅森仔。



「我都好難斷定...」

「唔洗諗啦，飛得啦！高佬威，你唔好掛住㩒電話睇股票，快俾啲意見。」馬騮問右邊格嘅高佬威。

「我覺得女人同股票一樣，表現唔好嘅時候，如果你信得過佢，就長揸唔放，信唔過嘅話，就止蝕離場。」高佬威答話。

我同其他人聽完，都唔知點覆佢好。

「阿輝，之前你係咪話過，結婚酒席嗰啲嘢，印貼嗰啲，同埋結婚後你地租樓嘅費用，大部分都係由女方出錢？」森仔問起結婚嘅嘢。

「係呀。」

「咁就奇怪啦，假設Veronica真係同Kevin有路，咁點解仲要貼錢同你結婚？」

「擺明揾毒撚埋單。」馬騮回應。



「頂，馬騮你有無聽清楚，成件事邏輯上係講唔通，因為阿輝話個Kevin揸車出入，咁即係有啲錢，加上個樣唔差又高大，既然有個咁好嘅選擇，咁點解佢仲要自己出咁多錢，同阿輝擺酒結婚？」

「可能個男人有家室，Veronica同唔到佢結婚，所以先揾阿輝？」Kelly提出假設。

「但係假如一個男人唔係特別有錢，而你又唔鐘意佢，咁做咩貼咁大筆錢出嚟結婚，講真，以Veronica嘅條件，要揾嗰個條件更好嘅，唔會好難架。」森仔解釋。

「呢個我同意！咁大波容乜易揾到老襯，又的確唔洗揾毒撚埋單。」馬騮點頭認同。

「係呀，毒撚就等於一隻無潛力嘅股票，除非係手快㩒錯，又或者情有獨鐘，否則正常唔會入手，更唔會長揸咁耐。」高佬威一係唔出聲，一係就講埋啲九唔搭八嘅比喻。

「難得一次認同高佬威，阿輝你都知自己事啦，人工同我咁上下，但你溝到大波妹，而我就溝唔到，我成日都覺得只有兩個可能，一係就係真愛，一係條女中左降頭。」馬騮同我講。

聽完佢地咁講，我嘅思緒就更加混亂。



一直以嚟，我以為Veronica同我拍拖，係出於真心，如今我發現佢原來暗中同Kevin有路，咁點解仲要同我結婚？

學森仔話齋，我唔係有錢，甚至係叫做窮，佢貼錢同我結婚係為乜？

唔會係俾馬騮條友講中左，中左降頭呀嘛？

唉…頂…

我諗極都諗唔通，個腦諗到好攰，心諗訓醒一覺，等個腦清醒啲先再諗過。

我熄左部iPad，攤上床訓教，個頭枕落枕頭嗰時，眼尾睄到道符攝左出嚟。

呢一次，我睇見七角星嘅中間，由個中文字大寫「叄」字，變成左個「伍」字。

乜奇怪嘅，啲字無啦啦會變嘅？



呢道究竟係咩符嚟？

好奇嘅我試下影低佢，落返床開ipad，放張相上google用圖片搜尋。

居然俾我揾到一啲資料。

有一個介紹茅山道術嘅網頁，標明呢道符叫做「穿越咒符」。

係一道失傳已久嘅古老符咒。
 
「穿越咒符」能帶人跨越時空，穿梭過去和未來，之前我穿越到2009年，莫非都係呢道符所致？

若然假設成立，咁我上個禮拜無穿越到，好大機會係因為呢道符無跟身。



只不過，根據網站嘅講法，呢個符咒已經失傳已久，我手上道符個樣係就係幾似，但好可能只係得個樣似，實際上卻只係一道普通護身符。

諗起俾呢道符我嘅人係小曼，或者佢會知多啲，但係依家都咁夜，有要問留返遲啲先問。

數一數手指，計返日子，距離上次穿越失敗已經過左一個禮拜。

如果手上呢道真係「穿越咒符」，咁今晚照計我會穿越。

於是我將道符攝返入枕頭底，著齊衫褲並帶齊隨身物品上床。