回到過去，破我未婚妻個處: （46）

「係啦，你地兩個一齊左幾耐？」Veronica八卦咁問。

「三個幾禮拜差唔多一個月。」Eric答。

「咁係點識架？」Veronica又問。

「我地之前喺同一間公司做嘢，由嗰陣我就開始追佢，追到後來佢離開公司我都無放棄，本身佢都唔太理我，最後我諗係俾我嘅真誠打動左，而接受左我。」

Eric帶著濃濃愛意望住小曼問：「我講得啱唔啱呀？」



小曼報以羞澀嘅眼神，點一點頭，笑一笑表示認同。
 
「係啦阿輝，你中學咪同小曼讀同一班嘅，不如講下你地讀書嗰陣啲嘢聽下，我成日好想了解多啲，但佢平時講一半又唔講一半。」Eric問我。

「唔好啦，咁耐嘅嘢有咩值得講。」小曼反對。

「好啦~人地想八卦下~」Eric一半撒嬌一半哀求。

小曼無佢符，無咁好氣再反對。



跟住Eric笑笑口咁問我：「講下中學時嘅佢係點架？」

我望小曼一眼，腦海回想起中學時期嘅佢：

「佢中學嗰陣其實同依家一樣，都係鐘意留短頭髮，份人好男仔頭，有時串下佢，佢就會亂發脾氣搣人，不過有時又幾有耐性，傷心嗰陣就鐘意收收埋埋，扮到無嘢咁唔想俾人知，但其實個樣咩都show曬出嚟…」

我講講下，其他人靜左無出聲，氣氛唔知點解好似有啲奇怪，於是拿拿臨打圓場：「Er…反正總括嚟講，佢同以前無乜唔同。」

「哦~係呀~乜原來你發脾氣就會搣人，好彩我暫時都未激嬲過你啫，哈哈！」Eric講笑咁同小曼講。



「係呀，你唔好激親我，否則我唔會放過你。」小曼提醒話。

「兩位唔好意思，因為今日我地鋪頭搞酬賓，出門好多人排緊隊入嚟，你地兩位如果埋左單可唔可以讓一讓個位？」一名waiter行過嚟好唔好意思咁講。

「咁輝輝，我地唔好阻人做生意，行囉？」

「嗯，好呀。」

Veronica拎起手袋，起身禮貌地同小曼、Eric講再見。

隨之我亦同二人道別，同Veronica一齊離開café 。

平時嘅話我會送埋佢返屋企，但呢刻我疑心未消，故意作個藉口話約左老豆老母買嘢，實質偷偷地跟住對方尾，睇下佢係咪真係返屋企，定抑或去揾Kevin。

而結果係，佢直接返左屋企，無去見任何人。



暫時睇落，似乎係我唔誤會左？

見到Veronica行入住嘅大廈，我就返轉頭，搭車返歸。

幾乎成個禮拜無返過屋企，一返到嚟先沖返個熱水涼，而個腦仲不停諗緊從Kevin口中嗰一句「阿Ling」。

嗰種對話，嗰種稱呼，嗰種語氣，真係同2009年嗰陣完全一樣。

直覺話我聽，當刻佢係同緊Veronica講電話，奈何剛才check電話又揾唔到什麼蛛絲馬跡。

苦惱之際，我諗起電話留有Emily個電話，頭先打唔成，依家再試打一次，睇下係咪人接。

「嘟…嘟…」



電話嘟左幾下，有人接聽：「喂？」

同一把男人聲。

「請問係咪Emily？」我問。

「打錯！」對方一下cut左我線。

之後我用屋企電話打過去，今次我問佢係咪Kevin。

「邊位？有咩事？」

佢竟然應我！

「你…你真係叫Kevin？」



「你乜水？」

「我…」

個「我」字剛出口，對方就收線：「我唔買保險！」

我十分震驚，心諗呢個男人…

呢個叫Emily嘅男人…係Kevin？

咁…咁即係點？

假設Emily係Kevin，咁代表Veronica一直有同Kevin聯絡？並用假名作掩飾？



既然係咁，嗰日佢上嘅係Kevin架車，由頭到尾都係無Emily呢個人？

咁佢地兩個依家究竟係咩關係？

我…我係咪...戴左綠帽…

呢刻腦海完全一片混亂，啲問號不斷咁彈出嚟…

到底係咩一回事？？？